មន្ត្រីយោធាជប៉ុន និងកូរ៉េខាងត្បូង ដែលសុទ្ធសឹងជាប្រទេសនៅគៀកនឹងកូរ៉េខាងជើង បានចេញមកអះអាងថា ការបាញ់មីស៊ីលនេះ ជាការបាញ់សាកល្បងមីស៊ីលចេញពីនាវាមុជទឹករបស់កូរ៉េខាងជើង។ យ៉ាងណាមិញ គេមិនទាន់អាចកំណត់ប្រភេទមីស៊ីលមួយគ្រាប់ទៀត ដែលបានបាញ់នៅឡើយទេ។
មិនយូរប៉ុន្មានក្រោយការបាញ់ផ្លោងមីស៊ីលរបស់កូរ៉េខាងជើង ក្រុមប្រឹក្សាសន្តិសុខជាតិកូរ៉េខាងត្បូង បានបើកកិច្ចប្រជុំបន្ទាន់មួយ និងបានសំដែងពីការខកចិត្តចំពោះការបាញ់មីស៊ីលលើកនេះ ហើយបានអំពាវនាវឲ្យបងប្អូនកូរ៉េទាំងពីរ វិលមករកតុចរចារ និង បន្តកិច្ចពិភាក្សារវាងគ្នាឡើងវិញ។
នៅមួយថ្ងៃបន្ទាប់ពីការបាញ់សាកល្បង សារព័ត៌មានរដ្ឋកូរ៉េខាងជើង KCNA បានចុះផ្សាយ ដោយទទួលស្គាល់ថា ព្យុងយ៉ាងពិតជាបានបាញ់សាកល្បងមីស៊ីលចេញពីនាវាមុជទឹករបស់ខ្លួនមែនកាលពីថ្ងៃអង្គារ។
អត្ថបទគួរអាន
គួរបញ្ជាក់ថា ការបាញ់សាកល្បងមីស៊ីល កូរ៉េខាងជើងនៅថ្ងៃអង្គារនេះ គឺជាការសាកល្បងអាវុធ ចុងក្រោយបង្អស់មួយ ក្នុងកម្មវិធីអភិវឌ្ឍន៍សមត្ថភាពយោធារបស់ខ្លួន នៅចំពោះមុខទណ្ឌកម្មអន្តរជាតិ ដែលបានដាក់លើកម្មវិធីអាវុធនុយក្លេអ៊ែរនិងមីស៊ីលរបស់ របបក្រុងព្យុងយ៉ាង។
ក្នុងរយៈពេលប៉ុន្មានសប្តាហ៍ចុងក្រោយ នៃខែតុលានេះ ទីក្រុងព្យុងយ៉ាងបានចាប់ផ្តើមធ្វើតេស្តសាកល្បងមីស៊ីល ជាបន្តបន្ទាប់ នូវអ្វីដែលខ្លួនអះអាងថា ជាមីស៊ីលរយៈចម្ងាយឆ្ងាយ និងអាវុធមីស៊ីលប្រឆាំងនឹងយន្តហោះដែលខ្លួនទើបនឹងផលិតបានផងដែរ។
គួររំឭកថា នៅក្នុងខែកញ្ញាកន្លង កូរ៉េខាងជើងបានបាញ់សាកល្បង មីស៊ីលរបស់ខ្លួនដល់ទៅ៤ដងឯណោះ រួមមាន មីស៊ីលបាញ់ចេញពីក្នុងនាវាមុជទឹក មីស៊ីលរយៈចម្ងាយឆ្ងាយ មីស៊ីលល្បឿនលឿនជាងសម្លេង(សូភើសូនិក) និងចុងក្រោយ គឺ មីស៊ីលប្រឆាំងយន្តហោះ ដែលកូរ៉េខាងជើងបានបាញ់បង្អួតកាលពីចុងខែកញ្ញា។
សម្រាប់អ្នកជំនាញអះអាងថា តាមរយៈការបាញ់សាកល្បងមីស៊ីលដ៏ញឹកញាប់បែបនេះ របបក្រុងព្យុងយ៉ាងចង់បង្ហាញទៅកាន់សហគមន៍អន្តរជាតិថា ក្នុងនាមជាប្រទេសមហាអំណាចនុយក្លេអ៊ែរ កូរ៉េខាងជើងបានបោះជំហានទៅមុខ ខាងផ្នែកបច្ចេកវិទ្យា ផលិតសព្វាវុធ។
ម្យ៉ាងវិញទៀត វាអាចជាការសាកល្បង ភាពអត់ធ្មត់របស់រដ្ឋបាលលោកចូ បៃដិន ប្រធានាធិបតីអាមេរិកផង។ កូរ៉េខាងជើងអាចនឹងចង់ដឹងថា តើខ្លួនអាចបាញ់សាកល្បងមីស៊ីល រហូតដល់ពេលណា ទើបធ្វើឲ្យរដ្ឋបាលលោកចូ បៃដិន និង សហគមន៍អន្តរជាតិ ឆាប់បន្ទន់ឥរិយាបទ និង ជំហរ វិលមកចរចា និង ដកទណ្ឌកម្មសេដ្ឋកិច្ចពីកូរ៉េខាងជើងនោះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
