គម្រោងទីក្រុងឆ្លាតវៃដូចដែលបានរៀបរាប់លម្អិតក្នុងឯកសារផ្លូវការមួយចុះហត្ថលេខាដោយអនុរដ្ឋមន្ត្រីក្រសួងធនធានធម្មជាតិ និងបរិស្ថានវៀតណាម លោក ឡេ កុង ថាញ់ (Le Cong Thanh) កាលពីថ្ងៃទី៥ ខែមីនា ឆ្នាំ២០២៤ នេះ បានទទួលការអនុម័តលើការវាយតម្លៃផលប៉ះពាល់បរិស្ថាន (EIA) រួចហើយ។
អភិវឌ្ឍន៍ដោយក្រុមហ៊ុនបណ្តាក់ទុនរួមគ្នា ដែលបង្កើតឡើងរវាងក្រុមហ៊ុនអភិវឌ្ឍន៍អចលនទ្រព្យ BRG និងក្រុមហ៊ុនសាជីវកម្មជប៉ុន Sumitomo គម្រោងនេះ ត្រូវបានចាប់ផ្តើមនៅខែវិច្ឆិកា ឆ្នាំ២០២៣ ហើយត្រូវបានរំពឹងថា នឹងចំណាយអស់៤,២ពាន់លានដុល្លារអាម៉េរិក។ គម្រោងទីក្រុងឆ្លាតវៃនេះ នឹងត្រូវសាងសង់ឡើងជា៥ដំណាក់កាលក្នុងរយៈពេល៩ឆ្នាំ។
ដំណាក់កាលទី១ ដែលគ្របដណ្ដប់២៧%នៃផ្ទៃដី២៧០ហិកតា នឹងមានអគារអាផាតម៉ិនកម្ពស់៤៥ជាន់ចំនួន៩អគារ អគារផាតម៉ិនមួយទៀតកម្ពស់២២ជាន់ ផ្ទះវីឡាចំនួន២៤៧ផ្ទះ Townhouse ចំនួន៦០ សាលាមត្តេយ្យចំនួន៣ សាលាបឋមសិក្សាចំនួន២ និងសាលាអនុវិទ្យាល័យចំនួន២។
ក្នុងដំណាក់កាលដែលនៅសេសសល់ ផ្ទះវីឡា អគារពាណិជ្ជកម្ម និងអគារប្រើប្រាស់ពហុគោលបំណង និងសាលារៀននឹងត្រូវសាងសង់បន្ថែមជាច្រើនទៀតរួមជាមួយគម្រោងសាធារណៈចំនួន១២ ដែលមិនបានបញ្ជាក់ផងដែរ ហើយអគារហិរញ្ញវត្ថុកប់ពពកដែលមានកម្ពស់១០៨ជាន់ ត្រូវបានរំពឹងថា នឹងចាប់ផ្តើមនៅក្នុងដំណាក់កាលចុងក្រោយនៅឆ្នាំ២០៣០-២០៣២ ហើយគម្រោងទីក្រុងឆ្លាតវៃនេះ នឹងសម្រាប់មនុស្សរស់នៅប្រមាណ២ម៉ឺន៥ពាន់នាក់។
ក្រុមហ៊ុន Sumitomo ត្រូវបានបង្កើតឡើងក្នុងប្រទេសជប៉ុន តាំងពីជាង១០០ឆ្នាំមុន ហើយបានឈរជើងនៅក្នុងប្រទេសវៀតណាម តាំងពីឆ្នាំ១៩៩៥ ហើយបានអនុវត្តគម្រោងជាច្រើននៅក្នុងប្រទេសនេះ៕
ដោយៈសរ សុជាតិ
