ក្នុងនោះ ក្រុមហ៊ុនចិនដែលរងការចោទប្រកាន់នេះ មានភាគច្រើន មានប្រតិបត្តិការអាជីវកម្ម នៅក្នុងវិស័យលោហៈ និងរ៉ែ ខណៈដែលគិតតាំងពីឆ្នាំ២០១៣ មកដល់ឆ្នាំ២០២០ ការចោទប្រកាន់ក្រុមហ៊ុនចិនទាក់ទងនឹងការរំលោភសិទ្ធិមនុស្សបានកើនឡើងដល់ទៅ ៦៧៩ករណីឯណោះ។
របាយការណ៍ពីអង្គការមជ្ឈមណ្ឌលធនធានអាជីវកម្ម និង សិទ្ធិមនុស្ស ដែលត្រូវបានចុះផ្សាយដោយទីភ្នាក់ងារសារព័ត៌មានរ៉យទ័រ ថា នៅក្នុងចំណោមសំណុំរឿងចោទប្រកាន់ក្រុមហ៊ុនចិនរកស៊ីក្រៅប្រទេស ទាក់ទងនឹងការរំលោភសិទ្ធិមនុស្ស ទាំង ៦៧៩ ករណីនេះ គឺមាន ២៣៦ករណីវាស្មើនឹង៣៥% នៃករណីសរុប បានកើតមានឡើងនៅក្នុងក្រុមហ៊ុនចិនដែលរកស៊ីនៅក្នុងអាជីវកម្មលោហៈធាតុ និង រ៉ែតែម្តង។ ក្រៅពីនេះ មានប្រហែល ១៥២ករណីទៀត គឺមានការចោទប្រកាន់ទៅលើក្រុមហ៊ុនចិនដែលរកស៊ីនៅក្នុងវិស័យសំណង់ ដោយក្នុងនោះ ក៏មានរាប់បញ្ចូលគម្រោងផ្លូវរថភ្លើង ដែលក្រុមហ៊ុនចិនកំពុងសាងសង់នៅក្នុងប្រទេសឡាវផងដែរ។
ប្រទេសប៉េរូដែលជាអ្នកផលិតលោហៈធាតុស្ពាន់ធំជាងគេទី ២ របស់ពិភពលោក និងប្រទេសមីយ៉ាន់ម៉ាដែលជាប្រទេសជិតខាងរបស់ចិន ជាអ្នកផ្គត់ផ្គង់រ៉ែសំណប៉ាហាំង និង រ៉ែ កម្រនៅលើពិភពលោក ត្រូវបានក្លាយជាកន្លែងក្ដៅគគុកមួយ ដែលមានការចោទប្រកាន់ទាក់ទងនឹងការរំលោភសិទ្ធិមនុស្ស។
អត្ថបទគួរអាន
គួរឱ្យដឹងដែរថា ប្រទេសចិនដែលជាប្រទេសប្រើប្រាស់លោហធាតុច្រើនជាងគេនៅលើពិភពលោក ប៉ុន្ដែប្រទេសនះមិនមានធនធានធម្មជាតិគ្រប់គ្រាន់ ដើម្បីបំពេញតម្រូវការក្នុងស្រុកនោះទេ ហេតុដូច្នេះហើយ តម្រូវឱ្យចិនត្រូវតែស្វែងរកការផ្គត់ផ្គង់វត្ថុធាតុដើមដូចជាលោហធាតុពីក្រៅប្រទេស។
តាមរបាយការណ៍ពីអង្គការមជ្ឈមណ្ឌលធនធានអាជីវកម្ម និង សិទ្ធិមនុស្ស បាននិយាយថា“ ជាង ១ភាគ៣ នៃការចោទប្រកាន់ប្រឆាំងនឹងអាជីវកម្មរ៉ែរបស់ក្រុមហ៊ុនចិននៅក្រៅប្រទេស គឺទាក់ទងនឹងជម្លោះរ៉ាំរៃរវាងក្រុមហ៊ុនរុករករ៉ែដ៏ធំដែលគាំទ្រដោយចិន និង សហគមន៍ក្នុងស្រុកនៅអាមេរិកឡាទីន និង កោះប៉ាពួញូហ្គីណេ ។
តំណាងវិស័យឯកជនចិន បានប្រាប់ទីភ្នាក់សារព័ត៌មានរ៉យទ័រថា ក្រុមហ៊ុនចិនមានគោលនយោបាយសិទ្ធិមនុស្សល្អ ប៉ុន្តែពួកគេមិនដែលផ្តោតលើការខិតខំរបស់ពួកគេនោះទេ ពោលគឺមិនសូវអើពើក្នុងការផ្តល់ការបណ្តុះបណ្តាល និងការណែនាំដល់ក្រុមហ៊ុននៅក្នុងខ្សែសង្វាក់ផ្គត់ផ្គង់របស់ខ្លួននោះឡើយ៕
អត្ថបទ៖ ស៊ើង និមល់
None
