ស្របពេលដែលស្ថានការពិភពលោកកំពុងតែតានតឹងខ្លាំងពិសេសនៅតំបន់អឺរ៉ុបខាងកើត មជ្ឈិមបូព៌ា និងតំបន់សមុទ្រចិនខាងត្បូង ប្រទេសកូរ៉េខាងជើងឯណោះវិញ បានបន្ដបាញ់បង្អួតមីស៊ីលរបស់ខ្លួនជាបន្តបន្ទាប់។ ជាក់ស្ដែង តាមការរាយការណ៍ពីយោធាកូរ៉េខាងត្បូង នៅថ្ងៃអង្គារសប្ដាហ៍នេះ កូរ៉េខាងជើងបានបាញ់សាកល្បងមីស៊ីលជាថ្មីទៀតហើយ។
ប្រសិនបើការបាញ់សាកល្បងលើកនេះត្រូវបានបញ្ជាក់ដោយក្រុងព្យុងយ៉ាងពិតមែន វាគឺជាលើកទី៥ហើយ ដែលកូរ៉េខាងជើងបានបាញ់សាកល្បងមីស៊ីលរបស់ខ្លួនស្របទៅតាមការតាំងចិត្តរបស់ប្រមុខដឹកនាំលោកគីម ជុងអ៊ុន ដែលបានសច្ចាថាលោកនឹងបន្តអភិវឌ្ឍបច្ចេកវិទ្យាយោធាឲ្យបានខ្លាំងជាងនេះ។
ការសាកល្បងមីស៊ីលកូរ៉េខាងជើងនៅដើមឆ្នាំ២០២២នេះ ត្រូវបានគេចាត់ទុកថា ជាសកម្មភាពដ៏ធំបំផុតសម្រាប់ព្យុងយ៉ាង ចាប់តាំងពីការសាកល្បងមីស៊ីលរំលងទ្វីបចាប់ពីឆ្នាំ២០១៩មក។ អង្គលេខាធិការអង្គការសហប្រជាជាតិបានសម្តែងការព្រួយបារម្ភ ចំពោះសកម្មភាពទាំងនេះ ហើយបានអំពាវនាវឲ្យភាគីពាក់ព័ន្ធទាំងអស់ ពិសេសបងប្អូនកូរ៉េទាំងពីរវិលចូលតុចរចាឡើងវិញ។
អត្ថបទទាក់ទង
បើតាមអ្នកជំនាញផ្នែកយុទ្ធសាស្ត្ររបស់យោធាកូរ៉េខាងត្បូងបានឲ្យដឹងថា ការបន្តសាកល្បងមីស៊ីលម្តងហើយម្តងទៀតពីរបបក្រុងព្យុងយ៉ាង គឺជាការព្យាយាមបន្ថែមកម្តៅ និងភាពតានតឹងទៅក្នុងតំបន់ឧបទ្វីបកូរ៉េ ដើម្បីសាកល្បងភាពអត់ធ្មត់របស់រដ្ឋបាលលោក ចូ បៃឌិន ធ្វើយ៉ាងណាជំរុញឲ្យមានការផ្លាស់ប្តូរគោលជំហរមកកាន់កូរ៉េខាងជើង។
ជាក់ស្តែង ព្យុងយ៉ាងព្យាយាមដាក់លក្ខខណ្ឌ ឲ្យសហរដ្ឋអាមេរិកដកទណ្ឌកម្មទាំងឡាយមកលើខ្លួន និងបញ្ឈប់ការធ្វើសមយុទ្ធយោធា ជាថ្នូរនឹងការឈប់សាកល្បងអាវុធមីស៊ីលតទៅទៀត។ យ៉ាងណាមិញ ភាពជាប់គាំងនៅតែបន្តកើតមានរវាងវ៉ាស៊ីតោន និងព្យុងយ៉ាង ដោយហេតុថា បច្ចុប្បន្នសហរដ្ឋអាមេរិក ពិសេសក្រោមរដ្ឋបាលរបសោ់ក ចូ បៃឌិន ហាក់មិនសូវបង្ហាញការយកចិត្តទុកដាក់ប៉ុន្មានឡើយមកលើបញ្ហាក្រុងព្យុងយ៉ាង ។
ជារឿយៗ កូរ៉េខាងជើងក៏ទទួលបានការជួយជ្រោមជ្រែងខ្លះដែរ ពីប្រទេសចិន និងរុស្សី ដែលប្រទេសទាំងពីរនេះ បានជំរុញឲ្យក្រុមប្រឹក្សាសន្តិសុខអង្គការសហប្រជាជាតិ ដកការហាមឃាត់ការនាំចេញផលិតផលពីកូរ៉េខាងជើង ដូចជាសម្លៀកនបំពាក់ គ្រឿងសមុទ្រ និងវាយនភណ្ឌជាដើម។
សូមជម្រាបថា មីស៊ីលដែលកូរ៉េខាងជើងបានសាកល្បងនៅថ្ងៃអង្គារនេះ ជាប្រភេទមីស៊ីលដែលអាចហោះក្នុងកម្រិតរយៈកម្ពស់ទាប ដើម្បីគេចផុតពីការចាប់បាននូវរាដា ហើយវាមិនស្ថិតក្រោមការហាមឃាត់របស់អង្គការសហប្រជាជាតិឡើយ។ ទោះបីជាប្រភេទមីស៊ីលដែលមិនសូវគំរាមកំហែងខ្លាំង តែអ្នកជំនាញអះអាងថា នេះជាអ្វីដែលព្យុងយ៉ាងកំពុងធ្វើ និងអាចបន្តអភិវឌ្ឍឲ្យបានប្រសើរបន្ថែមទៀតនាពេលអនាគត៕None
