ក្រុមហ៊ុន Microsoft បានឲ្យដឹងនៅក្នុងសេចក្ដីថ្លែងការណ៍របស់ខ្លួនទៀតថា ក្រុមហ៊ុននឹងបន្ដធ្វើការងារជាមួយនឹងរដ្ឋាភិបាលអាមេរិក ដើម្បីបញ្ចប់កិច្ចព្រមព្រៀងទិញលក់នេះ ដែលរំពឹងថា នឹងការចរចាចុងក្រោយនឹងបញ្ចប់នៅថ្ងៃទី ១៥ ខែកញ្ញាខាងមុខ។
ប្រសិនបើកិច្ចព្រមព្រៀងនេះ ត្រូវបានបញ្ចប់ នោះក្រុមហ៊ុន Microsoft នឹងអាចដោះស្រាយបញ្ហាវិវាទដែលកំពុងកើតឡើងនាពេលថ្មីៗនេះរវាងរដ្ឋាភិបាល អាមេរិកនឹងក្រុមហ៊ុនចិន ដែលគ្រប់គ្រងកម្មវិធី Tiktok នេះ។ បន្ថែមពីនេះ Microsoft នឹងទទួលបានឥទ្វិពលកាន់តែខ្លាំងក្លាទាក់ទងនឹងចំនួនអ្នកប្រើប្រាស់បច្ចេកវិទ្យារបស់ខ្លួន។
មួយរយៈចុងក្រោយនេះ ស្របពេលដែលសង្គ្រាមពាណិជ្ជកម្មអាមេរិក-ចិននៅតែមិនទាន់មានដំណោះស្រាយ រដ្ឋាភិបាលអាមេរិកបាននិងកំពុងដាក់ការរឹតត្បិតលើក្រុមហ៊ុនបច្ចេកវិទ្យារបស់ចិនកាន់តែខ្លាំងឡើង។ តួយ៉ាង បណ្ដាញសង្គមធំៗដូចជា TikTok និង WeChat ដែលកំពុងមានប្រើប្រាស់នៅក្នុងសហរដ្ឋអាមេរិកនោះ ត្រូវបានរដ្ឋាភិបាលអាមេរិកចោទថា បានបញ្ជូនទិន្នន័យដោយផ្ទាល់ចេញពីអាមេរិកទៅកាន់ប្រទេសចិន ដែលវាគឺប៉ះពាល់ដល់ប្រព័ន្ធសន្ដិសុខជាតិអាមេរិក។
អត្ថបទទាក់ទង!
តាមការរាយការណ៍របស់ CNBC បានឲ្យដឹងថា សេចក្ដីថ្លែងការណ៍របស់ក្រុមហ៊ុន Microsoft ដែលបានចេញនៅថ្ងៃអាទិត្យទី ០២ កក្កដានេះ គឺធ្វើឡើងក្រោយ២ថ្ងៃបន្ទាប់ពីមានការរាយការណ៍ថា ក្រុមហ៊ុន Microsoft មានចំណាប់អារម្មណ៍ក្នុងការទិញយកកម្មវិធី TikTok ហើយភ្លាមៗនេះ ក៏មាន ការរាយការណ៍ដែរថា លោកត្រាំ បានជំទាស់លើគំនិតដែល Microsoft នឹងទិញយកTikTok នៅអាមេរិកនេះ ហើយលោក នឹងហាមឃាត់កម្មវិធីបណ្ដាញសង្គមរបស់ចិនមួយនេះ មិនឲ្យមាននៅអាមេរិកអាមេរិកតែម្ដង។
ប្រភពព័ត៌មានដដែល បានឲ្យដឹងទៀតថា នាយកប្រតិបត្តិក្រុមហ៊ុន Microsoft លោក Satya Nadella បាននិយាយទៅកាន់លោកត្រាំដែរថា ក្រុមហ៊ុន Microsoft និងក្រុមហ៊ុនមេរបស់កម្មវិធី TikTok បានរកមើលការទិញលក់ TikTok នៅអាមេរិក, កាណាដា, អូស្ត្រាលី និងនូវែលហ្សេឡង់ ហើយក្រុមហ៊ុន Microsoft អាចនឹងផ្ដល់ឲ្យវិនិយោគិនអាមេរិកាំងផ្សេងទៀត ចូលរួមក្នុងការទិញយក TikTokនេះដែរ។
តាមការរាយការណ៍របស់ Reuters នៅថ្ងៃអាទិត្យទី ០២ កក្កដានេះដែរ បានឲ្យដឹងថា លោកត្រាំ បានយល់ ព្រមទុកពេលឲ្យក្រុមហ៊ុនចិន ByteDance ចំនួន ៤៥ថ្ងៃ ដើម្បីបញ្ចប់កិច្ចព្រមព្រៀងទិញលក់ TikTok ជាមួយនឹង Microsoft។ ក្រុមហ៊ុន Microsoft បានគូសបញ្ជាក់ដែរថា ខ្លួននឹងធ្វើឲ្យប្រាកដថា ទិន្នន័យ អ្នកប្រើប្រាស់នៅលើ TikTok នៅក្នុងសហរដ្ឋអាមេរិក នឹងត្រូវរក្សាទុកនៅអាមេរិក មិនត្រូវបញ្ជូនទៅណានោះឡើយ ហើយទិន្នន័យដែលរក្សាទុកនៅកន្លែងផ្សេងទៀត នឹងត្រូវលុបចោល បន្ទាប់ពីក្រុមហ៊ុនបានសម្រេចកិច្ចព្រមព្រៀងទិញយក TikTok នៅអាមេរិកនេះ។
បណ្ដាញសង្គម TikTok ត្រូវបានស្គាល់ថា ជាដៃគូប្រជែងដ៏ធំមួយរបស់ក្រុមហ៊ុន Facebook ហើយការទិញរបស់ TikTok នេះ អាចនឹងធ្វើឲ្យក្រុមហ៊ុន Microsoft មានភាពស្មុគស្មាញខ្លះដែរ ដល់ទំនាក់ទំនងជាមួយនឹង Facebook ព្រោះថា ក្រុមហ៊ុន Microsoft ក៏ធ្លាប់បានវិនិយោគ២៤០លានដុល្លារជាមួយ Facebook កាលពីឆ្នាំ២០០៧ ហើយចាប់តាំងពីពេលនោះមកក្រុមហ៊ុនទាំងពីរនេះ បានធ្វើការជាមួយគ្នាលើគំនិតផ្ដួចផ្ដើមជាច្រើន។
ក្រុមហ៊ុន ByteDance
បានបង្កើត TikTok នៅក្រៅប្រទេសចិន តាំងពីឆ្នាំ២០១៧ បន្ទាប់មកក៏បានបង្កើតកម្មវិធីស្រដៀងគ្នានេះមួយទៀត
ឈ្មោះ Douyin។
ប៉ុន្មានខែក្រោយមក ក្រុមហ៊ុន ByteDance បានទិញយកកម្មវិធី
Musical.ly
ដែលជាកម្មវិធីបណ្ដាញសង្គមដាច់ដោយឡែកមួយ ទទួលបានចំណូលពីអ្នកប្រើប្រាស់ដែលជាយុវវ័យប្រមាណជា
៨០០លានដុល្លារ។
អត្ថបទគួរឲ្យចាប់អារម្មណ៍!
សូមបញ្ជាក់ថា កាលពីថ្ងៃអាទិត្យទី ០២ សីហា លោក Mike Pompeo រដ្ឋមន្ត្រីក្រសួងការបរទេសអាមេរិក បាននិយាយនៅលើទូរទស្សន៍ Fox News ថា កម្មវិធី TikTok និងកម្មវិធីដ៏ពេញនិយមមួយទៀតរបស់ចិន គឺ WeChat របស់ក្រុមហ៊ុន Tencent គឺបានបញ្ជូនទិន្នន័យដោយផ្ទាល់ទៅកាន់រដ្ឋាភិបាលចិន។ ហើយកាលពីថ្ងៃពុធ ទី២៩ កក្កដា លោក Steven Mnuchin លេខាធិការ រតនាគារអាមេរិក បានឲ្យដឹងដែរថា គណៈកម្មាធិការវិនិយោគបរទេសនៅអាមេរិក បាននិងកំពុងត្រួតពិនិត្យមើលលើកម្មវិធី TiikTokនេះ។
តាមការរាយការណ៍របស់ CNBC នាពេលកន្លងទៅនេះ បានឲ្យដឹងថា គណៈកម្មាធិការវិនិយោគបរទេសនៅអាមេរិក បានឈានដល់ការត្រួតពិនិត្យលើក្រុមហ៊ុន ByteDance នេះ ក៏ដោយសារតែបារម្ភថា ការទិញយកកម្មវិធី Musical.ly របស់ក្រុមហ៊ុនចិនមួយនេះ អាចនឹងបង្កឲ្យមានហានិភ័យដល់សន្ដិសុខជាតិអាមេរិក៕
None
