មីស៊ីលដែលបានបាញ់កាលពីថ្ងៃអង្គារ ជាក្បាលគ្រាប់មីស៊ីលប្រភេទមួយ ប៉ុន្តែបាញ់ចេញពីនាវាមុជទឹកសេរីចាស់ ដែលកូរ៉េខាងជើងធ្លាប់បានប្រើប្រាស់សាកល្បងតាំងពីឆ្នាំ២០១៦។ នេះបើតាមសារព័ត៌មានរដ្ឋកូរ៉េខាងជើង KCNA។
គួរជម្រាបថា កូរ៉េខាងជើងមាននាវាមុជទឹកដែលមានវ័យចំណាស់ជាច្រើន ដែលបន្តប្រើមកដល់សព្វថ្ងៃ ហើយមិនទាន់បានដាក់ពង្រាយនាវាមុជទឹកថ្មីៗ ដែលមានសមត្ថភាពអាចបាញ់មីស៊ីលប្រភេទប៉ាលីស្ទិក រយៈចំងាយឆ្ងាយបាននៅឡើយទេ។
មីស៊ីលប្រភេទថ្មីដែលព្យុងយ៉ាងបានសាកល្បង មានរូបរាងតូចជាងមីស៊ីលដែលគេធ្លាប់ឃើញកន្លងមក ហើយអាចបាញ់បានចំងាយជិតប៉ុណ្ណោះ។ ប៉ុន្តែប្រការនេះ បានបង្ហាញយ៉ាងច្បាស់ថា កូរ៉េខាងជើងកំពុងឈានទៅសម្រេចបានបច្ចេកវិទ្យា កាន់តែទំនើប ក្នុងកម្មវិធីអាវុធនុយក្លេអ៊ែរ ឬការផលិតក្បាលគ្រាប់មីស៊ីលចំងាយឆ្ងាយរបស់ខ្លួន ហើយអាចបាញ់ចេញពីនាវាមុជទឹកបានទៀតផង។
អត្ថបទទាក់ទង
រដ្ឋមន្ត្រីការបរទេសកូរ៉េខាងត្បូង លោក ឆុង អ៊ីយុង (Chung Eui-yong) នៅថ្ងៃពុធនេះ បានចេញមកអំពាវនាវឲ្យសហរដ្ឋអាមេរិក លើកលែងទណ្ឌកម្មលើរបបក្រុងព្យុងយ៉ាង ប្រសិនបើមេដឹកនាំកូរ៉េខាងជើង លោក គីម ជុងអ៊ុន ព្រមវិលរកតុចរចាឡើងវិញ។ លោកឆុង បាននិយាយថា គេត្រូវតែចាត់វិធានការឱ្យបានឆាប់តាមដែលអាចធ្វើទៅបាន ដើម្បីបញ្ឈប់កូរ៉េខាងជើង ពីការអភិវឌ្ឍន៍សមត្ថភាពនុយក្លេអ៊ែរ និង មីស៊ីលបន្ថែមទៀត។
ភាគីសហរដ្ឋអាមេរិកឯណោះវិញ មិនបានឆ្លើយតបជុំវិញបញ្ហា ដកទណ្ឌកម្មកូរ៉េខាងជើងនៅឡើយទេ ប៉ុន្តែអ្នកនាំពាក្យរដ្ឋាភិបាលអាមេរិក លោកស្រី ចេន ផាសាគី (Jen Psaki) បាននិយាយថា សហរដ្ឋអាមេរិក នៅតែចំហទ្វារក្នុងការពិភាក្សាការទូតជាមួយកូរ៉េខាងជើង ជុំវិញកម្មវិធីអាវុធនុយក្លេអ៊ែររបស់ខ្លួន។
សូមជម្រាបថា នៅក្នុងមហាសន្និបាតបក្សពលករកូរ៉េខាងជើងនៅដើមឆ្នាំនេះ មេដឹកនាំវ័យក្មេងរបស់កូរ៉េខាងជើង លោកគីម ជុងអ៊ុន ធ្លាប់បានប្រកាសថា កូរ៉េខាងជើងមានគំរូប្លង់សាងសង់នាវាមុជទឹកដើរដោយថាមពលនុយក្លេអ៊ែរថែមទៀតផង៕
None
