ជាមួយគ្នានោះ អង្គការណាតូ នឹងបញ្ជូនកងទ័ព និង ប្រព័ន្ធការពារមីស៊ីលកាន់តែច្រើនបន្ថែមទៀតទៅកាន់តំបន់អឺរ៉ុបខាងកើត ដើម្បីត្រៀមខ្លួនជាមុន ប្រសិនបើសង្គ្រាមឈ្លានពានរុស្ស៊ី រាលដាលហួសអ៊ុយក្រែន ខណៈដែលថ្មីៗនេះ រុស្ស៊ីក៏បានបាញ់ផ្លោងកាន់តែខ្លាំងក្លាទៅលើតំបន់ភាគខាងលិចនៃប្រទេសអ៊ុយក្រែន ក៏ដូចជាក្បែរព្រំដែនប្រទេសប៉ូឡូញជាដើម។ នេះបើយោងតាមសារព័ត៌មានអន្តរជាតិធំៗជាច្រើន។
ក្រុមរដ្ឋមន្ត្រីការពារជាតិនៃប្រទេសជាសមាជិកអង្គការណាតូ នឹងត្រូវធ្វើការប្រឹក្សាយោបល់ផ្នែកយោធានៅទីស្នាក់ការអង្គការណាតូ នៅថ្ងៃពុធសប្ដាហ៍នេះ ពោលគឺនៅរយៈពេលតែជាងមួយសប្តាហ៍ប៉ុណ្ណោះ មុនពេលមេដឹកនាំសម្ព័ន្ធមិត្តរួមទាំងប្រធានាធិបតីសហរដ្ឋអាមេរិកលោក Joe Biden នឹងត្រូវជួបជុំគ្នានៅទីក្រុងប្រ៊ុចសែលប្រទេសបែលហ្ស៊ិកនៅថ្ងៃទី២៤ ខែមីនាខាងមុខនេះ។
ក្រុមរដ្ឋមន្ត្រីការពារជាតិទាំងនេះ ក៏នឹងបានស្ដាប់ការលើកឡើងពីសមភាគីអ៊ុយក្រែន គឺលោក អូឡិកស៊ី រ៉េសនីកូវ (Oleksii Reznikov) ដែលគេរំពឹងថា នៅក្នុងកិច្ចប្រជុំនោះ លោក រ៉េសនីកូវ នឹងស្នើសុំអាវុធបន្ថែមទៀត ពីប្រទេសសមាជិកអង្គការណាតូ ខណៈដែលរុស្ស៊ីបន្តវាយប្រហារទៅលើទីក្រុងនានារបស់អ៊ុយក្រែន ហើយយោធារុស្ស៊ីកំពុងខំប្រឹងគ្រប់គ្រងដណ្ដើមយកទីក្រុង កៀវរបស់អ៊ុយក្រែនយ៉ាងស្វិតស្វាញ។
លោក ជេន ស្តូលថិនប៊ឺក (Jens Stoltenberg) អគ្គលេខាធិការអង្គការណាតូបាននិយាយថា ពួកគេត្រូវកំណត់ឡើងវិញនូវឥរិយាបថយោធារបស់ខ្លួនសម្រាប់ការពិតថ្មីនេះ ដោយបានបន្ថែមថា រដ្ឋមន្ត្រីការពារជាតិនៃប្រទេសសមាជិកណាតូ នឹងចាប់ផ្តើមការពិភាក្សាដ៏សំខាន់មួយស្តីពីវិធានការជាក់ស្តែង ដើម្បីពង្រឹងសន្តិសុខរបស់ខ្លួនសម្រាប់រយៈពេលវែងជាងនេះ នៅក្នុងគ្រប់វិស័យទាំងអស់។
អត្ថបទគួរអាន
ខណៈពេលដែលសម្ព័ន្ធមិត្តអង្គការណាតូធំៗបំផុតចំនួន១០ រួមមាន សហរដ្ឋអាមេរិក អង់គ្លេស និងបារាំងជាដើមបានដាក់ពង្រាយទាហាន នាវា និងយន្តហោះចម្បាំងបន្ថែមទៀតទៅកាន់តំបន់អឺរ៉ុបខាងកើត និងដាក់កងទ័ពប្រចាំការបន្ថែមទៀត សម្ព័ន្ធមិត្តទាំងអស់ក៏ត្រូវតែពិចារណាពីរបៀបប្រឈមមុខនឹងស្ថានភាពសន្តិសុខថ្មីនៅអឺរ៉ុបក្នុងរយៈពេលមធ្យមផងដែរ។
គួររំលឹកថា កាលពីថ្ងៃទី២៧ ខែកុម្ភៈប្រធានាធិបតីរុស្ស៊ី លោក វ្ល៉ាឌីមៀ ពូទីន បានដាក់កងកម្លាំងនុយក្លេអ៊ែររបស់ខ្លួនឱ្យប្រុងជើងការខ្ពស់ ហើយមីស៊ីលរបស់រុស្ស៊ីបានវាយប្រហារមូលដ្ឋានអ៊ុយក្រែននៅជិតព្រំដែនប្រទេសប៉ូឡូញ ដែលជាសមាជិកណាតូកាលពីថ្ងៃទី១៣ ខែមីនា ដែលជាការឈ្លានពានមួយជិតដល់មាត់ទ្វាររបស់អង្គការណាតូ។
ជុំវិញសង្គ្រាមដែលកំពុងឆាបឆេះនៅអ៊ុយក្រែននេះ លោក ចារ៉ូស្លេវ កាស៊ីនស្គី មេដឹកនាំគណបក្សកំពុងកាន់អំណាចនៅប្រទេសប៉ូឡូញ និងមេដឹកនាំប្រទេសស្លូវ៉ាគី និងសាធារណរដ្ឋឆេកបានបំពេញទស្សនកិច្ចនៅប្រទេសអ៊ុយក្រែន កាលពីថ្ងៃអង្គារម្សិលមិញនេះ ដោយពួកគេបានស្នើសុំឱ្យមានបេសកកម្មរក្សាសន្តិភាពនៅក្នុងប្រទេសអ៊ុយក្រែន ក្រោយពីបានជួបមេដឹកនាំអ៊ុយក្រែនលោក ហ្សេឡិនស្គី។
លោក កាស៊ីនស្គី មេដឹកនាំគណបក្សកំពុងកាន់អំណាចនៅប្រទេសប៉ូឡូញ បានប្រាប់សន្និសីទកាសែតថា លោកគិតថា វាចាំបាច់ណាស់ដែលត្រូវមានបេសកកម្មសន្តិភាពមួយ គឺអង្គការណាតូ និងអាចពង្រីករចនាសម្ព័ន្ធអន្តរជាតិកាន់តែធំទូលាយ ប៉ុន្តែបេសកកម្មនោះ គឺអាចការពារខ្លួនឯងនៅពេលកំពុងធ្វើប្រតិបត្តិការនៅលើទឹកដីប្រទេសអ៊ុយក្រែន៕អត្ថបទ៖ សុខ ជា
None
