រដ្ឋមន្ត្រីក្រសួងពាណិជ្ជកម្មថៃ លោក ជូរិន លក្ខសាណាវីសិត (Jurin Laksanawisit) បានឱ្យដឹងថា ប្រសិនបើការចរចានាំចេញទំនិញតាមគម្រោងរថភ្លើងល្បឿនលឿនឡាវ-ចិនសម្រេចបានជោគជ័យមែន នោះកិច្ចសហប្រតិបត្តិក្នុងវិស័យភស្តុភារកម្ម និងដឹកជញ្ជូនក៏នឹងជួយលើកកម្ពស់ពាណិជ្ជកម្មឆ្លងព្រំដែនរួមរវាងថៃ និងឡាវព្រមទាំងចិនផងដែរ។
ក្រសួងពាណិជ្ជកម្មថៃបច្ចុប្បន្ននេះ បាននិងកំពុងធ្វើការលើយុទ្ធសាស្ត្រពាណិជ្ជកម្មព្រំដែន ដើម្បីទប់ទល់នឹងផលប៉ះពាល់នៃគម្រោងរថភ្លើងល្បឿនលឿនឡាវ-ចិន ក៏ដូចជាការស្វែងរកមធ្យោបាយជំរុញការនាំចេញ និងពាណិជ្ជកម្មឆ្លងព្រំដែនរបស់ប្រទេសខ្លួនផងដែរ។
អត្ថបទគួរអាន
យ៉ាងណាមិញ រដ្ឋមន្ត្រីពាណិជ្ជកម្មដដែលរូបនេះ ក៏បានសន្យាថានឹងប្រើប្រាស់ផ្លូវរថភ្លើងល្បឿនលឿនឡាវ-ចិនឱ្យល្អបំផុតដើម្បីដឹកជញ្ជូនផលិតផលបន្ថែមទៀត។ ខណៈបច្ចុប្បន្ននេះ ប្រទេសចិនអនុញ្ញាតឱ្យដឹកជញ្ជូនទំនិញមួយចំនួន ដូចជា រ៉ែ កៅស៊ូ និងដំឡូងមីតែប៉ុណ្ណោះ តាមរយៈផ្លូវរថភ្លើងល្បឿនលឿននេះ។ ដូច្នេះហើយបានជាប្រទេសថៃ ចង់ចរចាជាមួយរដ្ឋាភិបាលចិន ដើម្បីអនុញ្ញាតឱ្យការដឹកជញ្ជូនផ្លែឈើស្រស់របស់ថៃនៅក្នុងរដូវប្រមូលផលខាងមុខនេះបន្ថែមទៀត។
យ៉ាងណាមិញ ក្រៅតែពីការចរចាលើការនាំចេញទំនិញតាមគម្រោងរថភ្លើងល្បឿនលឿននេះ រដ្ឋាភិបាលថៃកាលពីចុងខែធ្នូក៏បានបង្កើតក្រុមការងារមួយ ដើម្បីសម្របសម្រួលឱ្យកាន់តែល្អជាមួយអាជ្ញាធរដឹកជញ្ជូនក្នុងប្រទេសឡាវលើគម្រោងសាងសង់ផ្លូវរថភ្លើងតភ្ជាប់ប្រទេសជិតខាងទាំងពីរផងដែរ។
សូមជម្រាបថា កាលពីឆ្នាំមុន ទំហំពាណិជ្ជកម្មព្រំដែន ថៃ-ឡាវ បានកើនឡើងដល់ជិត ៦ ពាន់លានដុល្លារ មានកំណើនជាង ១២% ធៀបទៅនឹងឆ្នាំមុន។ ក្នុងនោះ ការនាំចេញពីប្រទេសថៃមានចំនួនជាង ៣ពាន់ ៣រយលានដុល្លារ កើនឡើងជាង ២០% ពីឆ្នាំ ២០២០ ដែលបណ្តាលឱ្យថៃមានអតិរេកពាណិជ្ជកម្មមានតម្លៃជាង ៩រយលានដុល្លារ ពីពាណិជ្ជកម្មតាមព្រំដែនថៃ-ឡាវនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
