គណបក្សប្រជាធិបតេយ្យសេរី (LDP) រួមជាមួយនឹងដៃគូសម្ព័ន្ធយុវជនរបស់ខ្លួន ដែលមកពីគណបក្សអភិរក្សនិយម (Komeito) បានឈ្នះឆ្នោត និងបានបង្កើនអាសនៈរបស់ខ្លួនដល់ទៅ ១៤៦ កៅអីក្នុងចំណោម ២៤៨ អាសនៈ ដែលជាសម្លេងឈ្នះដាច់នៅក្នុងការបោះឆ្នោតជ្រើសតាំងអាសនៈពាក់កណ្តាលអាណត្តិនៃសភាជាន់ខ្ពស់ជប៉ុន។
មែនទែនទៅ ជាមួយនឹងសម្លេងឈ្នះឆ្នោតដ៏ច្រើនលើសលុបនេះ នឹងជំរុញឲ្យនាយករដ្ឋមន្ត្រីជប៉ុន លោកហ្វូមីអូ គីស៊ីដា (Fumio Kishida) នឹងឈរជាប្រមុខរដ្ឋាភិបាល ដើម្បីកាន់អំណាចបន្តទៀតរហូតដល់ការបោះឆ្នោតជាតិនៅឆ្នាំ ២០២៥ ខាងមុខ។
ហើយការបន្តអំណាចនេះ នឹងអនុញ្ញាតឱ្យលោក Kishida មានពេលវេលាច្រើនក្នុងការតាក់តែងគោលនយោបាយរយៈពេលវែងរបស់ខ្លួនដូចជា សន្តិសុខជាតិ ក៏ដូចជាគោលនយោបាយសេដ្ឋកិច្ច «មូលធននិយមថ្មី» ព្រមទាំងគោលដៅស្នូលរបស់គណបក្ស LDP ក្នុងការធ្វើវិសោធនកម្ម «រដ្ឋធម្មនុញ្ញសន្តិនិយម» ដែលបានព្រាងដោយសហរដ្ឋអាមេរិក ក្រោយជប៉ុនចាញ់សង្គ្រាមលោកទី២ផងដែរ។
ក្រោយពីទទួលលទ្ធផលពីការបោះឆ្នោត លោកគីស៊ីដា ដែលជាប្រធានគណបក្សកាន់អំណាចបានទទួលស្គាល់ការឈ្នះឆ្នោតដ៏ធំធេងនេះ ក៏ប៉ុន្តែលោកហាក់មិនសូវសប្បាយចិត្តនោះឡើយ ដោយសារការបាត់បង់លោក Abe ដែលជាសមាជិកដ៏សំខាន់មួយរូបក្នុងជួរបក្សប្រជាធិបតេយ្យ ហើយក៏ជាជន្ទល់ដ៏រឹងមាំមួយក្នុងការបង្រួបបង្រួមគណបក្សនេះផងដែរ។
អត្ថបទគួរអាន
នៅក្នុងបទសម្ភាសន៍តាមប្រព័ន្ធផ្សព្វផ្សាយក្នុងស្រុកជប៉ុនកាលពីល្ងាចថ្ងៃអាទិត្យ លោក Kishida បានសង្គត់ធ្ងន់ថា៖ «ការរួបរួមផ្ទៃក្នុងបក្សគឺសំខាន់ជាងអ្វីទាំងអស់»។
លោកបានបន្ថែមថា ការរីករាលដាលនៃរលកថ្មីកូវីដ១៩ ការឈ្លានពានរបស់រុស្ស៊ីលើអ៊ុយក្រែន និងការកើនឡើងតម្លៃសម្ភារៈប្រើប្រាស់ប្រចាំថ្ងៃជាអ្វីដែលគណបក្សរបស់លោកក្នុងនាមជាបក្សកាន់អំណាចត្រូវគិតគូរ។ ហើយលោកបានបញ្ជាក់ទៀតថា លោកនឹងជំរុញឲ្យមានការពង្រឹងសន្តិសុខជាតិរបស់ជប៉ុនផងដែរ។
បន្ទាប់ពីការធ្វើឃាតដ៏រន្ធត់ទៅលើលោក អាបេ អតីតនាយករដ្ឋមន្ត្រីជប៉ុន គេសង្កេតឃើញថា ការបោះឆ្នោតជាតិកាលពីថ្ងៃអាទិត្យ ជាអត្ថន័យថ្មីមួយក្នុងនយោបាយជប៉ុន ដោយមេដឹកនាំនយោបាយមកពីគ្រប់ភាគីបានសង្គត់ថា សេរីភាពនៃបញ្ជេញមតិ និងការពារលទ្ធិប្រជាធិបតេយ្យប្រឆាំងនឹងអំពើហិង្សាណាមួយ គឺពិតជាមានសារសំខាន់ណាស់សម្រាប់ប្រទេសជប៉ុន។
ប្រទេសជប៉ុនត្រូវបានគេស្គាល់ថា ជាប្រទេសដែលមានច្បាប់កាន់កាំភ្លើងតឹងរ៉ឹងបំផុតមួយ។ ហើយបើយោងតាមឯកសារឧក្រិដ្ឋកម្មចុងក្រោយរបស់រដ្ឋាភិបាលជប៉ុនបានបង្ហាញថា ក្នុងចំណោមប្រជាជនជាង ១២៥ លាននាក់របស់ខ្លួន ករណីឧក្រិដ្ឋកម្មទាក់ទងនឹងកាំភ្លើងមានត្រឹមតែ ២១ ករណីប៉ុណ្ណោះក្នុងឆ្នាំ ២០២០ កន្លងទៅ។
ទោះជាយ៉ាងណាក៏ដោយ អ្នកនយោបាយមកពីបក្សកាន់អំណាច រួមទាំងបក្សប្រឆាំងបានថ្កោលទោសយ៉ាងខ្លាំង ចំពោះការធ្វើឃាតលោក អាបេ ដែលបានកើតឡើងនៅភាគខាងលិចទីក្រុងណារ៉ាកាលពីថ្ងៃសុក្រសប្ដាហ៍មុននេះ ដោយក្រុមអ្នកនយោបាយ បានហៅអំពើនេះថា ជាបញ្ហាប្រឈមមួយនៅក្នុងលទ្ធិប្រជាធិបតេយ្យជប៉ុន៕
