ប្រទេសកូរ៉េខាងជើងបានបិទព្រំដែន ដើម្បីព្យាយាមទប់ស្កាត់កូវីដ-១៩ឆ្លងរីករាលដាលចូលក្នុងប្រទេសខ្លួន ប៉ុន្ដែ វាក៏បានប៉ះពាល់ដល់ការធ្វើពាណិជ្ជកម្មជាមួយប្រទេសចិនផងដែរ ដ្បិតថាប្រទេសកូរ៉េខាងជើង គឺពឹងផ្អែកខ្លាំងលើទីក្រុងប៉េកាំងសម្រាប់ការដោះដូរទំនិញទាក់ទងនឹងចំណីអាហារ ជីកសិកម្ម និង ប្រេងឥន្ធនៈជាដើម។
រដ្ឋមន្ត្រីក្រសួងការបរទេសរុស្ស៊ី បានលើកឡើងថា ទីក្រុងមូស្គូនៅតែរង់ចាំជានិច្ចក្នុងការផ្តល់ជំនួយវ៉ាក់សាំងទៅឲ្យកូរ៉ខាងជើង ខណៈដែលរស្ស៊ីចង់ផ្តល់ឲ្យជាច្រើនលើកមកហើយ ប៉ុន្ដែកន្លងមកប្រទេសកូរ៉េខាងជើងមិនព្រមទទួលយកវ៉ាក់សាំងកូវីដ-១៩ពីប្រទេសណាទាំងអស់។
ក្រៅពីរស្ស៊ី កន្លងមកប្រទេសចិន និង កូរ៉េខាងត្បូង ក៏ស្ថិតក្នុងចំណោមប្រទេសដែលចង់ជួយផ្តល់វ៉ាក់សាំងទៅឲ្យទីក្រុងព្យុងយ៉ាងផងដែរ។
វិបត្តិនៅក្នុងប្រទេសកូរ៉េខាងជើង អាចនឹងកើតមានឡើងធំប៉ុណ្ណា គឺនឹងត្រូវបង្ហាញឡើងនៅរយៈពេលប៉ុន្មានខែទៅមុខទៀតនេះ។
បុរសខ្លាំងរបស់កូរ៉េខាងជើង លោក គីម ចុងអ៊ុន ថ្មីៗនេះបានចេញមុខទទួលស្គាល់ថា ប្រទេសរបស់ខ្លួនពិតជាកំពុងប្រឈមនឹងបញ្ហាកង្វះស្បៀងអាហារ ហើយស្ថានការណ៍កំពុងស្ថិតក្នុងភាពតានតឹងកាន់តែខ្លាំង។ លោកគីម ក៏បានលើកឡើងកាលពីខែមុននេះ ដោយបានប្រាប់ទៅកាន់ពលរដ្ឋថា ត្រូវត្រៀមខ្លួនសម្រាប់លទ្ធផលអាក្រក់បំផុតមិនធ្លាប់មាន ដែលវាត្រូវបានប្រៀបធៀបដូចទៅនឹងគ្រោះទុរ្ភិក្សកាលពីឆ្នាំ១៩៩០ដែរ។
អត្ថបទគួរអាន
របាយការណ៍ពីអង្គការសហប្រជាជាតិដែលបានចេញនាពេលថ្មីៗនេះ បានឲ្យដឹងថា ប្រទេសកូរ៉េខាងជើងកំពុងខ្វះខាតស្បៀងអាហារប្រហែល ៨៦ម៉ឺនតោននៅឆ្នាំនេះ ហើយវាត្រូវបានព្យាករថា នឹងបន្ដកើតមានកាន់តែអាក្រក់ថែមទៀត។
ថ្មីៗនេះ កូរ៉េខាងជើងក៏បានដកហូតតំណែងមន្ត្រីក្នុងជួររដ្ឋាភិបាលសំខាន់ៗមួយចំនួនផងដែរ ដោយសារតែពួកគេបរាជ័យក្នុងការដោះស្រាយបញ្ហាកង្វះខាតស្បៀងអាហារនៅក្នុងប្រទេស ដោយកត់សម្គាល់ឃើញថា មន្ត្រីទាំងនោះ បានធ្វើឲ្យសន្ដិសុខជាតិ និង សុវត្ថិភាពប្រជាជនកូរ៉េខាងជើងស្ថិតក្នុងហានិភ័យខ្ពស់។
ការដាក់ទណ្ឌកម្មពាណិជ្ជកម្មអន្តរជាតិ ក៏ត្រូវបានគេជឿជាក់ថា នឹងអាចដាក់សម្ពាធកាន់តែខ្លាំងថែមទៀត ទៅលើការផ្គត់ផ្គង់ស្បៀងអាហារនៅក្នុងប្រទេសកូរ៉េខាងជើង។
អ្នកជំនាញ បានមើលឃើញថា ផ្លូវតែមួយគត់ នៃការចាកចេញពីវិបត្តិនេះ កូរ៉េខាងជើងគួរតែចាក់វ៉ាក់សាំងឲ្យប្រជាជនខ្លួនដើម្បីប្រយុទ្ធប្រឆាំងនឹងកូវីដ-១៩ ដើម្បីឈានទៅបើកព្រំដែនប្រទេសឡើងវិញសម្រាប់បន្ដដង្ហើមពាណិជ្ជកម្ម ឬក៏អាចទទួលយកជំនួយនានាពីអន្តរជាតិជាដើម៕
None
