ថ្លែងនៅក្នុងជំនួបពិភាក្សាជាមួយប្រតិភូធុរជនចិន មកពីខេត្តសានស៊ី ដឹកនាំដោយលោក វ៉ាង លីពីង ប្រធានក្រុមហ៊ុន GuangBo Group Co., Ltd និងជាលេខាធិការគណៈកម្មការបក្សនៃសភាប្រជាជនទី១២ កាលពីពេលថ្មីៗនេះ ឯកឧត្តម ប៉ាន សូរស័ក្ដិ បានគូសបញ្ជាក់ថា កម្ពុជាមានសក្តានុពលនៃទីតាំងភូមិសាស្ត្រ មានគោលនយោបាយគាំពារវិនិយោគ គោលនយោបាយអភិវឌ្ឍន៍ឧស្សាហកម្ម គម្រោង Plus One នៅតាមតំបន់សេដ្ឋកិច្ចពិសេស និងការលើកទឹកចិត្តផ្សេងៗរបស់រាជរដ្ឋាភិបាល ចំពោះវិនិយោគិនបរទេស។
អត្ថបទទាក់ទង!
ជាក់ស្ដែង កម្ពុជាមានតំបន់សេដ្ឋកិច្ចពិសេសចំនួន ១៩ ទីតាំង បាននិងកំពុងធ្វើប្រតិបត្តិការ សម្រាប់ផ្តល់ឱ្យវិនិយោគិនបើករោងចក្រ ដើម្បីទទួលបានការលើកលែងពន្ធលើប្រាក់ចំណេញ ៩ឆ្នាំ អាចគ្រប់គ្រងភាគហ៊ុន ១០០% ហើយអាចនាំចេញផលិតផលទៅកាន់ទីផ្សារក្នុងតំបន់ (អាស៊ាន) សហរដ្ឋអាមេរិក និងសហគមន៍អឺរ៉ុប នៅក្រោមកម្មវិធីអនុគ្រោះពន្ធថែមទៀតផង។
ឯកឧត្តមរដ្ឋមន្ត្រី ក៏បានបញ្ជាក់ទៀតថា រាជរដ្ឋាភិបាលបាន និងកំពុងខិតខំយ៉ាងខ្លាំង ក្នុងការលើកកម្ពស់បរិយាកាសធុរកិច្ច និងវិនិយោគ តាមរយៈការកាត់បន្ថយសកម្មភាពការិយាធិបតេយ្យ ការសាងហេដ្ឋារចនាសម្ព័ន្ធរូបវន្ត ដូចជាផ្លូវគមនាគមន៍ ព្រលានយន្តហោះ កំពង់ផែអន្តរជាតិ និងតំបន់សេដ្ឋកិច្ចពិសេសជាដើម។ ពិសេសជាងនេះទៀតនោះ គឺការបណ្តុះបណ្តាលធនធានមនុស្ស ការចងក្រង និងធ្វើវិសោធនកម្មច្បាប់ថ្មីៗ សំដៅគាំទ្រការអភិវឌ្ឍវិស័យឯកជន និងពង្រឹងឧត្តមភាពប្រកួតប្រជែងរបស់កម្ពុជា។
ជាមួយគ្នានេះដែរ លោក វ៉ាង លីពីង បានបញ្ជាក់ដែរថា ខាងប្រតិភូធុរជនមកពីខេត្ត សានស៊ី ប្រទេសចិន កំពុងសិក្សាលទ្ធភាពចង់បង្កើតរោងចក្រផលិតសម្ភារៈសិក្សារ និងកីឡានៅកម្ពុជា ដើម្បីផ្គត់ផ្គង់ទីផ្សារក្នុងស្រុកផង និងនាំចេញទៅកាន់ទីផ្សារសំខាន់ៗផងដែរ។ ហើយក្រោយមានពីទទួលបាន ភ្លើងខៀវ ពីក្រសួងពាណិជ្ជកម្មកម្ពុជា ខាងប្រតិភូធុរកិច្ចចិន នឹងពិនិត្យលទ្ធភាពពង្រីកការវិនិយោគមកកម្ពុជា នៅក្នុងពេលឆាប់ៗខាងមុខ ដើម្បីតភ្ជាប់ទំនាក់ទំនងពាណិជ្ជកម្មប្រទេសទាំងពីរ នៅក្រោមក្របខណ្ឌខ្សែក្រវ៉ាត់១ និងផ្លូវ១ របស់រដ្ឋាភិបាលចិន៕
None
