ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃនេះថា កាលពីយប់ថ្ងៃចន្ទ ប្រទេសកូរ៉េខាងជើងបានរៀបចំក្បួនព្យុហយាត្រាយោធាក្នុងអំឡុងពេលប្រារព្ធខួបនៃការបង្កើតកងកម្លាំងប្រដាប់អាវុធរបស់ប្រទេសកូរ៉េខាងជើង។
ការរៀបចំពិធីនេះបានកើតឡើងនៅពេលដែលក្រុងព្យុងយ៉ាងបានបង្កើនការសាកល្បងអាវុធ និងជាការបង្ហាញពីអំណាចយោធាកូរ៉េខាងជើងនៅចំពេលមានការជាប់គាំងកិច្ចចរចារំសាយអាវុធនុយក្លេអ៊ែរជាមួយសហរដ្ឋអាមេរិក និងរដ្ឋាភិបាលអភិរក្សនិយមដែលនឹងចូលដឹកនាំប្រទេសកូរ៉េខាងត្បូង ។
មន្ត្រីសហរដ្ឋអាមេរិក និងកូរ៉េខាងត្បូងបាននិយាយថា មានសញ្ញានៃការសាងសង់ថ្មីនៅកន្លែងសាកល្បងនុយក្លេអ៊ែរតែមួយគត់របស់ប្រទេសកូរ៉េខាងជើង ដែលត្រូវបានបិទជាផ្លូវការតាំងពីឆ្នាំ២០១៨មកម្ល៉េះដោយបង្ហាញថា ទីក្រុងព្យុងយ៉ាងអាចនឹងរៀបចំ ដើម្បីបន្តការសាកល្បងអាវុធនុយក្លេអ៊ែរឡើងវិញ។
លោក គីម ជុងអ៊ុន បានប្រាប់ទៅកាន់មហាជនក្នុងពិធីខួបនៃការបង្កើតកងកម្លាំងប្រដាប់អាវុធរបស់ប្រទេសកូរ៉េខាងជើងថា ទីក្រុងព្យុងយ៉ាងនឹងបង្កើនការអភិវឌ្ឍឃ្លាំងអាវុធនុយក្លេអ៊ែរដើម្បីការពារសត្រូវរបស់ខ្លួន ហើយកងកម្លាំងនុយក្លេអ៊ែរនៃសាធារណរដ្ឋកូរ៉េខាងជើងត្រូវតែត្រៀមខ្លួនជាស្រេចដើម្បីអនុវត្តបេសកកម្មប្រកបដោយទំនួលខុសត្រូវ និងការទប់ស្កាត់ប្រទេសជាសត្រូវរបស់ខ្លួនគ្រប់ពេលវេលា។
មេដឹកនាំរូបនេះបានបន្ថែមទៀតថា បេសកកម្មជាមូលដ្ឋាននៃកងកម្លាំងនុយក្លេអ៊ែររបស់កូរ៉េខាងជើងគឺដើម្បីរារាំងសង្គ្រាម ប៉ុន្តែនោះប្រហែលជាមិនមែនប្រើប្រាស់វាតែក្នុងបំណងមួយនេះទេ គឺអាចប្រើបានក្នុងបំណងផ្សេងទៀត។
អត្ថបទគួរអាន
លោក គីម ជុងអ៊ុន បានបញ្ជាក់ថា ប្រសិនបើកងកម្លាំងណាមួយហ៊ានបើកការឈ្លានពាន និងប៉ះពាល់ដល់ផលប្រយោជន៍ជាមូលដ្ឋានរបស់ប្រទេសកូរ៉េខាងជើង នោះកងកម្លាំងនុយក្លេអ៊ែររបស់ប្រទេសនេះ នឹងត្រូវបង្ខំចិត្តឱ្យបំពេញបេសកកម្មទីពីររបស់ពួកគេដោយមិនបានរំពឹងទុកនោះឡើយ។
ទីភ្នាក់ងារ KCNA បានរាយការណ៍ថា ក្បួនដង្ហែយោធានេះបានបង្ហាញពីប្រព័ន្ធមីស៊ីលឆ្លងទ្វីបថ្មី (ICBM) ដ៏ធំបំផុតរបស់កូរ៉េខាងជើង ដែលត្រូវបានគេស្គាល់ថាជាប្រព័ន្ធមីស៊ីល Hwasong-17។ មីស៊ីលដ៏ធំនេះត្រូវបានបាញ់សាកល្បងជាលើកដំបូងកាលពីខែមុន ប៉ុន្តែក្រុមមន្ត្រីកូរ៉េខាងត្បូងជឿជាក់ថា ការខំប្រឹងសាកល្បងគឺមិនបានទទួលជោគជ័យនោះទេ។
សូមរំលឹកថា កម្មវិធីផលិតមីស៊ីលផ្លោងឆ្លងទ្វីប និងអាវុធនុយក្លេអ៊ែររបស់កូរ៉េខាងជើងត្រូវបានហាមឃាត់តាមរយៈដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានដាក់ទណ្ឌកម្មទៅលើប្រទេសកុម្មុយនិស្តមួយនេះ៕
អត្ថបទ៖ សុខ ជា
None
