RCEP ជាកិច្ចព្រមព្រៀងពាណិជ្ជកម្មសេរីដ៏ធំបំផុតរបស់ពិភពលោក ដែលមានទីផ្សារអ្នកប្រើប្រាស់សរុបជាង២ពាន់លាននាក់ ឬស្មើនឹង ៣០%នៃចំនួនប្រជាជនសរុប រួមជាមួយនឹងទំហំ GDP សរុបនៃប្រទេសជាសមាជិកទាំងអស់ គឺមានដល់ទៅជិត២៦ទ្រីលានដុល្លារ ឬស្មើនឹង៣០% នៃ GDPពិភពលោក។
ការដែលអូសបន្លាយពេលយូរ ធ្វើឱ្យហ្វីលីពីន ក្លាយជាអ្នកចុងក្រោយមួយ ដែលផ្តល់សច្ចាប័នលើកិច្ចព្រមព្រៀង RCEP ក៏ដោយសារតែការប្រធានាធិបតីថ្មីលោក ម៉ាកូស មានការព្រួយបារម្ភ។ បារម្ភនៅត្រង់ ផលប៉ះពាល់អាក្រក់នៃការប្រកួតប្រជែងបរទេស លើវិស័យកសិកម្មក្នុងស្រុក ដែលលោកបានប្តេជ្ញាថា នឹងខំខ្លាំងណាស់ធ្វើឱ្យវិស័យនេះរស់ឡើងវិញក្នុងតួនាទីរបស់លោក។
យ៉ាងណាក៏ដោយ លោក ម៉ាកូស បានផ្លាស់ប្តូរគំនិតវិញ ដោយលោកបាននិយាយទៅកាន់អ្នកវិនិយោគនៅទីក្រុងតូក្យូកាលពីដើមខែនេះ ជាមួយនឹងការប្រកាសពីការគាំទ្រចំពោះកិច្ចព្រមព្រៀង RCEP។ ការប្តូរចិត្តនេះ ទំនងជាបានជំរុញដោយការតស៊ូមតិ ក្នុងជួររដ្ឋាភិបាលក្រុងម៉ានីលក្នុងការបង្កើនការនាំចូលផលិតផលកសិកម្ម ដើម្បីដោះស្រាយអតិផរណានៅក្នុងស្រុក ដែលបានកើនឡើងដល់កម្រិតខ្ពស់ក្នុងរយៈពេល១៤ឆ្នាំចុងក្រោយ។
អត្ថបទគួរអាន
ជាលទ្ធផល កាលពីល្ងាចថ្ងៃអង្គារទី ២១ខែកុម្ភៈ សមាជិកព្រឹទ្ធសភាចំនួន២០រូបបានបោះឆ្នោតគាំទ្រ ដល់ការផ្តល់សច្ចាប័នចំពោះកិច្ចព្រមព្រៀង RCEP ប៉ុន្ដែក៏មានដែរសមាជិកម្នាក់បោះឆ្នោតប្រឆាំង ខណៈម្នាក់ទៀតអនុប្បវាទ។
គួរជម្រាបថា RCEP ដែលបានចុះហត្ថលេខាដំបូងនៅចុងឆ្នាំ ២០២០ រួមបញ្ចូលនូវសមាជិកទាំង ១០នៃសមាគមប្រជាជាតិអាស៊ីអាគ្នេយ៍ និងប្រទេសជិតខាងដូចជា អូស្ត្រាលី ចិន ជប៉ុន នូវែលសេឡង់ និងកូរ៉េខាងត្បូង។ ប្លុកនៃកិច្ចព្រមព្រៀងដ៏ធំនេះ គ្របដណ្តប់ប្រហែល ៣០% នៃផលិតផលក្នុងស្រុកសរុបរបស់ពិភពលោក ទំហំពាណិជ្ជកម្ម និងចំនួនប្រជាជន។
ក្រោយការផ្តល់សច្ចាប័នរបស់រដ្ឋាភិបាល ក្រុងម៉ានីល ក្រុមធុរកិច្ច អ្នកវិនិយោគធំៗដែលបានអំពាវនាវជាយូរមកហើយឱ្យផ្តល់សច្ចាប័ននោះ បានធ្វើការកោតសរសើរ លើការអនុម័តរបស់ព្រឹទ្ធសភា។ លេខាធិការអាជ្ញាធរសេដ្ឋកិច្ច និងអភិវឌ្ឍន៍ជាតិ ក៏បានសាទរចំពោះការបើកផ្លូវនេះដែរ៕
