ពន្ធដារពន្យារពេលបង់ពន្ធលើអចលនទ្រព្យ និងពន្ធលើដីធ្លីមិនប្រើប្រាស់ដល់ដំណាច់ខែតុលា

តាមរយៈសេចក្តីជូនដំណឹងរបស់ខ្លួននៅថ្ងៃទី២៦ ខែកញ្ញា ឆ្នាំ២០២៣ អគ្គនាយកដ្ឋានពន្ធដារសង្កេតឃើញថា មកទល់ពេលនេះ មានម្ចាស់អចលនទ្រព្យជាច្រើនបានមកប្រកាសបង់ពន្ធលើអចលនទ្រព្យ ឬពន្ធលើដីធ្លីមិនបានប្រើប្រាស់សម្រាប់ឆ្នាំ២០២៣ តែក៏នៅមានម្ចាស់អចលនទ្រព្យមួយចំនួនទៀតផងដែរ ដែលមិនទាន់បានបំពេញកាតព្វកិច្ចប្រកាសបង់ពន្ធលើអចលនទ្រព្យរបស់ខ្លួន។

ដើម្បីជួយសម្រួលដល់អ្នកជាប់ពន្ធទាំងអស់ អគ្គនាយកដ្ឋានពន្ធដារបានសម្រេចពន្យារពេលបង់ពន្ធចំនួន៣១ថ្ងៃបន្ថែម ពោលគឺរហូតដល់ថ្ងៃទី៣១ ខែតុលា ឆ្នាំ២០២៣ ខណៈការបង់ពន្ធអចលនទ្រព្យប្រភេទនេះត្រូវផុតកំណត់ត្រឹមថ្ងៃទី៣០ ខែកញ្ញា ឆ្នាំ២០២៣។ ទន្ទឹមនឹងការពន្យារពេលនេះ អគ្គនាយកដ្ឋានពន្ធដារ ក៏បានព្រមានចាត់វិធានការពិន័យរដ្ឋបាល និងច្បាប់ចំពោះម្ចាស់អចលនទ្រព្យ ដែលមកបង់ពន្ធក្រោយរយៈពេលកំណត់ផងដែរ៕