កូវីដ១៩៖ជាសះស្បើយម្នាក់និងរកឃើញករណីថ្មី១៣នាក់

តាមរយៈសេចក្តីប្រកាសព័ត៌មានរបស់ក្រសួងសុខាភិបាល នៅព្រឹកថ្ងៃទី១៤មករាឆ្នាំ២០២១នេះបានឲ្យដឹងថា ពលករខ្មែរទាំង៨នាក់ដែលរកឃើញវិជ្ជមានកូវីដ១៩នោះ មានស្រ្តី៦នាក់ ប្រុស២នាក់ ក្នុងនោះ៧នាក់ត្រូវបានដាក់ឲ្យសម្រាកព្យាបាលនៅពេទ្យបង្អែកខេត្តបន្ទាយមានជ័យ និងម្នាក់ទៀតនៅពេទ្យបង្អែកខេត្តបាត់ដំបង។

ដោយឡែក អ្នកធ្វើដំណើរចូលមកកម្ពុជាដែលរកឃើញថាមានផ្ទុកកូវីដ១៩ មាន២នាក់ជាជនខ្មែរមកពីសហរដ្ឋអាមេរិក ២នាក់ជនជាតិឥណ្ឌូណេស៊ីមកពីប្រទេសឥណ្ឌូណេស៊ី និងម្នាក់ចុងក្រោយជាជនជាតិជប៉ុនមកពីប្រទេសជប៉ុន។ បច្ចុប្បន្នអ្នកទាំង៥ត្រូវបានដាក់អោយសម្រាកព្យាបាលនៅ មជ្ឈមណ្ឌលជាតិកំចាត់រោគរបេង និងហង់សិន រាជធានីភ្នំពេញ។

ក្រសួងបានគូសបញ្ជាក់បន្ថែមថា អ្នកដំណើរដែលនៅលើជើងហោះហើរជាមួយអ្នកជំងឺទាំង៥ត្រូវបានដាក់ឲ្យធ្វើចត្តាឡីស័កនៅតាមមណ្ឌលចត្តាឡីស័ក និងសណ្ឋាគារនានាក្នុងក្រុងភ្នំពេញ។

ចំណែកឯអ្នកជាសះស្បើយ​ម្នាក់ គឺជាពលករដែលបានធ្វើដំណើរមកពីប្រទេសថៃ បច្ចុប្បន្នបានអនុញ្ញាតឲ្យចេញពីមន្ទីរពេទ្យបង្អែកខេត្តប៉ៃលិនហើយ។

គួរកត់សម្គាល់ដែរថា ពលករ​ខ្មែរដែល​មក​ពី​ប្រទេស​ថៃ រក​ឃើញថា​បាន​ឆ្លង​ជំងឺ​កូ​វីដ គិត​មកដល់​ព្រឹក​ថ្ងៃ​ព្រហស្បតិ៍​នេះ​សរុប​មាន​ចំនួន៤១នាក់។

សូមបញ្ជាក់​ថា គិត​មកដល់​ព្រឹក​ថ្ងៃទី១៤ ខែមករា ឆ្នាំ២០២១ កម្ពុជាបាន​រក​ឃើញ​អ្នក​ឆ្លង​ជំងឺ​កូ​វីដ១៩ ឡើង​ដល់៤១១នាក់ ក្នុង​នោះ​បាន​ព្យាបាល​ជាសះស្បើយ​ចំនួន៣៧៧នាក់ និង​កំពុង​សម្រាក​ព្យាបាល​ចំនួន៣៤នាក់​៕