នៅក្នុងកិច្ចប្រជុំរួមគ្នាមួយមន្ត្រីពាក់ព័ន្ធ ក្រុមអាជីវករ កសិករលក់ផ្លែឈើ និងក្រុមហ៊ុនដឹកជញ្ជូន រដ្ឋមន្ត្រីក្រសួងពាណិជ្ជកម្មថៃ លោកជូរិន ឡាក់សាណាវិសិត (Jurin Laksanawisit) បានថ្លែងថា ក្រសួងបានកំណត់គោលដៅនាំចេញផ្លែឈើ ឲ្យបានដល់តម្លៃជាង៨ពាន់៥រយលានដុល្លារ រួមទាំងផ្លែឈើស្រស់ កក ស្ងួត និងកំប៉ុង។ ក្នុងនោះផងដែរ ក្នុងចំណោមទឹកប្រាក់សរុបទាំងនេះ ត្រូវបានគេរំពឹងថា ទឹកប្រាក់ជាង៥ពាន់៣រយលានដុល្លារ គឺបានមកពីការនាំចេញទៅកាន់ទីផ្សារប្រទេសចិន ដែលកើនឡើង ៦៥% បើធៀបនឹងឆ្នាំមុន។
លោក Jurin មានការរំពឹងទុកខ្ពស់នៃការបង្កើនការនាំចេញនេះ ខណៈមានតម្រូវការខ្ពស់សម្រាប់ផ្លែឈើថៃ ស្របពេលដែលទិន្នផលក៏រំពឹងកើនខ្ពស់ដូចគ្នាដែរនៅក្នុងរដូវប្រមូលផលឆ្នាំ ២០២២ នេះ។ រដ្ឋមន្ត្រីក្រសួងពាណិជ្ជកម្មថៃ ក៏បានអះអាងថា ដើម្បីជំរុញការនាំចេញផ្លែឈើ ក្រសួងបានទទួលជោគជ័យរួចហើយ ក្នុងការលើកកម្ពស់ការលក់ផ្លែឈើតាមរយៈកិច្ចសន្យាជាមុន ដែលគ្របដណ្តប់រហូតដល់ ៤៥ម៉ឺនតោន ដែលអ្នកទិញចម្បង គឺ ប្រទេសចិន។
អត្ថបទគួរអាន
ប្រទេសថៃបានបង្កើតកិច្ចពិភាក្សាយ៉ាងល្អជាមួយភាគីចិន ក្នុងការជួយសម្រួលដល់ការនាំចេញផ្លែឈើទៅកាន់ប្រទេសចិន បន្ទាប់ពីថៃបានជួយបការលំបាកដោយសារគោលនយោបាយគ្មានកូវីដ របស់ប្រទេសចិន និងវិធានការត្រួតពិនិត្យយ៉ាងតឹងរឹងនៅច្រកព្រំដែនសំខាន់ៗចំនួនបួន។
គួរកត់សម្គាល់ថា បច្ចុប្បន្ននេះ អាជ្ញាធរចិនកំពុងត្រួតពិនិត្យយ៉ាងតឹងរ៉ឹងនូវរាល់កុងតឺន័រផ្លែឈើដែលចូលមកក្នុងប្រទេសខ្លូននៅច្រកព្រំដែនទាំង៤ ស្របតាមគោលនយោបាយគ្មានកូវីដរបស់រដ្ឋាភិបាលចិន ដែលបានធ្វើឲ្យដំណើរការត្រួតពិនិត្យពន្យារពេលការដឹកជញ្ជូន នាំឱ្យផ្លែឈើខ្លះរលួយខូចគុណភាព។
លោក Jurin ក៏បានចាត់តាំងទីប្រឹក្សាពាណិជ្ជកម្ម និងកសិកម្មឱ្យធ្វើការជាមួយអ្នកដែលមកពីក្រសួងការបរទេសដើម្បីពន្លឿនការពិភាក្សាជាមួយភាគីឡាវ ដើម្បីសម្រួលដល់ការដឹកជញ្ជូនផ្លែឈើតាមរយៈប្រទេសឡាវទៅប្រទេសចិនផងដែរ។
លើសពីនេះ ក្រសួងបានស្នើឱ្យមានការប្រជុំរួមគ្នារវាងប្រទេសថៃ ចិន ឡាវ និងវៀតណាម ដើម្បីដោះស្រាយលើពិធីសាររួមមួយ ដើម្បីពន្លឿនការនាំចេញ និងនាំចូលផ្លែឈើ និងផ្លូវគោកនៅតាមច្រកព្រំដែននីមួយៗ ដែលត្រូវផ្តល់ជាពិសេសដល់ផ្លែឈើថៃឱ្យបង្កើនល្បឿន ដោយការធ្វើឡើងនេះ ដើម្បីជៀសវាងការខូចខាតនៃផលិតផលនាំចេញ។
គួរជម្រាបថា យោងតាមរបាយការណ៍របស់នាយកដ្ឋានពាណិជ្ជកម្មផ្ទៃក្នុង របសថៃបានឲ្យដឹងថា ការប្រមូលផលផ្លែឈើនៅឆ្នាំនេះរបស់ថៃ ត្រូវបានព្យាករថានឹងកើនឡើង១៣%បន្ថែមទៀត ដល់បរិមាណប្រហែលជាង៥លាន៤សែនតោន ដោយក្នុងនោះ ភាគច្រើនជាងផ្លែមង្ឃុតដែលមានដល់៤៣% ផ្លែទុរេនមាន២២% ផ្លែមៀនមានជិត៨% សាម៉ាវមាន៦% និងស្វាយមាន៥%។
របាយការណ៍ដដែលនេះ ឲ្យដឹងទៀតថា ផ្លែឈើរបស់ថៃ មានត្រឹមតែប្រហែល ៣០%ប៉ុណ្ណោះ ដែលត្រូវផ្គត់ផ្គង់ទីផ្សារក្នុងស្រុក ខណៈ៧០% គឺនាំចេញ។
ក្នុងចំណោមទីផ្សារនាំចេញ ប្រទេសចិនគឺជាទីផ្សារនាំចេញផ្លែឈើដ៏សំខាន់របស់ប្រទេសថៃ ដែលមានចំនួន ៦៥% បន្ទាប់មកគឺសហរដ្ឋអាមេរិក ទីក្រុងហុងកុង វៀតណាម និងម៉ាឡេស៊ី៕
អត្ថបទ៖ វ៉ាន់ ស្រីរ័ត្ន
