ការកើនឡើងបរិមាណផលិតនេះបានធ្វើឲ្យតម្លៃម្រេចក្នុងស្រុកមានការធ្លាក់ចុះពី ៨ពាន់ដុល្លារក្នុងមួយតោនកាលពីឆ្នាំមុន ចំពោះម្រេចខ្មៅធម្មតា មកនៅត្រឹមតែ ៤ពាន់ដុល្លារប៉ុណ្ណោះក្នុងមួយតោននៅឆ្នាំនេះ។
អ្នកជំនាញសេដ្ឋកិច្ចផ្នែកកសិកម្ម បានធ្វើការស្រាវជ្រាវមើលឃើញថា ទីផ្សារម្រេចខ្មែរអាចនឹងប្រសើរឡើងវិញ ប្រសិនបើមានការពង្រីកបន្ថែមរោងកែច្នៃម្រេចនៅក្នុងស្រុក ដើម្បីនាំចេញទៅកាន់ទីផ្សារក្រៅប្រទេសដោយខ្លួនឯង និងឈប់ពឹងផ្អែកលើឈ្មួញកណ្ដាលពីបរទេស។
ផលលិតផលម្រេចទូទាំងពិភពលោកនៅឆ្នាំ២០១៧នេះ មានសរុបប្រហែលជាង ៥សែនតោន ដែលបានកើនឡើង ២០% ធៀបនឹងឆ្នាំ២០១៦កន្លងទៅ ដែលបានធ្វើឲ្យទីផ្សារម្រេចទូទាំងពិភពលោកមានការធ្លាក់ថ្លៃយ៉ាងគំហុក។ នេះបើយោងតាមរបាយការណ៍ពីអង្កការ NEDSPICE ដែលទើបតែផ្សព្វផ្សាយកាលពីពេលថ្មីៗនេះ។
លោក ចាន់ សុផល នាយកមជ្ឈមណ្ឌលសិក្សាគោលនយោបាយអភិវឌ្ឍន៍។
លោក ចាន់ សុផល ប្រធានមជ្ឈមណ្ឌលសិក្សាគោលនយោបាយអភិវឌ្ឍន៍ លើកឡើងថា ការធ្លាក់ចុះនៃតម្លៃម្រេចនេះ គឺដោយសារតែបរិមាណផលិតម្រេចនៅវៀតណាម ឥណ្ឌូណេស៊ី ប្រេស៊ីល និងកម្ពុជា មានការកើនឡើងខ្ពស់ហួសតម្រូវការ ដែលបានធ្វើឲ្យឈ្មួញកណ្ដាលបានឱកាសទាញទម្លាក់តម្លៃទីផ្សារ។
ទោះបីជាតម្លៃម្រេចកម្ពុជាមានការធ្លាក់ចុះពី ៨០០០ដុល្លារ ក្នុងមួយតោននៅឆ្នាំ២០១៦ មកនៅត្រឹមប្រមាណ ៤០០០ដុល្លារនៅឆ្នាំ២០១៧នេះក៏ដោយ ប៉ុន្តែ លោក ចាន់ សុផល បានលើកឡើងថា អ្នកដាំម្រេចពីមុនយូរឆ្នាំមកហើយនោះ នៅតែអាចទទួលបានចំណេញខ្លះដែរ ប៉ុន្ដែ សម្រាប់អ្នកដែលទើបតែបានប្រមូលផលថ្មីថ្មោង គឺអាចនឹងប្រឈមការខាតបង់គួរសម។
👉 អត្ថបទគួរអាន ! ម្រេចកំពតខ្មែរល្បីមានតម្លៃថ្លៃគ្មានគូប្រៀបនៅទីផ្សារអឺរ៉ុប
យ៉ាងណាក៏ដោយចុះ លោក ចាន់ សុផល គូសបញ្ជាក់ថា ប្រសិនបើទីផ្សារម្រេចកម្ពុជាលែងពឹងផ្អែកទាំងស្រុងលើឈ្មួញកណ្ដាល និងពង្រីកវិសាលភាពនៃការកែច្នៃ និងនាំចេញដោយខ្លួនឯង នោះតម្លៃម្រេចអាចនឹងបានប្រសើរឡើងវិញ។
សូមបញ្ជាក់ថា ខេត្តត្បូងឃ្មុំ គឺជាខេត្តដែលមានការដាំដុះម្រេចច្រើនជាងគេបំផុតនៅកម្ពុជា ពោលគឺមានប្រមាណ៧៥% បន្ទាប់មកគឺ ខេត្តរតនគិរី និងខេត្តក្រចេះ ខណៈដែលខេត្តកំពតដែលមានការចុះជាម៉ាកសម្គាល់ភូមិសាស្ត្រ អាចផលិតម្រេចបានតែ ១%ប៉ុណ្ណោះ៕
None
