ជាក់ស្តែង ការសាកល្បងនៅថ្ងៃពុធនេះ ត្រូវបានភាគីក្រុងសេអ៊ូល ប៉ាន់ស្មានថា ជាប្រភេទមីស៊ីលផ្លោងឆ្លងទ្វីប ដែលអាចបំពាក់ក្បាលគ្រាប់នុយក្លេអ៊ែរបានថែមទៀតផង។ យ៉ាងណាក៏ដោយ ការសាកល្បងលើកនេះត្រូវបានគេប៉ាន់ស្មានថា ធ្វើឡើងក្រោមហេតុផលចំនួនពីរ ក្នុងនោះទីមួយគឺព្យុងយ៉ាង ផ្គើននឹងអាមេរិកដែលបានស្នើក្រុមប្រឹក្សាសន្តិសុខអង្គការសហប្រជាជាតិបោះឆ្នោតបន្ថែមទណ្ឌកម្ម និងទីពីរធ្វើឡើងប្រមាណ១សប្តាហ៍ មុនពេលប្រធានាធិបតីថ្មីរបស់កូរ៉េខាងត្បូង ប្រារព្ធពិធីចូលកាន់អំណាចជាផ្លូវការ។
បើតាមការបញ្ជាក់ពីយោធាកូរ៉េខាងត្បូង ក្រុងព្យុងយ៉ាងបានបាញ់មីស៊ីលនៅម៉ោង១២ថ្ងៃត្រង់ម៉ោងក្នុងតំបន់។ មីស៊ីលនេះ បានហោះឡើងដល់កម្ពស់ជិត៨០០គីឡូម៉ែត រួចធ្លាក់ចុះមកវិញ ធ្វើដំណើរបានជិត៥០០គីឡូម៉ែតទៀត មុននឹងធ្លាក់ចូលក្នុងសមុទ្រ។
សរុបទាំងអស់ទៅចាប់ពីការសាកល្បងក្នុងខែមករាឆ្នាំ២០២២ របបក្រុងព្យុងយ៉ាងបានធ្វើតេស្តមីស៊ីលគ្រប់ប្រភេទ ចំនួន១៤ដងរួចហើយ ក្នុងនោះក៏មានដែរ ការបាញ់មីស៊ីលអន្តរទ្វីបក្នុងរយៈចម្ងាយឆ្ងាយបំផុតជាលើកដំបូងចាប់តាំងពីឆ្នាំ២០១៧មក។
កាលពីសប្តាហ៍មុន ខណៈពេលកំពុងឈរស្វាគមន៍ក្បួនព្យុហយាត្រាយោធាដ៏ធំ លោកគីម ជុងអ៊ុន បានប្តេជ្ញាចិត្តពង្រីក និងកែលម្អឃ្លាំងអាវុធនុយក្លេអ៊ែរឲ្យបានឆាប់រហ័ស ហើយបានព្រមានអំពីការវាយប្រហារទុកជាមុន ដែលអាចធ្វើទៅបាន។ ការលើកឡើងបែបនេះ គឺស្របទៅនឹង រូបភាពពីផ្កាយរណប ដែលគេថតបាន បង្ហាញថា កូរ៉េខាងជើងកំពុងចាប់ផ្តើមសកម្មភាពអាវុធនុយក្លេអ៊ែរ និងការសាកល្បងនុយក្លេអ៊ែរឡើងវិញហើយ។
អត្ថបទគួរអាន
គួរកត់សម្គាល់ថា ការសាកល្បងនៅថ្ងៃពុធនេះ កើតឡើងតែប៉ុន្មានថ្ងៃប៉ុណ្ណោះមុនពិធីឡើងកាន់អំណាចជាផ្លូវការរបស់ប្រធានាធិបតីកូរ៉េខាងត្បូង ដែលទើបជាប់ឆ្នោតថ្មី លោក យ៉ូន សុកយ៉ុល(Yoon Suk-yeol)។ លោកយ៉ូន សុកយ៉ុល ដែលត្រូវបានគេសង្កេតឃើញថា ជាមេដឹកនាំមានការប្តេជ្ញាចិត្ត និងប្រកាន់ជំហររឹងប៉ឹងជាមួយកូរ៉េខាងជើងជាងប្រធានាធិបតីមុន។ លោកក៏គ្រោងនឹងបង្កើនកិច្ចសហប្រតិបត្តិការសន្តិសុខជាមួយសហរដ្ឋអាមេរិកបន្ថែមទៀតផងដែរ។
គួរជម្រាបថា ប្រទេសជប៉ុនក្បែរខាងនោះ ក៏បានចេញមកប្រតិកម្មផងដែរថា ការបាញ់មីស៊ីលម្តងហើយម្តងទៀតរបស់កូរ៉េខាងជើងនេះ គឺជាគំរាមកំហែងដល់សន្តិភាព និងសុវត្ថិភាពរបស់ប្រទេសខ្លួន ក្នុងតំបន់ និងសហគមន៍អន្តរជាតិ។ យ៉ាងណាមិញ ភាគីជប៉ុនអះអាងថាមីស៊ីលនេះបានធ្លាក់ក្រៅដែនទឹករបស់ខ្លួនប៉ុណ្ណោះ។
ការសាកល្បងមីស៊ីលលើកនេះ ក៏ប្រហែលជាព្យុងយ៉ាងចង់ផ្គើនដល់សហរដ្ឋអាមេរិកផងដែរ។ ផ្គើនអាមេរិក ក៏ដោយសារតែ ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស់គ្រីនហ្វៀល(Linda Thomas-Greenfield) ចង់ឱ្យក្រុមប្រឹក្សាសន្តិសុខអង្គការសហប្រជាជាតិបោះឆ្នោតក្នុងខែឧសភានេះ ដើម្បីដាក់ទណ្ឌកម្មបន្ថែមលើប្រទេសកូរ៉េខាងជើង ជុំវិញការធ្វើតេស្តមីស៊ីលជាបន្តបន្ទាប់៕
None
