ឯកឧត្តម ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បានស្វាគមន៍ចំពោះវត្តមានរបស់ក្រុមហ៊ុន Pestech Cambodia ដែលមកពី វិស័យថាមពលអគ្គិសនីនេះនិងបានបញ្ជាក់ថា វាជាការដើរស្របទៅនឹងគោលដៅទាក់ទាញក្រុមហ៊ុនមកពីគ្រប់វិស័យ ឲ្យចុះបញ្ជីនៅលើទីផ្សារមូលបត្រកម្ពុជា ដើម្បីឲ្យទីផ្សារមួយនេះ កាន់តែពេញលេញ និងអាចតំណាងឲ្យសេដ្ឋកិច្ចប្រទេសកម្ពុជា។
ឯកឧត្តម ហុង សួរបន្ថែមថា ផ្សារមូលបត្រកម្ពុជា ក្រុមហ៊ុន Pestech គឺចេញមកពីវិស័យថាមពលអគ្គិសនី ដែលជាវិស័យថ្មីមួយ ប្លែកពីមុន សម្រាប់ផ្សារមូលបត្រកម្ពុជា និងរំពឹងថាក្រុមហ៊ុននេះ ទទួលបានការចាប់អារម្មណ៍ និងគាំទ្រពីសំណាក់វិនិយោគិន និងសាធារណជន។
អត្ថបទទាក់ទង!
បើតាមសេចក្តីប្រកាសព័ត៌មានរបស់ ក្រុមហ៊ុន Pestech បានបញ្ជាក់ថា គ្រោងនឹងបោះផ្សាយលក់ភាគហ៊ុនក្នុងតម្លៃ ៣,១២០រៀល ឬ ៧៦សេនដុល្លារក្នុងមួយភាគហ៊ុន ហើយក្រុមហ៊ុននេះ គ្រោងនឹងធ្វើកម្មវិធី Roadshow តាមប្រព័ន្ធអនឡាញ នៅថ្ងៃទី ២៧ ខែកក្កដានេះ មុននឹងឈានដល់ ការចុះបញ្ជីជាផ្លូវការ នៅថ្ងៃទី ១២ ខែសីហា ខាងមុខនេះ។ តាមផែនការ ក្រុមហ៊ុន Pestech Cambodia គ្រោងនឹងប្រមូលដើមទុនជិត ៣លានដុល្លារអាមេរិក ដោយបោះផ្សាយលក់មូលបត្រកម្មសិទ្ធិ ប្រមាណជិត ៤លានភាគហ៊ុន។
អគ្គនាយកផ្សារមូលបត្រកម្ពុជា អះអាងថា ដោយសារតែវិបត្តិកូវីដ១៩ បានផ្លាស់ប្តូរបរិបទការងារដែលធ្លាប់ធ្វើពីមុនមក ដោយមានការរុញច្រានកម្មវិធី Roadshow ទៅកាន់ប្រព័ន្ធអនឡាញ ទោះបីជាវាមានបញ្ហាប្រឈមបន្តិចក្តី តែវាជារឿងល្អ ដែលអាចធ្វើបាននៅពេលនេះ មិនចាំបាច់រង់ចាំរហូតដល់ បញ្ហាមេរោគឆ្លងកូវីដ-១៩ បញ្ចប់នោះទេ ព្រោះថា មេរោគឆ្លងនេះ វាអាចអូសបន្លាយរយៈពេលយូរ ដូច្នេះ យើងត្រូវរៀនរស់នៅជាមួយវា និងបត់បែនទៅតាមនោះដែរ។
ឯកឧត្តម ហុង សុហួរបន្តថា ការប្រមូលទុនរង្វង់ ៣លានដុល្លារអាមេរិក អំឡុងពេលមានវិបត្តិនេះ អាចនិយាយបានថា ជាទំហំទឹកប្រាក់មួយសមរម្យ សម្រាប់ក្រុមហ៊ុន ក្នុងការអភិវឌ្ឍដំណើរការការងារ របស់ខ្លួនឲ្យកាន់តែប្រសើរ ហើយអ្វីដែលពិសេសនោះ គឺក្រុមហ៊ុន Pestech នឹងកាន់តែមានភាពងាយស្រួលក្នុងការបំពេញនីតិវិធី បោះផ្សាយលក់ភាគហ៊ុនបន្ថែមទៀតនាពេលក្រោយ។
គួរជម្រាបដែរថា គិតមកទល់ពេលនេះ ផ្សារមូលបត្រកម្ពុជា ទទួលបានក្រុមហ៊ុនចុះបញ្ជីលក់ភាគហ៊ុនចំនួន ៦ក្រុមហ៊ុនហើយ ដោយក្រុមហ៊ុន Pestech នឹងក្លាយជាក្រុមហ៊ុនចុះបញ្ជីលក់ភាគហ៊ុនថ្មីមួយបន្ថែមទៀត ក្នុងពេលឆាប់ៗខាងមុខនេះ។
ថ្នាក់ដឹកនាំជាន់ខ្ពស់នៃក្រុមហ៊ុនផ្សារមូលបត្រកម្ពុជា ក៏រំពឹងនឹងទទួលបានក្រុមហ៊ុនចុះបញ្ជីលក់ភាគហ៊ុន ចំនួន ២បន្ថែមទៀតនៅមុនដំណាច់ឆ្នាំនេះដែរ៕
None
