សេចក្ដីជូនដំណឹងដដែលនេះ បានគូសបញ្ជាក់ទៀតថា ថ្នាលសហគមន៍ឌីជីថលកម្ពុជា ដែលបានបង្កើតឡើងនាពេលកន្លងទៅនេះ បានក្លាយជាកន្លែងប្រមូលផ្ដុំធនធានមនុស្សឌីជីថល មានជាអាទិ៍ អ្នកអភិវឌ្ឍន៍សុសវែរ, សហគ្រិនឌីជីថល, បុគ្គលពាក់ព័ន្ធដែលមានគុណវុឌ្ឍបច្ចេកវិទ្យាឌីជីថល និងនិស្សិត ក្នុងទម្រង់ជាការចូលរួមដោយស្ម័គ្រចិត្ត ដែលបច្ចុប្បន្ន មានអ្នកចុះឈ្មោះប្រមាណ ៥ ០០០ នាក់ ដើម្បី៖
- ផ្តល់ឱកាសឱ្យអ្នកជំនាញទំនាក់ទំនងគ្នា ចែករំលែកចំណេះដឹង និងបទពិសោធ និងស្រាវជ្រាវនិងអភិវឌ្ឍរួមគ្នា
- ស្វែងយល់និងផ្លាស់ប្តូរចំណេះដឹងអំពីបច្ចេកវិទ្យាឌីជីថលថ្មីៗ ដែលកំពុងអភិវឌ្ឍ
- ទទួលបានព័ត៌មានអំពីសកម្មភាពការងារអភិវឌ្ឍន៍បច្ចេកវិទ្យាឌីជីថលរបស់រាជរដ្ឋាភិបាល
- រៀបចំការពិភាក្សា សិក្ខាសាលា និងសន្និសីទពាក់ព័ន្ធនឹងការអភិវឌ្ឍបច្ចេកវិទ្យាឌីជីថល
- ទទួលបានព័ត៌មានអំពីឱកាសហាត់ការឬចុះកម្មសិក្សា និងឱកាសការងារ នៅតាមស្ថាប័នរដ្ឋនិងឯកជន
- ទទួលបានព័ត៌មានអំពីអាហារូបករណ៍លើវគ្គបណ្តុះបណ្តាល ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត។
យ៉ាងណាមិញ សម្រាប់ការរៀបចំបង្កើតសមាគមអ្នកវិជ្ជាជីវៈវិស័យឌីជីថល គឺត្រូវបានធ្វើឡើងក្រោយពីមានការឯកភាពដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងមានការចូលរួមសហការរៀបចំដោយក្រសួងប្រៃសណីយ៍និងទូរគមនាគមន៍ និងក្រសួងអប់រំ យុវជន និងកីឡា។ សមាគមនេះ នឹងមានការបែងចែកជាសហគមន៍ទៅតាមជំនាញ មានជាអាទិ៍ សហគមន៍អ្នកជំនាញទូរគមនាគមន៍, សហគមន៍អ្នកអភិវឌ្ឍន៍សុវែរ, សហគមន៍អ្នកជំនាញបច្ចេកវិទ្យាក្លោដ, សហគមន៍អ្នកជំនាញបញ្ញាសិប្បនិម្មិត, សហគមន៍អ្នកជំនាញសន្ដិសុខសាយប័រ, សហគមន៍អ្នកជំនាញវិទ្យាសាស្ត្រទិន្នន័យ និងសហគមន៍អ្នកជំនាញបច្ចេកវិទ្យារ៉ូបូត ជាដើម។
ក្រសួងប្រៃសណីយ៍ និងទូរគមនាគមន៍ ក៏បានអំពាវនាវ និងលើកទឹកចិត្តដល់មន្ត្រីរាជការ សិស្សនិស្សិត បញ្ញវន្ត និងសាធារណជន ដែលមានជំនាញឌីជីថល និង/ឬកំពុងប្រកបវិជ្ជាជីវៈជំនាញឌីជីថល ឲ្យចូលរួមក្នុងយន្ដការខាងលើនេះ ដើម្បីប្រមូលផ្ដុំធនធានមនុស្ស និងការអភិវឌ្ឍសមត្ថភាពវិជ្ជាជីវៈលើវិស័យឌីជីថលឲ្យកាន់តែមានភាពរឹងមាំ សម្ដៅរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា៕
