ក្រុមហ៊ុនអេឡិចត្រូនិក LG ថ្មីៗនេះ បានរើខ្សែចង្វាក់ផលិតកម្មទូរស័ព្ទស្មាតហ្វូនរបស់ខ្លួនទាំងស្រុង ពីកូរ៉េខាងត្បូង មកកាន់ភាគខាងជើងនៃទីក្រុងហៃផុង ប្រទេសវៀតណាម។
នៅក្នុងសន្និសីទថ្មីៗនេះ រវាងរដ្ឋាភិបាល និងអាជ្ញាធរក្រុងហៃផុង បានស្នើពង្រីកបន្ថែមតំបន់សេដ្ឋកិច្ចពិសេស Dinh Vu-Cat Hai និងសួនឧស្សាហកម្ម Trang Due នៅក្នុងទីក្រុងនេះ ដើម្បីបង្កើតលក្ខខណ្ឌសម្រាប់ការពង្រីកប្រតិបត្តិការរបស់ក្រុមហ៊ុន LG។
ក្រុមហ៊ុន LG របស់កូរ៉េខាងត្បូងមួយនេះ បានគ្រោងនឹងវិនិយោគរោងចក្រតម្លៃ១,៥ពាន់លានដុល្លារអាមេរិក នៅក្នុង សួនឧស្សាហកម្ម Trang Deu នៅក្នុងឆ្នាំ២០១៥។
ប្រទេសកូរ៉េខាងត្បូង ក៏ត្រូវបានស្គាល់ថា ជាអ្នកវិនិយោគនាំមុខគេនៅវៀតណាមកាលពីឆ្នាំ២០១៩ ដែលមានទុនវិនិយោគសរុប ៧,៩២ ពាន់លានដុល្លារអាមេរិក។
អត្ថបទទាក់ទង!
ក្រៅពី LG ក៏មានក្រុមហ៊ុនជប៉ុន Panasonic ក៏កំពុងមានផែនការរើខ្សែចង្វាក់ផលិតកម្មរបស់ខ្លួនទាក់ទនឹងការបង្កើតទូរទឹកកក និងម៉ាស៊ីនបោកខោអាវខ្នាតធំ ពីប្រទេសថៃ មកកាន់វៀតណាមនៅដើមខែកញ្ញាឆ្នាំនេះផងដែរ ដើម្បីធ្វើឲ្យមានភាពប្រសើរឡើងនៃប្រសិទ្ធភាពនៃការចំណាយរបស់ក្រុមហ៊ុន។
លើសពីនេះទៅទៀត ក្រុមហ៊ុន Foxconn ដែលជាក្រុមហ៊ុនអ្នកម៉ៅការដ៏សំខាន់មួយរបស់ ក្រុមហ៊ុនយក្ស Apple របស់អាមេរិក ក៏បានពង្រីកផលិតកម្មរបស់ខ្លួនទាក់ទងនឹងការផលិតកាសស្ដាប់ត្រចៀកឥតខ្សែ ដែលហៅថា Airpods មកកាន់ប្រទេសវៀតណាមផងដែរ។ ក្រុមហ៊ុន Apple ហាក់ដូចជាបង្ហាញពីបំណងផ្លាស់ប្តរូរផ្នែកខ្លះនៃផលិតកម្មរបស់ខ្លួនពីប្រទេសចិន មកកាន់វៀតណាមដែលជាកន្លែងធ្លាប់មានការដំឡើងកាសស្ដាប់ត្រចៀកឥតខ្សែ និងខ្សែសាកថ្មទូរស័ព្ទ។
កាលពីប៉ុន្មានខែមុននេះ ក្រុមហ៊ុន Apple បានបង្ហោះសារត្រូវការរើសបុគ្គលិកនៅក្នុងប្រទេសវៀតណាមតាមបណ្ដាញទំនាក់ទំនង LinkedIn ហើយវាត្រូវបានគេរាយការណ៍ថា ក្រុមហ៊ុននេះ អាចនឹងពង្រីកផលិតកម្មរបស់ខ្លួននៅក្នុងប្រទេសវៀតណាម។
ក្រុមហ៊ុន Foxconn ដែលកាន់កាប់ដោយតៃវ៉ាន់ ថ្មីៗនេះ បាននិយាយថា នេះជាលើកទី១ហើយ ដែលវៀតណាមគឺបានក្លាយជាមជ្ឈមណ្ឌលផលិតកម្មដ៏ធំជាងគេនៅក្នុងតំបន់អាស៊ីអាគ្នេយ៍នេះ។ ហើយក្រុមហ៊ុនតៃវ៉ាន់មួយនេះ មានរោងចក្រចំនួន ៣ហើយនៅក្នុងខេត្ត Bac Giang នៃភាគខាងជើងប្រទេសវៀតណាម។
អ្នកជំនាញនិយាយថា វៀតណាមបានក្លាយជាទិសដៅសម្រាប់ការផលិតដ៏ទាក់ទាញមួយ សម្រាប់អន្តរជាតិ ដោយសារតែមានកិច្ចខិតខំប្រឹងប្រែងក្នុងការគ្រប់គ្រងការឆ្លងរីករាលដាលនៃកូវីដ-១៩ បានទាន់ពេលវេលា ខណៈដែលប្រទេសនេះមានប្រជាជនសរុប៩៦លាននាក់ តែមានករណីឆ្លងតែ៣៧២នាក់ប៉ុណ្ណោះ និងមានអ្នកស្លាប់នោះទេ គិតមកទល់ពេលនេះ។
អត្ថបទគួរឲ្យចាប់អារម្មណ៍!
ការពង្រីកខ្សែចង្វាក់ផលិតកម្ម និងការវិនិយោគ ដោយក្រុមហ៊ុនអន្តរជាតិ បានចូលរួមចំណែកយ៉ាងសំខាន់ទៅក្នុងកំណើននៃឧស្សាហកម្មអេឡិចត្រូនិករបស់វៀតណាមនៅក្នុងពាក់កណ្ដាលឆ្នាំ២០២០នេះ បើទោះបីជាឧស្សាហកម្មនេះ កំពុងទទួលរងឥទ្ធិពលអាក្រក់ពីវិបត្តិកូវីដ-១៩ ក៏ដោយ។
ការនាំចេញផលិតផល និងគ្រឿងបង្គុំកុំព្យូទ័រ និងគ្រឿអេឡិចត្រូនិក បានកើនឡើង២៤% នៅពាក់កណ្ដាលឆ្នាំនេះ មានតម្លៃជាទឹកប្រាក់ជិត១៩,៣ពាន់លានដុល្លារអាមេរិក ខណៈការនាំចេញទូរស័ព្ទចល័ត និងគ្រឿងទូរស័ព្ទផ្សេងៗទៀត បានកើនឡើងដល់២១,៥ពាន់លានដុល្លារអាមេរិក។
យ៉ាងណាក៏ដោយ ឧស្សាហកម្មអេឡិចត្រូនិកវៀតណាមទំនងជានឹងប៉ះពាល់ខ្លាំងនៅឆមាសទី២ នៃឆ្នាំនេះ ដោយសារតែបញ្ហាកូវីដ-១៩ ធ្វើឲ្យប៉ះពាល់ដល់តម្រូវការនៅក្នុងទីផ្សារអាមេរិក និងអឺរ៉ុប។
យ៉ាងណាមិញ ការលក់ និងទិន្នផលជាសកលរបស់ក្រុមហ៊ុន Samsung ត្រូវបានព្យាករថា នឹងធ្លាក់ចុះ ហើយក្រុមហ៊ុន Samsung នៅវៀតណាមក៏មានផែនការនឹងកាត់បន្ថយគោលដៅនាំចេញសម្រាប់ឆ្នាំ២០២០នេះ ១២,៧% ធៀបនឹងឆ្នាំ២០១៩ ដែលមាន៤៥,៥ពាន់លានដុល្លារអាមេរិក
អ្នកជំនាញសេដ្ឋកិច្ចរបស់ UBS បានបញ្ជាក់នាពេលថ្មីៗនេះថា វៀតណាមគឺស្ថិតនៅក្នុងចំណោមចំណុចភ្លឺដ៏ត្រចេះត្រចង់មួយ (Brightest Spots) នៅក្នុងតំបន់អាស៊ី បើទោះបីជាមានការប្រឈមនឹងការព្យាយាមទប់ស្កាត់ការរីករាលដាលនៃមេរោគរាតត្បាតក្ដី ហើយសេដ្ឋកិច្ចរបស់ប្រទេសនេះ កំពុងត្រៀមខ្លួនងើបឡើងវិញហើយ៕
None
