BookMeBus បង្កើត"ចាប់ហួយចល័ត" ដើម្បីជួយដល់អ្នករងផលប៉ះពាល់ដោយសារកូវីដ១៩
ជាមួយ ‘ចាប់ហួយ ចល័ត’ អ្នកប្រើប្រាស់អាចស្វែងរកទំនិញមួយចំនួន ដែលពួកគាត់ត្រូវការជាប្រចាំ ដោយធ្វើការកុម្មង់ទិញតាមប្រអប់សារលើគេហទំព័រហ្វេសប៊ុក ជាមួយតម្លៃដូចទីផ្សារ។ ពួកគាត់អាចជ្រើសរើសការដឹកជញ្ជូនដល់ផ្ទះក្នុងរយៈពេល ១ម៉ោង ទៅ ២ម៉ោង (គិតថ្លៃដឹក) ឬទទួលការកុម្មង់ថ្ងៃបន្ទាប់ (មិនគិតថ្លៃដឹក)។
ការកុម្មង់នេះពុំមានការកំណត់លើចំនួនទំនិញនោះទេ ព្រោះមានឡានត្រៀមរួចជាស្រេចសម្រាប់ដឹកជញ្ជូនទំនិញច្រើនមុខ ឬធន់ធ្ងន់។ ‘បំពេញតម្រូវការ បង្កើនសុវត្ថិភាព’ ជាគោលបំណងរបស់គម្រោងនេះ ក្នុងការជួយអ្នកប្រើប្រាស់ទាំងអស់រក្សាសុវត្ថិភាព និងនាំយកទីផ្សារនៃទំនិញចម្រុះសម្រាប់តម្រូវការប្រចាំថ្ងៃមកជិតពួកគាត់ជាទីបំផុត។
អត្ថបទទាក់ទង
រីឯផ្នែកអនាម័យ និងសុវត្ថិភាពរបស់អ្នកបើកបរត្រូវបានយកចិត្តទុកដាក់ខ្ពស់ដែលពួកគាត់ម្នាក់ៗទទួលបានសម្ភារៈការពារខ្លួនពេលកំពុងធ្វើការ ពិសេសពួកគាត់ទទួលបានការណែនាំត្រឹមត្រូវលើសុវត្ថិភាពគាត់ផ្ទាល់ និងអតិថិជនពីអ្នកជំនាញផ្នែកសុខភាពត្រឹមត្រូវ។
គម្រោងនេះធ្វើឡើងដោយមានការសហការនិងទុកចិត្តពីដៃគូផ្សេងៗ ដូចជា ក្រុមហ៊ុនដឹកអ្នកដំណើរ ក្រុមហ៊ុនដឹកជញ្ជូន ផ្សារលក់ទំនិញ និងធុរកិច្ចថ្មីក្នុងស្រុក ដែលពួកយើងរួមដៃគ្នាស្វែងរកដំណោះស្រាយដែលអាចជួយបំពេញតម្រូវការគ្នាទៅវិញទៅមក ខណៈដែលបញ្ហាសេដ្ឋកិច្ចមិនមានស្ថិរភាព។ ជាពិសេស គម្រោងនេះជាឱកាសដែលអាចផ្តល់ការងារដល់មនុស្សមួយចំនួន ដែលរងគ្រោះដោយវិបត្តិសេដ្ឋកិច្ចមួយនេះ ជាពិសេសគឺអ្នកបម្រើក្នុងវិស័យទេសចរណ៌ ដើម្បីបន្តការងារ និងផ្គត់ផ្គង់គ្រួសាររបស់គាត់។
គម្រោងនេះនឹងបើកទូលាយសម្រាប់ម្ចាស់អាជីវកម្មដែលចង់ចូលរួមស្វែងរកទីផ្សារបន្ថែម និងដៃគូផ្សេងទៀត ដែលកំពុងទទួលរងគ្រោះផ្នែកសេដ្ឋកិច្ច ព្រោះថា បច្ចេកវិទ្យានិងភាពជាដៃគូនេះ អាចបត់បែនទៅតាមកាលៈទេសៈ និងពង្រីកទៅតាមសមាសភាពរបស់អ្នកចូលរួមបានគ្រប់ពេល។
សម្រាប់ម្ចាស់អាជីវកម្មដែលចង់ស្វែងរកទីផ្សារបន្ថែម ឬចង់ធ្វើជាអ្នកបើកបរសូមធ្វើការទាក់ទងមកកាន់ 010/012 318 316 ពួកយើងនឹងធ្វើការឆ្លើយតប និងជួយតាមសមត្ថភាព។ ដើម្បីស្វែងរកទំនិញនិងកុម្មង់ អ្នកប្រើប្រាស់គ្រាន់តែចូលក្នុងគេហទំព័ររបស់‘ចាប់ហួយ ចល័ត’ ហើយឆ្លើយឆ្លងក្នុងប្រអប់សារជាការស្រេច៕
