សម្តេចធិបតី ហ៊ុន ម៉ាណែត និងលោក អានុទីន នឹងជួបពិភាក្សាទល់មុខនៅក្រៅកិច្ចប្រជុំកំពូលអាស៊ាន

មេដឹកនាំកម្ពុជា និងថៃគ្រោងនឹងជួបពិភាក្សាទល់មុខគ្នានៅខាងក្រៅកិច្ចប្រជុំកំពូលអាស៊ានលើកទី៤៨នៅកោះសេប៊ូ ប្រទេសហ្វីលីពីន ដើម្បីបន្ធូរបន្ថយភាពតានតឹង បន្ទាប់ពីមានការប៉ះទង្គិចប្រដាប់អាវុធយ៉ាងធ្ងន់ធ្ងរនៅបណ្តោយព្រំដែនកាលពីឆ្នាំ២០២៥ កន្លងទៅ។ បើទោះបីជាបច្ចុប្បន្នភាគីទាំងពីរបានអនុវត្តបទឈប់បាញ់ក៏ដោយ ប៉ុន្តែស្ថានភាពយោធានៅតាមតំបន់មួយចំនួននៅតែស្ថិតក្នុងភាពប្រុងប្រយ័ត្នខ្ពស់។

ហ្វីលីពីនក្នុងនាមជាម្ចាស់ផ្ទះបានដើរតួជាអ្នកសម្របសម្រួលដ៏សំខាន់ ដោយប្រធានាធិបតី ហ្វឺឌីណាន់ ម៉ាកូស ចង់ឱ្យមានបរិយាកាសវិជ្ជមានមុនកិច្ចពិភាក្សាតំបន់ចាប់ផ្តើម។ ពាក់ព័ន្ធនឹងជំនួបនេះលោក អានុទីន បានថ្លែងប្រាប់អ្នកសារព័ត៌មាននៅទីក្រុងបាងកកថា អាស៊ានចង់បានបរិយាកាសល្អមួយមុនពេលកិច្ចប្រជុំកំពូលរួមចាប់ផ្តើម។ នេះគឺជាមូលហេតុដែលលោក ត្រូវជួបពិភាក្សាជាមួយមេដឹកនាំកម្ពុជា។

ទោះបីជាមិនបានបញ្ជាក់លម្អិតអំពីរបៀបវារៈនៃកិច្ចពិភាក្សាក៏ដោយ តែលោក អានុទីន បានសន្យាថា នឹងការពារផលប្រយោជន៍របស់ថៃឱ្យបានខ្ពស់បំផុត។ ដោយឡែកឯកឧត្តម គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជាបានលើកឡើងកាលពីថ្ងៃទី៥ ខែឧសភា ថា ជំនួបរវាងមេដឹកនាំកម្ពុជា និងថៃបានបង្ហាញពីឆន្ទៈរបស់អាស៊ានក្នុងការដោះស្រាយវិបត្តិនានា។ ឯកឧត្តមបានបញ្ជាក់ថា ប្រធានអាស៊ានកំពុងព្យាយាមនាំកម្ពុជា និងថៃឱ្យវិលមករកតុចរចា។ ភាគីទាំងពីរគប្បីលះបង់ការប្រើប្រាស់កម្លាំងបាយ ហើយវិលមករកដំណោះស្រាយ ដែលផ្អែកលើច្បាប់អន្តរជាតិ និងសន្ធិសញ្ញាដែលមានស្រាប់។

ជំនួបដ៏ស្រួចស្រាល់រវាងមេដឹកនាំកម្ពុជា និងថៃនេះបានកើតឡើងចំពេល ដែលទំនាក់ទំនងទ្វេភាគីរវាងកម្ពុជា និងថៃកំពុងស្ថិតក្នុងភាពរកាំរកូសជាថ្មី បន្ទាប់ពីភាគីថៃបានសម្រេចលុបចោលអនុស្សរណៈនៃការយោគយល់គ្នាឆ្នាំ២០០១ ពាក់ព័ន្ធនឹងការរុករកថាមពលរួមគ្នានៅតំបន់សមុទ្រត្រួតស៊ីគ្នាជាឯកតោភាគី៕

ដោយៈ សរ សុជាតិ