បន្ទាប់ពីបានចូលកាន់តំណែង កាលពីឆ្នាំមុននាយកប្រតិបត្តិក្រុមហ៊ុន Nokia លោ Pekka Lundmark បានបង្កើតឲ្យមានការផ្លាស់ប្ដូរ ក្នុងការងើបឡើងវិញពីភាពទន់ខ្សោយនៃ ការដឹកនាំរបស់ក្រុមហ៊ុននាពេលកន្លងទៅ ដែលធ្វើឲ្យប៉ះពាល់ដល់មហិច្ឆតាបង្កើត ប្រព័ន្ធ 5G និងធ្វើឲ្យភាគហ៊ុនរបស់ក្រុមហ៊ុនបានដាំក្បាលចុះខ្លាំង។
លោក Lundmark បានប្រកាសនូវយុទ្ធសាស្ត្រថ្មីកាលពីខែតុលាកន្លងទៅថា ដោយស្ថិតនៅក្រោមការគ្រប់គ្រងក្រុមហ៊ុន Nokia នឹងមានក្រុមអាជីវកម្មចំនួន ៤ ហើយក្រុមហ៊ុននឹងធ្វើយ៉ាងណា សម្រេចឲ្យបាននូវភាពឈានមុខគេក្នុងបណ្ដាញ 5G។
នាយកប្រតិបត្តិក្រុមហ៊ុន Nokia បានរំពឹងថា នឹងបានបង្ហាញពីគម្រោងយុទ្ធសាស្ត្ររយៈពេលវែងរបស់គាត់ និងពិភាក្សាអំពីគម្រោងសកម្មភាព និងកំណត់នូវគោលដៅហិរញ្ញវត្ថុ នៅក្នុងសប្ដាហ៍នេះ។
អត្ថបទគួរអាន
ក្រុមហ៊ុននេះ បានបញ្ជាក់នៅក្នុងសេចក្ដីថ្លែការណ៍ថា នឹងមានទឹកប្រាក់ប្រមាណជាង៧០០លានដុល្លារសម្រាប់ការរៀបចំហេដ្ឋារចនាសម្ព័ន្ធឡើងវិញ និងកិច្ចការផ្សេងទៀតសម្រាប់ផែនការនៅឆ្នាំ២០២៣។ ទោះយ៉ាងណា ការសម្រេចចិត្តនេះ អាចនឹងធ្វើឲ្យប៉ះពាល់ដល់ការងាររបស់បុគ្គលិកមួយចំនួនផងដែរ។ ក្រុមហ៊ុន Nokia ថ្មីៗនេះ មានបុគ្គលិក៩ម៉ឺននាក់ ហើយមានការងាររាប់ពាន់កន្លែងត្រូវបានកាត់បន្ថយផងដែរ បន្ទាប់ពីក្រុមហ៊ុននេះ បានទិញយកក្រុមហ៊ុន អាលខេតតែល ឡូសិន (Alcattel-Lucent) កាលពីឆ្នាំ២០១៦។
គម្រោងយុទ្ធសាស្ត្រថ្មីរបស់ក្រុមហ៊ុន Nokia នេះ ទំនងជាអាចប៉ះពាល់ដល់ការងារបុគ្គលិកនៅក្នុងប្រទេសជាច្រើន ពិសេសនៅអឺរ៉ុបតែម្ដង។ ប្រទេសបារាំងកាលពីឆ្នាំមុន Nokia បានកាត់បន្ថយការងារបុគ្គលិករាប់ពាន់នាក់ ហើយនេះមិនទាន់រាប់បញ្ចូលនូវគម្រោងរៀបចំរចនាសម្ព័ន្ធឡើងវិញថ្មីនេះនៅឡើយទេ។
ក្រុមហ៊ុន Nokia មានផែនការនឹងបង្កើនការវិនិយោគ នៅក្នុងការស្រាវជ្រាវ និងអភិវឌ្ឍន៍ និងអនាគតសមត្ថភាព 5G, ប្រព័ន្ធផ្ទុកទិន្នន័យ Cloud និង ហេដ្ឋារចនាសម្ព័ន្ធឌីជីថលជាដើម។
សូមបញ្ជាក់ថា នៅក្នុងខែកុម្ភៈកន្លងទៅនេះ ក្រុមហ៊ុន Nokia បានព្យាករពីប្រាក់ចំណូលនៅឆ្នាំ២០២១របស់ខ្លួនថាអាចនឹងធ្លាក់ចុះចន្លោះពី ២៥ ទៅ២៦ពាន់លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
