នេះបើតាមការចុះផ្សាយដោយសារព័ត៌មាន South China Morning Post។
បើយោងតាមរបាយការណ៍ផែនការអភិវឌ្ឍចេញផ្សាយដោយអាជ្ញាធរក្រុងសៀងហៃនៅសប្តាហ៍នេះ បានឲ្យដឹងថា ប្រទេសចិនបាននិងកំពុងចាប់ផ្តើមផលិតយន្តហោះដឹកអ្នកដំណើរខ្នាតធំ ប្រភេទ CR929 ក្រោមកិច្ចសហការជាមួយនឹងប្រទេសរុស្សី។ កិច្ចសហការរវាងចិននិងរុស្សីក្នុងការផលិតយន្តហោះប្រភេទនេះ ធ្វើឡើងស្របពេលវិស័យឧស្សាហកម្មអាកាសចរណ៍របស់ចិនត្រូវបានរិតបន្តឹងដោយសហរដ្ឋអាមេរិក ក្រោយឥទ្ធិលពលនៃការឡើងកំដៅទំនាក់ទំនងទ្វេភាគីរបស់ប្រទេសទាំងពីរ។
វាមិនមែនជារឿងចៃដន្យនោះទេដែលរដ្ឋអំណាចក្រុងប៉េកាំង ជ្រើសរើសយកទីក្រុងសៀងហៃជាទីតាំងក្នុងការផលិត និងពង្រឹងឧស្សាហកម្មអាកាសចរណ៍របស់ខ្លួន។ ជាក់ស្តែង សៀងហៃ ជាកន្លែងមានរោងចក្រផលិតយន្តហោះស្រាប់ ដែលធ្វើការវិនិយោគដោយក្រុមហ៊ុន Commercial Aircraft Corporation of China ហៅកាត់ថា Comac។ យ៉ាងណាមិញ កន្លងមកក្រុមហ៊ុននេះ ផលិតតែយន្តហោះដឹកអ្នកដំណើរខ្នាតតូចប្រភេទ C919 ប៉ុណ្ណោះ។
មិនត្រឹមតែ កែប្រែទីក្រុងសៀងហៃ ឲ្យក្លាយទៅជាតំបន់ឧស្សាហកម្មអាការចរណ៍នោះទេ ប៉ុន្តែគោលដៅរបស់ក្រុងប៉េកាំងចង់ប្រែក្លាយទីក្រុងមួយនេះ ជាកន្លែងទាក់ទាញការវិនិយោគផ្ទាល់ពីបរទេសក្នុងវិស័យបច្ចេកវិទ្យាទំនើបៗ។
អត្ថបទគួរអាន
ជាក់ស្តែង ប្រទេសចិនបានចំណាយប្រាក់រាប់ពាន់លានដុល្លារ ដើម្បីបង្កើនសមត្ថភាពផលិតយន្តហោះដឹកអ្នកដំណើររបស់ខ្លួន ចំពេលដែលមានភាពចម្រូងចម្រាសជាមួយអាមេរិកដែលជាប្រទេសនាំចេញផលិតផល និង បច្ចេកវិទ្យាក្នុងវិស័យអាកាសចរណ៍ធំជាងគេលើពិភពលោកមួយដែរ។
សូមជម្រាបថា សហរដ្ឋអាមេរិកបានរឹតបន្តឹងការនាំចេញបច្ចេកវិទ្យាទំនើបៗរបស់ខ្លួន ទៅកាន់ប្រទេសចិន ក្នុងគោលបំណងគ្រប់គ្រងលំហូរនៃបច្ចេកវិទ្យាសំខាន់ៗទៅអោយរដ្ឋបាលក្រុងប៉េកាំង ក្រោយមានការព្រួយបារម្ភជុំវិញការប្រើប្រាស់សក្តានុពលទាំងនេះ សម្រាប់បម្រើផលប្រយោជន៍ដល់យោធាចិន។
ប្រការនេះបានរុញច្រានឲ្យចិនប្តូរគោលការណ៍មកពឹងផ្អែកលើខ្លួនឯងវិញម្តង ក្នុងការផលិតម៉ាស៊ីនយន្តហោះដឹកអ្នកដំណើរ និង អភិវឌ្ឍប្រព័ន្ធផ្លូវអាកាសផ្ទាល់ខ្លួន ជាជាងការពឹងផ្អែកលើក្រុមហ៊ុនអាមេរិក ឬ លោកខាងលិច ដូចជាក្រុមហ៊ុន ប៊ូអ៊ីង (Boeing) ឬ អ៊ែរប៊ឺស (Airbus) ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
