Advertisement
ចិន-អាស៊ាន-បច្ចេកវិទ្យា

បណ្ឌិត្យ​សភា​វិទ្យាសាស្ត្រ​ដ៏ធំ​បំផុត​របស់​ចិន ចាប់ដៃគូ​ជាមួយ​ក្រុមហ៊ុន​អាស៊ាន​ ដើម្បីជំរុញ​ការផ្ទេរ​បច្ចេកវិទ្យា


ក្រុមហ៊ុន​ផលិត​ស៊ីម៉ងត៍ធំបំផុត​មួយនៅអាស៊ាន ដែលមាន​ប្រតិបត្តិការនៅកម្ពុជាផងដែរនោះ បាន​ចាប់ដៃគូ​គ្នា​ជាមួយ​វិទ្យាស្ថានវិទ្យាសាស្ត្រ​ឈាន​មុខ​គេ​របស់​​ចិន ដើម្បី​រួម​គ្នា​អភិវឌ្ឍ​និង​ចែករំលែក​ចំណេះដឹង​ផ្នែក​បច្ចេកវិទ្យា​និង​នវានុវត្តន៍ នៅក្នុង​វិស័យ​ចំនួន ៥៖ ទីក្រុងឆ្លាត, AI/Machine Learning និងគ្រឿងយន្ត, សារធាតុគីមី​ដែល​មាន​តម្លៃ​ខ្ពស់, ធុរកិច្ច​ថាមពល​ថ្មី, និង​បិរស្ថាន​និង​និរន្តរភាព។
បណ្ឌិត្យសភា​វិទ្យាសាស្ត្រចិន (CAS) និង​ក្រុមហ៊ុន​ថៃ SCG ចុះ​ហត្ថលេខា​លើ​កិច្ច​ព្រមព្រៀង​ភាព​ជាដៃគូ ដោយ​មាន​វត្តមាន​ជា​សាក្សី​ពី​នាយករដ្ឋមន្ត្រី​នៃ​ប្រទេស​ទាំងពីរ នាថ្ងៃទី៥ វិច្ឆិកា ២០១៩ នៅទីក្រុង​បាងកក ប្រទេសថៃ។
ដោយ
Advertisement

នេះ​បើ​យោងតាម​ប្រកាស​ព័ត៌មាន​របស់​ក្រុមហ៊ុន ផ្សព្វផ្សាយ​កាលពីពេលថ្មីៗកន្លងទៅនេះ។

ក្រុមហ៊ុន​ SCG និង​បណ្ឌិត្យ​សភា​វិទ្យាសាស្ត្រ​ចិន (CAS) រួមគ្នា​បង្កើត​មជ្ឈមណ្ឌល​សហប្រតិបត្តិការ​នវានុវត្តន៍ (SCG-CAS ICCB) ដំបូងគេ​បង្អស់​នៅទីក្រុងបាងកក ប្រទេសថៃ ដើម្បី​ជំរុញ​ការផ្ទេរបច្ចេកវិទ្យានិងការផ្ដល់អាជ្ញាប័ណ្ណ, ការស្រាវជ្រាវនិងបង្កើតនវានុវត្តន៍រួមគ្នា, ការអភិវឌ្ឍធនធានមនុស្ស និងវិនិយោគរួមគ្នា ក្នុងគោលដៅជំរុញនវានុវត្តន៍ និង​បង្កើនភាពប្រកួតប្រជែង​នៅក្នុង​វិស័យ​សេវាកម្ម​និង​ឧស្សាហកម្ម រវាង​ប្រទេស​ថៃ​និង​ប្រទេស​ចិន ដើម្បី​ឆ្លើយតប​ទៅនឹង​តម្រូវការ​របស់​ទីផ្សារ​និង​និន្នាការ​អនាគត។

មជ្ឈមណ្ឌល SCG-CAS ICCB នេះ បោះទុន​​វិនិយោគ​ជំហានដំបូង សរុប​ជាង ១០០​លាន​យ័ន (ប្រហែលជាង ១៤លានដុល្លារអាមេរិក) ហើយ​គម្រោង​នេះ គឺ​ស្របតាម​ទិសដៅ​នៃ​គំនិត​ផ្ដួចផ្ដើម​ខ្សែក្រវាត់ និង​ផ្លូវ (BRI) របស់​ប្រទេសចិន។ បើតាម​ក្រុមហ៊ុន SCG ថវិកា​វិនិយោគ​នេះ នឹង​ចំណាយ​ទៅ​លើ​​អ្នកស្រាវជ្រាវ បច្ចេកវិទ្យា ទីកន្លែង និង​ឧបករណ៍​ពិសោធន៍ ជាមួយ​នឹង​ការ​រំពឹង​ប្រាក់​ចំណេញ​មក​វិញ ពី​ការ​បង្កើត​នវានុវត្តន៍។ 

CAS និង SCG ចុះ​កិច្ច​ព្រមព្រៀង​សហការគ្នា​លើ​ការ​ផ្ទេរ​បច្ចេកវិទ្យា។

កិច្ច​ព្រមព្រៀង​ភាពជាដៃគូ​រវាង​បណ្ឌិត្យសភា​វិទ្យាសាស្ត្រ​ចិន (CAS) និង SCG ​ដែល​ជា​ក្រុមហ៊ុន​ស៊ីម៉ងត៍ថៃ​ដ៏ធំបំផុត​មួយ​នេះ ត្រូវ​បាន​ចុះ​ហត្ថលេខាកាលពីថ្ងៃទី៥ វិច្ឆិកា ២០១៩ ដោយ​ភាគីទាំងពីរ ក្រោម​វត្តមាន​ជាសាក្សី​របស់​​នាយករដ្ឋមន្ត្រី​ចិន លោក លី កឺឈៀង និង​នាយករដ្ឋមន្ត្រីថៃ លោក ប្រាយុត ចាន់អូចា។ 

លោក Roongrote Ransiyopash ប្រធាន និងជាអគ្គនាយកក្រុមហ៊ុន SCG បាន​និយាយថា ភាពជាដៃគូនេះនឹង​ពូន​ផ្ដុំ​ឥទ្ធិពល​នៃ​បច្ចេកវិទ្យា​និង​នវានុវត្តន៍​របស់​ស្ថាប័ន​ទាំង​ពីរ​នេះ ដែល​នឹង​ចែក​រំលែក​និង​បំពេញ​បន្ថែម​គ្នា​លើ​ផ្នែក​ធនធាន និង​បង្កើត​​​ជា​ប្រព័ន្ធ​អេកូឡូស៊ី​អាជីវកម្ម​ទូលំ​ទូលាយ ដើម្បីអភិវឌ្ឍ​ផលិតផល​និង​សេវាកម្ម​ដែល​មាន​នវានុវត្តន៍ ដើម្បី​បំពេញ​ទៅតាម​សេចក្ដី​ត្រូវការ​ដ៏​សម្បូរ​បែប​របស់​អតិថិជន ឲ្យ​បាន​កាន់​តែ​លឿន​រហ័ស និង​មាន​ប្រសិទ្ធផល​ថែម​ទៀត។

លោក​អគ្គនាយក​ SCG និយាយដូច្នេះថា​ ៖ «ភាព​ជាដៃគូ​នេះ នឹង​លើក​កម្ពស់​ភាព​ប្រកួត​ប្រជែង និង​កសាង​កំណើន​ដែល​មាន​និរន្តរភាព សម្រាប់​ធុរកិច្ច​ស្នូល​របស់ SCG ព្រមទាំង​អនុញ្ញាត​ឲ្យ SCG អាច​រុករក​ឱកាស​ធុរកិច្ច​ថ្មីៗ ដែល​នឹង​ពង្រឹង​ទំនាក់​ទំនង​រវាង​ប្រទេស​ថៃ​និង​ប្រទេស​ចិន បន្ថែម​ទៀត»។ 

CAS និង SCG សហការគ្នាបង្កើត​ មជ្ឈមណ្ឌល​សហប្រតិបត្តិការ​នវានុវត្តន៍ ប្រចាំក្រុង​បាងកក (Innovation Cooperation Center 'Bangkok')។

លោក​ Jiang Biao នាយក​មជ្ឈមណ្ឌល​សហប្រតិបត្តិការ​នវានុវត្តន៍ CAS (ប្រចាំ​ក្រុង​បាងកក) បាន​ឲ្យ​ដឹង​ថា CAS ICCB គឺ​ជា​សាខាមួយ​ក្នុង​ចំណោម​សាខា​ក្រៅ​ប្រទេស​ចំនួន ៩​របស់ CAS ដែល​ដើរ​តួនាទី​សំខាន់​នៅ​ក្នុង​ការ​ស្វែងរក​និង​បង្កើត​ភាព​ជាដៃគូ​ជាមួយ​អង្គការ​ឈាន​មុខ​គេ​នានា នៅ​ក្រៅ​ប្រទេស ដើម្បី​បង្ហាញ​ពី​ការងារ​វិទ្យាសាស្ត្រ​របស់ CAS។ 

CAS មាន​វិទ្យាស្ថានស្រាវជ្រាវជាង ១០០កន្លែង និងមានអ្នកស្រាវជ្រាវនិងសមាជិកក្រុម សរុបប្រមាណ ៧០.០០០នាក់ ព្រមទាំងមានបណ្ដាញអ្នកស្រាវជ្រាវជាន់ខ្ពស់ ៨០០នាក់ និងសាកលវិទ្យាល័យជាដៃគូសហការចំនួន ៣។ 

បើតាមអគ្គនាយក SCG លោក Roongrote ភាពជាដៃគូ​ CAS-SCG នេះ ផ្ដោតសំខាន់ទៅលើ​ការ​ផ្ទេរ​បច្ចេកវិទ្យា​និង​នវានុវត្តន៍ ដើម្បី​ផ្ដល់​ប្រយោជន៍​ដល់​វិស័យ​សេវាកម្ម​និង​ឧស្សាហកម្ម​របស់​ប្រទេសថៃ និង​ប្រទេសចិន។ 

លោកអគ្គនាយក​​ បន្តថា SCG រំពឹងថា ផលិតផល​ពាណិជ្ជកម្ម​ពី​មជ្ឈមណ្ឌល​នវានុវត្តន៍មួយនេះ នឹង​អាច​បញ្ចេញទៅ​ទីផ្សារ​ក្នុង​រយៈពេលមួយឆ្នាំ ឬពីរឆ្នាំ៕

Advertisement
CAS និង SCG សហការគ្នាបង្កើត​ មជ្ឈមណ្ឌល​សហប្រតិបត្តិការ​នវានុវត្តន៍ ប្រចាំក្រុង​បាងកក (Innovation Cooperation Center 'Bangkok')។



អត្ថបទបន្ទាប់


ឧកញ៉ា សៀ ឫទ្ធី៖ បើ​ខ្ចី​លុយធនាគារ យក​ទៅទិញ​ដីទុកចោល កុំ​ឲ្យសោះ!

ព័ត៌មាន
ប៉ុន្មានឆ្នាំ​ចុងក្រោយ​នេះ គេ​ឃើញ​ការទិញ​លក់​អចលនទ្រព្យ ដីធ្លី ផ្ទះសម្បែង មានសន្ទុះ​កើនឡើង​យ៉ាងខ្លាំង​។ អ្នក​ខ្លះ ទិញ​ដី​ពុះ​ឡូត៍​លក់ ...

សម្រាប់​អ្នក​សារព័ត៌មាន​​​នៅ​ខេត្ត​ព្រះសីហនុ ពួកគាត់​ត្រូវ​រួម​​គ្នា​ដូច​«សម្ល​កំពឹស» ដើម្បី​ឈ្នះ​ការ​គំរាម​កំហែង​និង​ការយាយី​ផ្លូវ​ច្បាប់

ព័ត៌មាន
ក្រុម​អ្នកសារព័ត៌មាន​មូលដ្ឋាន​នៅ​ខេត្ត​ព្រះសីហនុ បាន​និយាយ​នៅ​ក្នុង​កិច្ច​ពិភាក្សា​នៃ​សិក្ខាសាលា​មួយ​ កាលពីពេលថ្មីៗនេះ​ ថា ពួកគាត់​ទ...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ