កិច្ចសហប្រតិបត្តិការថ្មីរវាង GIZ ICONE និង CADT ដើម្បីជំរុញឌីជីថលភាវូបនីយកម្មនៅភាគពាយ័ព្យនៃប្រទេសកម្ពុជា

កាលពីថ្ងៃទី ៥ ខែមេសា ឆ្នាំ២០២២ បណ្ឌិត Stefan Hanselmann នាយក GIZ ICONE និងឯកឧត្តម បណ្ឌិត សំ សិទ្ធិសេរី ប្រធានវិទ្យាស្ថានស្រាវជ្រាវនិងនវានុវត្តន៍ឌីជីថល (IDRI) នៃ​បណ្ឌិត្យសភា បច្ចេកវិទ្យាឌីជីថលកម្ពុជា(CADT) បានចុះហត្ថលេខាលើកិច្ចព្រមព្រៀង សហប្រតិបត្តិការ ដើម្បីគាំទ្រ សហគ្រាសធុនតូចនិងមធ្យមនៅតំបន់ភាគពាយ័ព្យនៃ​ប្រទេសកម្ពុជា ជាពិសេស នៅតាមបណ្តាខេត្ត ដូចជា សៀមរាប បាត់ដំបង និងបន្ទាយមានជ័យ ដើម្បីបង្កើនផលិតភាព និងជំរុញដំណើរឌីជីថល របស់ពួកគេ។

វិទ្យាស្ថានស្រាវជ្រាវ និងនវានុវត្តន៍ឌីជីថល (IDRI) គឺជាវិទ្យាស្ថានដែលផ្តោត ក្នុងការលើកកម្ពស់ ការស្រាវជ្រាវ និងអភិវឌ្ឍន៍បច្ចេកវិទ្យាឌីជីថល បំណងក្នុងការផ្ទេរបច្ចេកវិទ្យា ទៅកាន់សហគ្រាស តាមរយៈកម្មវិធីអភិវឌ្ឍន៍អាជីវកម្មរបស់ពួកគេ។ កម្មវិធី GIZ ICONE ដែលទើបដាក់ឱ្យដំណើរការថ្មី ត្រូវបានអនុវត្តដោយ Gesellschaft für Internationale Zusammenarbeit (GIZ) ក្នុងនាមតំណាងក្រសួង សហព័ន្ធអាល្លឺម៉ង់ សម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (BMZ) សម្រាប់ការលើកកម្ពស់ ការប្រកួតប្រជែងសហគ្រាសជាតិដោយការកែលម្អផលិតភាព ប្រសិទ្ធភាព និងសមត្ថភាពច្នៃប្រឌិត។ ដោយការចែករំលែកចក្ខុវិស័យនៃការលើកកម្ពស់បច្ចេកវិទ្យាឌីជីថលលើសពីប្រព័ន្ធអេកូឡូស៊ី IT ដ៏រស់រវើកក្នុងទីក្រុងភ្នំពេញ ភាគីទាំងពីរបានកំណត់សកម្មភាព ដើម្បីធ្វើការរួមគ្នាដើម្បី បង្រួមព្រំដែន ឌីជីថល និងជំរុញដំណោះស្រាយឌីជីថល ដើម្បីផ្តល់ឱ្យសហគ្រាសនៅក្រៅ តំបន់នៃទីក្រុងភ្នំពេញនូវ ការប្រកួតប្រជែងពេញលេញ។

កិច្ចសហប្រតិបត្តិការនេះរួមមានការដាក់ឱ្យប្រើប្រាស់នូវកម្មវិធីឌីជីថល និងដំណោះស្រាយ ការបណ្តុះបណ្តាលជំនាញឌីជីថល និងព្រឹត្តិការណ៍ផ្លាស់ប្តូរចំណេះដឹងនៅរាជធានីភ្នំពេញ សៀមរាប បាត់ដំបង និងបន្ទាយមានជ័យ។ លើសពីនេះ កិច្ចសហប្រតិបត្តិការ GIZ ICONE និង IDRI នឹងលើកកម្ពស់ ការច្នៃប្រឌិតដែលជំរុញដោយទិន្នន័យក្នុងឧស្សាហកម្មកែច្នៃ និងផលិតកម្ម ដើម្បីបង្កើតបរិយាកាស ដែលអាចគាំទ្រដល់ដំណើររបស់ប្រទេសកម្ពុជាឆ្ពោះ ទៅរកសេដ្ឋកិច្ចទំនើប និងចម្រុះដោយប្រើប្រាស់ ដំណោះស្រាយឧស្សាហកម្ម 4.0 ។ 

នេះរួមបញ្ចូលទាំងកម្មវិធីកម្មសិក្សាដែលបានរចនាថ្មីសម្រាប់និស្សិតឆ្នើមរបស់ CADT ទៅកាន់ក្រុមហ៊ុន ដែលបានជ្រើសរើសនៅតាមបណ្តាខេត្តគោលដៅ។ កិច្ចសហប្រតិបត្តិការ  នេះក៏រួមបញ្ចូលផងដែរនូវ ការអភិវឌ្ឍន៍សមត្ថភាពរបស់មន្ត្រីរដ្ឋាភិបាល និងតួអង្គពាក់ព័ន្ធ ផ្សេងទៀត ដើម្បីជំរុញប្រព័ន្ធអេកូឡូស៊ី ប្រកបដោយនិរន្តរភាពសម្រាប់ការប្រើប្រាស់ឧបករណ៍ និងបច្ចេកវិទ្យាឌីជីថល ដែលបង្កើនសមត្ថភាព ជម្រុញដល់ទីផ្សាររបស់សហគ្រាស នៅកម្ពុជា។

ឯកឧត្តមបណ្ឌិត សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកម្ពុជា (CADT)  បានគូស បញ្ជាក់ថា វាជាពេលវេលាដ៏ត្រឹមត្រូវក្នុងការពង្រីកសកម្មភាព CADT ទៅកាន់ខេត្តជា ច្រើនទៀត និងពាំនាំ យកដំណោះស្រាយឌីជីថល និងភាពប៉ិនប្រសប់ ដល់ក្រុមហ៊ុននានានៅ ក្រៅរាជធានីភ្នំពេញ។ ឯកឧត្តម បណ្ឌិតបន្តសង្កត់ធ្ងន់ថា កិច្ចសហប្រតិបត្តិការក្នុងចំណោមភាគីពាក់ព័ន្ធ នៅក្នុងប្រព័ន្ធអេកូឡូស៊ី គឺចាំបាច់ ដើម្បីជំរុញដំណោះស្រាយបច្ចេកវិទ្យារបស់កម្ពុជាដែលត្រូវបានបង្កើតឡើង និងសម្រាប់ប្រជាជនកម្ពុជា ដើម្បីឱ្យជីវិតកាន់តែប្រសើរឡើង ក្នុងការអប់រំ និងអាជីវកម្មលើសពីរាជធានីភ្នំពេញ។

បណ្ឌិត Stefan Hanselmann គូសបញ្ជាក់នៅក្នុងសុន្ទរកថាបើកកម្មវិធី របស់លោក ថា ការបើកគម្លាត ឌីជីថលរវាងទីក្រុងភ្នំពេញ និងតាមបណ្តាខេត្តដែលកំពុងវិវឌ្ឍន៍សេដ្ឋកិច្ច គឺជាកត្តាសំខាន់បំផុតសម្រាប់ ចក្ខុវិស័យរយៈពេលវែងរបស់កម្ពុជាក្នុងការប្រែក្លាយជាសេដ្ឋកិច្ចរឹងមាំ។ នេះរួមបញ្ចូលទាំងការជំរុញឱ្យ មានការបង្រួមបន្ថែមទៀតនូវគម្លាតយេនឌ័រឌីជីថល និងការពង្រឹងអំណាចនៃអាជីវកម្មដែលគ្រប់គ្រង ដោយស្ត្រី។

បណ្ឌិត Hanselmann បន្តដោយសង្កត់ធ្ងន់ថា ការដែលមានការិយាល័យរបស់ពួកគេ នៅតាមបណ្តាខេត្ត និង CADT បន្ថែមទីស្នាក់ការនវានុវត្តន៍របស់ពួកគេនៅក្នុងទីក្រុងភ្នំពេញ កិច្ចសហប្រតិបត្តិការទាំងនេះ ត្រូវបានរៀបចំឡើង ដើម្បីបង្រួមគម្លាតឌីជីថលតាមរយៈការផ្សារភ្ជាប់អស់ទាំងនេះ។

លោក Robert Hoer ទីប្រឹក្សា GIZ និងជាប្រធានផ្នែកនវានុវត្តន៍ និងសហគ្រិនភាពនៅ CADT បានរៀបរាប់ លម្អិតអំពីកម្មវិធីស្វែងរកទេពកោសល្យក្នុងអំឡុងពេលប្រព្រឹត្តកម្មវិធីជាមួយ សិស្សរបស់ CADT ។ យោងតាមលោក Hör កម្មវិធីនេះត្រូវបានបង្កើតឡើងដើម្បី រៀបចំ និស្សិតឆ្នើម នៃ CADT នៅឯសហគ្រាស ជាដៃគូ គោលដៅ ដើម្បីធ្វើការលើគម្រោង ឌីជីថលសម្រាប់រយៈពេលបីខែ។ លោក Hör មានប្រសាសន៍ថា វេទិកាផ្គូផ្គងនេះនឹង មិនត្រឹមតែបង្កើនភាពរឹងមាំផ្នែកឌីជីថល របស់ក្រុមហ៊ុន ប៉ុណ្ណោះទេ ប៉ុន្តែថែមទាំងការយល់ដឹង ផ្តល់ដល់និស្សិតអំពីគម្លាតឌីជីថលរវាងក្រុមហ៊ុននៅទីក្រុងភ្នំពេញ និងតំបន់ផ្សេងទៀត ផងដែរ៕