អាជ្ញាធរអាកាសចរណ៍របស់ប្រទេសចិន បាននិយាយថា ប្រអប់ខ្មៅ គឺជាឧបករណ៍ដែលមានម៉ាស៊ីនថតសំឡេង និង ការផ្ទុកទិន្នន័យនៃការហោះហើររបស់យន្តហោះ។ ដូច្នេះ ការរកឃើញប្រអប់ខ្មៅនេះ នឹងជាតម្រុយបន្ថែមទៀត សម្រាប់អ្នកស្រាវជ្រាវ ដើម្បីអាចដឹងបានថា តើយន្ដហោះនោះ ធ្លាក់ដោយសារតែហេតុអ្វី?
លោក Zhu Tao មន្ត្រីរដ្ឋបាលអាកាសចរណ៍ស៊ីវិលនៃប្រទេសចិន (CAAC) បានប្រាប់សន្និសីទសារព័ត៌មានមួយថា ការផ្ទុកទិន្នន័យនៅក្នុងប្រអប់ខ្មៅនៅមានលក្ខណៈពេញលេញ ទោះបីជាមានការខូចខាតខ្លះក៏ដោយ ហើយប្រអប់ខ្មៅនេះ គឺ កំពុងត្រូវបានបញ្ជូនទៅទីក្រុងប៉េកាំងដើម្បីត្រួតពិនិត្យ។
គួរបញ្ជាក់ថា យន្ដហោះ China Eastern ដែលមានជើងហោះហើរលេខ MU5735 ដែលបានកំពុងធ្វើដំណើរពីទីក្រុងគុនមីង ភាគនិរតី ទៅកាន់ទីក្រុងក្វាងចូវ កាលពីថ្ងៃចន្ទដើមសប្ដាហ៍នេះ ស្រាប់តែធ្លាក់ចុះនៅពេលចាប់ផ្តើមចុះចត។ បំណែកយន្តហោះភាគច្រើនហាក់បានបែកខ្ញែក ហើយមិនមានអ្នកនៅរស់ត្រូវបានរកឃើញឡើយ ។
ទោះបីជាយ៉ាងនេះក្ដី ក្រុមមន្ត្រីនៅតែមិនទាន់ធ្វើសេចក្តីប្រកាសផ្លូវការថា អ្នកដំណើរទាំងអស់បានស្លាប់នោះទេ បើទោះជាមានសម្ភារៈដែលត្រូវបានឆេះយ៉ាងសន្ធោសន្ធៅនៅលើភ្នំនៃកន្លែងកើតហេតុក៏ដោយ។
អត្ថបទគួរអាន
មូលហេតុនៃការធ្លាក់យន្តហោះនេះ នៅមិនទាន់ត្រូវបានកំណត់បាន និងបង្ហាញឡើងនៅឡើយទេ ដោយអាជ្ញាធរអាកាសចរណ៍បានអះអាងថា ការស៊ើបអង្កេតរបស់ពួកគេ នឹងមានការលំបាកខ្លាំង ដោយសារតែយន្តហោះនេះ មានការខូចខាតយ៉ាងធ្ងន់ធ្ងរ។
លោក Mao Yanfeng ប្រធានផ្នែកស៊ើបអង្កេតយន្តហោះនៅ រដ្ឋបាលអាកាសចរណ៍ស៊ីវិលនៃប្រទេសចិន បានលើកឡើងថា អាកាសធាតុនៅតាមផ្លូវហោះហើរកាលពីថ្ងៃចន្ទ មិនបង្កគ្រោះថ្នាក់និង ហានិភ័យណាមួយដល់យន្តហោះនោះទេ ហើយអ្នកត្រួតពិនិត្យផ្លូវអាកាសបានរក្សាការទំនាក់ទំនងជាមួយអ្នកបើកយន្តហោះធម្មតាបន្ទាប់ពីចាប់ផ្តើមហោះហើរ និងមុនពេលធ្លាក់ចុះ ហើយយន្តហោះនេះក៏បានបំពេញតាមស្តង់ដារត្រឹមត្រូវមុនពេលហោះឡើងផងដែរ។
ក្រោយពីមានឧបទ្ទវហេតុធ្លាក់យន្ដហោះ ក្រុមហ៊ុនអាកាសចរណ៍ China Eastern និងក្រុមហ៊ុនបុត្រសម្ព័ន្ធចំនួនពីរបានបញ្ឈប់យន្តហោះប្រភេទ Boeing 737-800 ជាង ២០០ គ្រឿងរបស់ពួកគេមិនឲ្យមានការហោះហើរនោះឡើយ៕
អត្ថបទ៖ វ៉ាន់ ស្រីរ័ត្ន
None
