ក្រិតមួយត្រូវបានចុះហត្ថលលេខាដោយលោកពូទីន និងបានចូលធរមានភ្លាមៗកាលពីថ្ងៃទី២៥ ខែសីហា បានចេញផ្សាយនៅលើគេហទំព័ររបស់វិមានក្រឹមឡាំងថា អ្នកណាដែលកំពុងមានភារកិច្ចនៅក្នុង«ប្រតិបត្តិការយោធពិសេស»នៅក្នុងប្រទេសអ៊ុយក្រែនទាំងអស់ តម្រូវឱ្យស្បថជាផ្លូវការ ដើម្បីបង្ហាញពីភក្តីភាពស្មោះត្រង់ និងការពារចំពោះប្រទេសរុស្ស៊ី»។
អត្ថបទគួរអាន
ការប្រកាសនេះ ធ្វើឡើងបន្ទាប់ពីលោកពូទីនបានផ្ញើសាររំលែកទុក្ខដល់ក្រុមគ្រួសារនៃអ្នកស្លាប់ក្នុងឧប្បត្តិហេតុធ្លាក់យន្តហោះកាលពីថ្ងៃព្រហស្បតិ៍ទី២៤ខែសីហា និងថាលោក Prigozhin បានប្រព្រឹត្ត«កំហុសធ្ងន់ក្នុងជីវិត»។ ទោះបីជាយ៉ាងណាក៏ដោយ អ្នកនយោបាយលោកខាងលិចមួយចំនួន បានចោទប្រកាន់ដោយគ្មានភស្តុតាងថា ជាស្នាដៃរបស់លោក ពូទីន ជាអ្នកបញ្ជានៅពីក្រោយ បន្ទាប់ពីមានការបះបោរកាលពីថ្ងៃទី២២-២៣ខែមិថុនារបស់ក្រុម Wagner ប្រឆាំងនឹងលោក ដែលធ្វើឱ្យអំណាចវិមានក្រឹមឡាំងរង្គោះរង្គើខ្លាំងបំផុតជាងពីរទសវត្សរ៍មកនេះ។
ដោយឡែក អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃសុក្រថា ការចោទប្រកាន់នេះ និងអ្នកផ្សេងទៀតគឺជារឿងប្រឌិតសុទ្ធសាធ។ លោកបានអះអាងប្រាប់រ៉យទ័រថាទាំងអស់នេះគឺជាការកុហកទាំងស្រុង ហើយនៅពេលលើកឡើងពីបញ្ហានេះ ចាំបាច់ត្រូវផ្អែកលើការពិត។ «ការពិតយ៉ាងណានោះ គឺអាជ្ញាធររុស្ស៊ីកំពុងស៊ើបអង្កេតនៅឡើយ»។ លោកថា លទ្ធផលនឹងត្រូវប្រកាសឱ្យដឹងនាពេលឆាប់ៗខាងមុខនេះ រួមទាំងការធ្វើកោសល្យវិច័យសាកសព១០នាក់នោះ ថាតើមួយក្នុងចំណោមនោះពិតជាលោក Prigozhin មែនឬយ៉ាងណា។
បើតាមចារកម្មយោធាអង់គ្លេសបាននិយាយកាលពីថ្ងៃសុក្រថា គេមិនទាន់មានភស្តុតាងច្បាស់លាស់ដែលថា Prigozhin បាននៅលើយន្តហោះនោះទេ ប៉ុន្តែទំនងជាគាត់បានស្លាប់ហើយ។ ទន្ទឹមគ្នានោះ មន្ទីរបញ្ជកោណអាមេរិកបានឱ្យដឹងដែរថា តាមការវាយតម្លៃដំបូងគេគឺថា Prigozhin ត្រូវបានស្លាប់នៅក្នុងយន្តហោះនោះមែន។ យោងតាមសារព័ត៌មាន Baza របស់រុស្ស៊ី ដែលមានប្រភពគួរឱ្យទុកចិត្តពីចំណោមភ្នាក់ងារអនុវត្តច្បាប់រុស្ស៊ី បានរាយការណ៍ថា ក្រុមអ្នកស៊ើបអង្កេតកំពុងផ្តោតលើការសង្ស័យួយដែលថាគ្រាប់បែកមួយ ឬពីរគ្រាប់អាចត្រូវបានគេដាក់នៅលើយន្តហោះនោះ៕
