ក្រសួងពាណិជ្ជកម្ម៖ អ្នករកស៊ីតាមប្រព័ន្ធអេឡិចត្រូនិកគ្មានអាជ្ញាបណ្ណ ប្រឈមនឹងការផាកពិន័យ១០លានរៀល ឬបិទអាជីវកម្ម

មន្ត្រីជាន់ខ្ពស់របស់ក្រសួងពាណិជ្ជកម្មបានគូសបញ្ជាក់ថា បើសិនបើការរកស៊ីអាជីវកម្មតាមប្រព័ន្ធអេឡិចត្រូនិកគ្មានការអនុញ្ញាត នោះម្ចាស់អាជីវកម្មប្រឈមនឹងការផាកពិន័យ១០លានរៀល ឬត្រូវបញ្ឈប់អាជីវកម្មផងដែរ។

 ស្របពេលដែលការប្រកបអាជីវកម្មតាមប្រព័ន្ធអនឡាញនៅកម្ពុជាមានការរីកចម្រើនខ្លាំង ក្រសួងពាណិជ្ជកម្មបានក្រើនរម្លឹកដាស់តឿនជាថ្មីឲ្យក្រុមហ៊ុន សហគ្រាស និងអ្នកប្រកបអាជីវកម្មតាមប្រព័ន្ធអេឡិចត្រូនិកទាំងអស់ ឲ្យមកដាក់ពាក្យស្នើសុំលិខិតអនុញ្ញាត ឬ អាជ្ញាបណ្ណពាណិជ្ជកម្មឲ្យបានត្រឹមត្រូវ បើមិនចង់រងការពិន័យជាប្រាក់ ឬបញ្ឈប់អាជីវកម្មទេនោះ។

ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មបានអះអាងថា តាំងពីច្បាប់ពាណិជ្ជកម្មតាមប្រព័ន្ធអេឡិចត្រូនិកត្រូវបានដាក់ឲ្យប្រើប្រាស់តាំងពីឆ្នាំ២០១៩ មកទល់ពេលនេះមិនទាន់មានក្រុមហ៊ុន សហគ្រាស ឬបុគ្គលរកស៊ីតាមប្រព័ន្ធអេឡិចត្រូនិកណាមួយ មកដាក់ពាក្យស្នើសុំលិខិតអនុញ្ញាត ឬអាជ្ញាបណ្ណពីក្រសួងនៅឡើយទេ។ 

អ្នកនាំពាក្យឆ្លាស់វេននៃក្រសួងពាណិជ្ជកម្មរូបនេះបានព្រមានថា ក្រុមហ៊ុន សហគ្រាស ឬបុគ្គល ដែលរកស៊ីតាមប្រព័ន្ធអេឡិចត្រូនិកអាចប្រឈមនឹងការផ្អាក ឬបញ្ឈប់អាជីវកម្ម ឬរងពិន័យជាទឹកប្រាក់រហូតដល់ ១០លានរៀល ប្រសិនបើបន្តរកស៊ីដោយគ្មានលិខិតអនុញ្ញាត ឬអាជ្ញាបណ្ណត្រឹមត្រូវ។

ពាក់ព័ន្ធតម្លៃសេវានៃការស្នើសុំលិខិតអនុញ្ញាត ឬអាជ្ញាបណ្ណត្រូវបានឯកឧត្តម ប៉ែន សុវិជាតិ បញ្ជាក់ថា ការស្នើសុំលិខិតអនុញ្ញាតលក្ខណៈបុគ្គលមានតម្លៃ២០ម៉ឺនរៀល, លិខិតអនុញ្ញាតសម្រាប់សហគ្រាសឯកបុគ្គលមានតម្លៃ៤០ម៉ឺនរៀល និងអាជ្ញាបណ្ណសម្រាប់ក្រុមហ៊ុនតម្លៃ១លានរៀល។

សម្រាប់ការស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មអេឡិចត្រូនិក ក្រុមហ៊ុន សហគ្រាស ឬបុគ្គលរកស៊ីតាមអនឡាញទាំងអស់ អាចដាក់ពាក្យស្នើសុំនៅនាយកដ្ឋានចុះបញ្ជីពាណិជ្ជកម្ម អគ្គនាយកដ្ឋានសេវាពាណិជ្ជកម្មនៃក្រសួងពាណិជ្ជកម្ម ឬអាចចូលទៅកាន់គេហទំព័ររបស់ក្រសួងពាណិជ្ជកម្មដើម្បីស្វែងរកការស្នើសុំតាមអនឡាញក៏បាន៕