ឯកឧត្តម ហ៊ី ប៉ាវី អគ្គនាយកកំពង់ផែស្វយ័តភ្នំពេញ បានគូសបញ្ជាក់ថា ស្ថានភាពចរាចរណ៍ដឹកទំនិញចេញ-ចូល កំពង់ផែស្វយ័តភ្នំពេញនាពេលបច្ចុប្បន្ន ហាក់មានដំណើរល្អជាមួយនឹងកំណើនគួរឲ្យកត់សម្គាល់ ប្រមាណ១៥% បើធៀបនឹងឆ្នាំមុន។ ក្នុងនោះមាននាវាដែលដឹកជញ្ជូនផលិតផលកសិកម្ម និងផលិតផលកាត់ដេរសម្លៀកបំពាក់ចេញទៅក្រៅប្រទេស ខណៈដែរការដឹកជញ្ជូនសម្ភារៈសំណង់ និងវត្ថុធាតុដើមរោងចក្រកាត់ដេរ និងសម្ភារៈប្រើប្រាស់ផ្សេងៗទៀតចូលមកកម្ពុជា នៅតែមានចំនួនខ្ពស់ផងដែរ។ ដ្បិតសកម្មភាពនាវាដឹកទំនិញចេញ-ចូលដំណើរការធម្មតា ក៏ពិតមែន តែបញ្ហាសង្រ្គាមរវាងរុស្សីនិងអ៊ុយក្រែន នៅតែជះឥទ្ធិពលមួយចំនួនដល់វិស័យដឹកជញ្ជូននៅកម្ពុជា ពិសេសការកាត់បន្ថយការបញ្ជាទិញផលិតផលកាត់ដេរ សម្លៀកបំពាក់ និងស្បែកជើង ពីសហគមន៍អឺរ៉ុបតែម្ដង។ ក៏ប៉ុន្តែ បើទោះជាបែបនេះក្ដី ឯកឧត្តម ហ៊ី ប៉ាវី នៅតែបង្ហាញនូវសុទិដ្ឋិនិយមថា បញ្ហាទាំងនេះមិនបានគំរាមកំហែងដល់ប្រាក់ចំណូលរបស់កំពង់ផែស្វយ័តភ្នំពេញនោះទេ។
ឯកឧត្តម ហ៊ី ប៉ាវី អះអាងថា ស្ថានភាពពិភពលោកនៅមិនទាន់មានភាពច្បាស់លាស់ ដោយអាចនឹងមានការប៉ះពាល់មួយចំនួនមែន ប៉ុន្តែដោយសារប្រទេសកម្ពុជាជាប្រទេសផលិតកសិកម្ម និងជាប្រទេសឧស្សាហកម្មធុនស្រាល ដូច្នេះ នៅក្នុងឆ្នាំ ២០២៣ សកម្មភាពដឹកទំនិញចេញ-ចូលឆ្លងកាត់កំពង់ផែស្វយ័តភ្នំពេញ នៅតែរក្សាបានសញ្ញាណវិជ្ជមាន អាចនឹងមានស្ថានភាពប្រហាក់ប្រហែលក្នុងឆ្នាំ២០២២នេះ ឬមានការកើនឡើងក្នុងកម្រិតតិចតួច។
អត្ថបទគួរអាន
អគ្គនាយកកំពង់ផែស្វយ័តភ្នំពេញរូបនេះ បញ្ជាក់បន្ថែមថា កំពង់ផែស្វយ័តភ្នំពេញ ក៏មានវិធានការបន្ថែមទៀត សម្រាប់ជួយដល់អាជីវកម្មរបស់ខ្លួនផងដែរ ក្រោយពីរាជរដ្ឋាភិបាលបានផ្តល់ឱកាសឱ្យមានការបង្កើតផែរណប ដោយជំរុញឱ្យផែរណបទាំង៤ អាចចាប់ផ្តើមដំណើការបាន នៅអំឡុងត្រីមាសទី១ ទី២ និងទី៣ ក្នុងឆ្នាំ២០២៣ ។ យ៉ាងណាមិញ ឯកឧត្តម ហ៊ី ប៉ាវី មានក្តីរំពឹងថា កាលណាផែរណបទាំង៤ មានដំណើរការក្នុងកម្រិតណាមួយហើយនោះ គឺនឹងអាចជួយបំពេញបន្ថែមដល់ចរន្តការដឹកជញ្ជូនទំនិញឆ្លងកាត់កំពង់ផែស្វយ័តភ្នំពេញផងដែរ តែទោះជាយ៉ាងណា ឯកឧត្តម បានសង្កត់ធ្ងន់ថា ចរន្តដឹកជញ្ជូនទំនិញឆ្លងកាត់កម្ពុជា ជាពិសេសនៅកំពង់ផែស្វយ័តភ្នំពេញតែម្តង នឹងមិនមានការថមថយនោះទេនៅឆ្នាំក្រោយ។
សូមជម្រាបថា តាមរបាយការណ៍របស់កំពង់ផែស្វយ័តក្រុងភ្នំពេញ នៅរយៈពេល ១១ខែ ឆ្នាំនេះ កំពង់ផែស្វយ័តភ្នំពេញ រកចំណូលបានជាង ៣៧លានដុល្លារអាមេរិក កើនឡើង២២% ធៀបនឹងរយៈពេលដូចគ្នានៅឆ្នាំ២០២១។ ក្នុងនោះ ចរាចរណ៍នាវាដឹកទំនិញចេញ-ចូលកំពង់ផែស្វយ័តភ្នំពេញមានរហូតជាង ៣ពាន់ជើង បានកើនឡើងជាង ៥៥ % ប្រៀបនឹងរយៈពេលដូចគ្នានៅឆ្នាំ២០២១។ ដោយឡែក ចំពោះបរិមាណកុងតឺន័រវិញ ក៏មានការកើនឡើងដូចគ្នា ដោយនៅរយៈពេល១១ខែនេះ គឺមានកុងតឺន័ររហូតដល់ជាង ៣៨ម៉ឺនកុងតឺន័រ កើនឡើងប្រមាណ ២១% ប្រៀបនឹងរយៈពេលដូចគ្នានៅឆ្នាំ២០២១៕
