នាពិធីសម្ពោធឆ្លងសមិទ្ធផលនានានៃមជ្ឍមណ្ឌលវប្បធម៌ព្រះពុទ្ធសាសនាកម្ពុជាក្នុងខេត្តកំពង់ស្ពឺ នាថ្ងៃទី៣០ ខែឧសភា ឆ្នាំ២០២៤នេះ សម្ដេចនាយករដ្ឋមន្រ្តី ហ៊ុន ម៉ាណែត បានមានប្រសាសន៍ថា ប្រសិនបើមិនមានការប្រែប្រួលទេ រដ្ឋាភិបាលនឹងសម្រេចយកខែសីហា ឆ្នាំ២០២៤ នេះ ដើម្បីបើកការដ្ឋានសាងសង់គម្រោងព្រែកជីកហ្វូណនតេជោ។ បើតាមថ្នាក់ដឹកនាំរាជរដ្ឋាភិបាលកម្ពុជា គម្រោងប្រវត្តិសាស្រ្តដ៏សំខាន់នេះនឹងមានពលរដ្ឋខ្មែរភាគច្រើនចូលរួមកសាងជាមួយ ខណៈបច្ចុប្បន្នកំពុងចរចាជាមួយក្រុមហ៊ុនចិន ដែលដាក់ទុនវិនិយោគ។ ទន្ទឹមគ្នានេះ សម្ដេច ហ៊ុន ម៉ាណែត បានគូសបញ្ជាក់ថា គម្រោងដែលមានលក្ខណៈជាតិនិយមនេះ ត្រូវតែធ្វើជាដាច់ខាត ដើម្បីផលប្រយោជន៍ជាតិខ្មែរ ទោះបីគ្មានការដាក់ទុនវិនិយោគពីខាងក្រៅក៏ដោយ។
ជាមួយគ្នានេះឧកញ៉ា ស៊ិន ចន្ធី អគ្គនាយកក្រុមហ៊ុន Linehaul Express បានបង្ហាញការសាទរយ៉ាងខ្លាំងចំពោះដំណឹងដ៏រីករាយជុំវិញការប្រកាសបើកដ្ឋានសាងសង់គម្រោងព្រែកជីកហ្វូណនតេជោនេះ។ បើតាមអ្នកជំនាញក្នុងវិស័យឡូជីស្ទីករូបនេះ គម្រោងព្រែកជីកហ្វូណន តេជោ នឹងផ្ដល់ផលប្រយោជន៍ផ្នែកសេដ្ឋកិច្ចដ៏មហាសាលសម្រាប់សេដ្ឋកិច្ចកម្ពុជា ព្រោះព្រែកជីកនេះនឹងជួយសម្រួលដល់ការដឹកជញ្ជូនតាមផ្លូវទឹកពីកំពង់ផែនៅភ្នំពេញឆ្ពោះទៅសមុទ្រ និងទៅកាន់ប្រទេសទី៣ ដែលនឹងធ្វើឱ្យពាណិជ្ជកម្មរបស់កម្ពុជាកាន់តែមានភាពប្រសើរឡើង ដោយសារតែវាជួយកាត់បន្ថយថ្លៃដើមនៃការដឹកជញ្ជូនបានច្រើន។
អត្តបទគួរអាន
ស្រដៀងគ្នានេះដែរ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជាបានចាត់ទុកការសម្រេចបើកការដ្ឋានសាងសង់គម្រោងព្រែកជីកហ្វូណនតេជោនេះថា គឺជារឿងដ៏ល្អ និងជាអ្វីដែលពលរដ្ឋចង់ឃើញសមិទ្ធផលដែលមានតម្លៃជាប្រវត្តិសាស្រ្តនេះឆាប់លេចចេញជារូបរាងតាមតែអាចធ្វើបាន ដើម្បីជាឧត្តមប្រយោជន៍សម្រាប់ប្រជាជាតិកម្ពុជាតជំនាន់។ សម្រាប់អ្នកជំនាញរូបនេះ គម្រោងព្រែកជីកនេះ បានក្លាយជាប្រភពដ៏សំខាន់សម្រាប់ពង្រឹងនូវការឯកភាពជាតិ សាមគ្គីជាតិ និងគំនិតស្នេហាជាតិ ជាតិនិយម ពីសំណាក់ពលរដ្ឋខ្មែរគ្រប់ស្រទាប់វណ្ណៈ និងគ្រប់និន្នាការនយោបាយ។
សូមបញ្ជាក់ថា គម្រោងព្រែកជីកហ្វូណនតេជោដែលមានប្រវែង១៨០គីឡូម៉ែត្រ និងគ្រោងចំណាយថវិកាសាងសង់ប្រមាណ១ពាន់៧រយលានដុល្លារ មិនត្រឹមតែផ្ដល់ផលប្រយោជន៍ដល់ប្រទេសកម្ពុជាប៉ុណ្ណោះទេ ថែមទាំងផ្ដល់ផលប្រយោជន៍ដល់តំបន់ និងពិភពលោកផងដែរ ព្រោះកម្ពុជានឹងធ្វើឱ្យប្រសើរឡើងនូវប្រព័ន្ធធារាសាស្រ្ត និងកាត់បន្ថយការជន់លិចនៅភាគខាងត្បូងប្រទេស ព្រមទាំងធ្វើឱ្យប្រសើរឡើង និងលើកកម្ពស់ការតភ្ជាប់បៃតងតាមកំពង់ផែទឹកសាបទៅកាន់កំពង់ផែសមុទ្រនៅកម្ពុជា និងការតភ្ជាប់ជាមួយតំបន់អាស៊ានជាដើម។
តាមរយៈគម្រោងនេះ ត្រូវបានអ្នកសិក្សារកឃើញថា វានឹងជួយកាត់បន្ថយការបំភាយឧស្ម័នផ្ទះកញ្ចក់ទៅក្នុងបរិស្ថាន និងកាត់បន្ថយថ្លៃដើមភស្តុភារកម្ម និងធ្វើឱ្យការវិនិយោគនៅកម្ពុជាកាន់តែមានភាពប្រសើរឡើង ដែលនឹងផ្ដល់ផលចំណេញដល់សេដ្ឋកិច្ចចន្លោះពី២១% ទៅ៣០% ហើយជីវភាពរបស់ពលរដ្ឋជាង១លាន៦សែននាក់ ដែលរស់នៅតាមបណ្ដោយព្រែកជីកនេះ ក៏នឹងមានភាពប្រសើរឡើងផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
