តើរដ្ឋពិតជាបានបម្រើសេវាកម្មហិរញ្ញវត្ថុសម្រាប់ផ្តល់ប្រាក់កម្ចី ឲ្យប្រជាពលរដ្ឋខ្មែរមែនដែរ ឬទេ?
ពិតណាស់ រដ្ឋាភិបាលកម្ពុជាមិនដែលបើកធនាគារឯកជន គ្រឹះស្ថានហិរញ្ញវត្ថុឯកជនសម្រាប់បម្រើសេវាកម្មឲ្យប្រជាពលរដ្ឋខ្ចីនោះទេ ហើយរដ្ឋក៏មិនមានលុយឯណាឲ្យពលរដ្ឋខ្មែរខ្ចីនោះដែរ ពីព្រោះរដ្ឋក៏ខ្ចីលុយពីក្រៅប្រទេស។
លុយដែលមានបានមកពីការប្រមូលពន្ធផ្សេងៗ បានមកពីការខ្ចីបុលប្រទេសផ្សេងៗ ស្ថាប័នអន្តរជាតិមួយចំនួន ដូចជា ចិន ជប៉ុន ធនាគារអភិវឌ្ឍន៍អាស៊ី (អេឌីប៊ី) ធនាគារពិភពលោក មូលនិធិរូបិយវត្ថុអន្តរជាតិ គឺដើម្បីយកទៅធ្វើការអភិវឌ្ឍសេដ្ឋកិច្ចប្រទេសជាតិតែប៉ុណ្ណោះ។
ប្រាក់កម្ចីទំាងអស់នេះភាគច្រើនរដ្ឋាភិបាលបានយកទៅអភិវឌ្ឍវិស័យហេដ្ឋារចនាសម្ព័ន្ធ ផ្លូវ ស្ពាន ផ្លូវដែក កំពង់ផែ អគ្គិសនី ប្រព័ន្ធធារាសាស្ត្រ ការផ្គត់ផ្គង់ទឹកស្អាត ចម្រាញ់ទឹកកខ្វក់ និងប្រើប្រាស់នៅក្នុងការអភិវឌ្ឍសង្គមផ្សេងៗទៀត។
ហើយការដែលយកលុយទំាងអស់នោះទៅធ្វើការអភិវឌ្ឍប្រទេសបានន័យថា រដ្ឋាភិបាលបានជួយប្រជាពលរដ្ឋមានជីវភាពសមរម្យ ដោយគ្មានលក្ខខណ្ឌអ្វីទំាងអស់។ នេះជាតួនាទីរបស់រដ្ឋដែលត្រូវបម្រើរាស្ត្រ។ ដូច្នេះ គ្មានហេតុផលណាមួយដែលរដ្ឋបើកសេវាកម្មផ្តល់ប្រាក់កម្ចីដល់ពលរដ្ឋខ្មែរខ្លួនឯង ហើយយកអត្រាការប្រាក់ខ្ពស់នោះទេ។
ក្នុងពេលមួយទសវត្សរ៍ចុងក្រោយនេះ ស្ថាប័នមីក្រូហិរញ្ញវត្ថុកើតព្រោងព្រាតដូចផ្សិត ដោយផ្ដល់កម្ចីដល់ពលរដ្ឋស្ទើរតែទូទាំងប្រទេសរហូតដល់តំបន់ដាច់ស្រយាល។
តើពាក្យ«ខ្ចីលុយរដ្ឋ ជំពាក់លុយរដ្ឋ» ពលរដ្ឋខ្មែរបានមកពីណា?
ពាក្យនេះត្រូវបានពលរដ្ឋខ្មែរភាគច្រើននៅឯជនបទប្រើបា្រស់ជាង ២០ឆ្នាំទៅហើយ។ រដ្ឋាភិបាលមិនសូវជាខ្វល់នោះទេ ប៉ុន្តែ រដ្ឋាភិបាលពេលនេះខ្វល់នឹងចេញវិធានការភ្លាមៗបន្ទាប់ពីកើតមានរឿងរ៉ាវជាច្រើនដែលពាក់ព័ន្ធទៅនឹងការរឹបអូសដីធ្លី ផ្ទះសម្បែង ពីសំណាក់ធនាគារ គ្រឹះស្ថានហិរញ្ញវត្ថុ អង្គការចងការប្រាក់ក្រៅប្រព័ន្ធ ក្រោមរូបភាពដោយសារតែពួកគាត់លើកឡើងថា ជំពាក់លុយរដ្ឋ ខ្ចីលុយរដ្ឋ ត្រូវបានរដ្ឋរឹបអូសអស់ហើយ។
បញ្ហានេះហើយដែលធ្វើប្រមុខរាជរដ្ឋាភិបាលកម្ពុជាប្រកាសជាច្រើនលើកច្រើនសាមកហើយ។ ហើយនៅពេលថ្មីៗនេះដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជាក៏នៅតែប្រកាសយ៉ាងដូច្នេះថា៖ «គ្រឹះស្ថានមីក្រូហិរញ្ញវត្ថុគឺជារបស់ឯកជន មិនមែនជារបស់រាជរដ្ឋាភិបាលកម្ពុជាទេ។ ដូច្នេះសូមពលរដ្ឋខ្មែរទាំងអស់កុំយល់ច្រឡំ»។
ជុំវិញបញ្ហានេះ ធនាគារពាណិជ្ជ គ្រឹះស្ថានមីក្រូហិរញ្ញវត្ថុ អង្គការចងការប្រាក់ក្រៅប្រព័ន្ធតែងតែបដិសេធ និងបានចេញសេចក្តីប្រកាសព័ត៌មានពីស្ថាប័នរបស់ខ្លួនថា មិនមានគោលការណ៍ផ្សព្វផ្សាយស្ថាប័នហិរញ្ញវត្ថុរបស់ខ្លួនថា ជារបស់រដ្ឋាភិបាលកម្ពុជា ពោល គឺប្រជាពលរដ្ឋគាត់មានការភាន់ច្រឡំ និងតែងតែនិយាយពាក្យ ជំពាក់លុយ ខ្ចីលុយរដ្ឋតៗគ្នាទេ។
កន្លងមក ថ្នាក់ដឹកនាំធនាគារអេស៊ីលីដា ដែលជាធនាគារពាណិជ្ជធំជាងគេមួយនៅប្រទេសកម្ពុជា តែងតែធ្វើការបដិសេធទៅនឹងសំណួររបស់អ្នកកាសែត ដែលចោទសួរថា តើប្រជាពលរដ្ឋភាគច្រើននៅជនបទ ដែលជំពាក់លុយធនាគារអេស៊ីដា និងគ្រឹះស្ថានមីក្រូហិរញ្ញវត្ថុ តែងតែនិយាយថា ខ្ចីលុយរដ្ឋ ជំពាក់លុយរដ្ឋ ឥឡូវរដ្ឋរឹបអូសផ្ទះ ដីធ្លី ។ល។ និង ។ល។ តើធនាគារអេស៊ីលីដា មានគោលការណ៍ឲ្យប្រតិបត្តិករឥណទានផ្សព្វផ្សាយស្ថាប័នរបស់ខ្លួនជាស្ថាប័នរដ្ឋមែនដែរ ឬយ៉ាងណា? ចម្លើយ គឺថា ធនាគារគ្មានគោលការណ៍ឲ្យបុគ្គលិកធ្វើបែបនោះឡើយ៕
