មានពលរដ្ឋភូមារាប់រយនាក់ បានមកតម្រង់ជួរគ្នានៅមុខកន្លែងលក់ និង បញ្ចូលខ្យល់អុកស៊ីហ្សែន តាំងតែពីព្រឹកព្រលឹមក្នុងក្តីសង្ឃឹមថា ពួកគេអាចយកអុកស៊ីហ្សែនត្រឡប់ទៅផ្ទះវិញសម្រាប់សមាជិកគ្រួសាររបស់ខ្លួន ដែលកំពុងធ្លាក់ខ្លួនឈឺខ្លាំង ពិបាកដកដង្ហើម។
ស្ត្រីពលរដ្ឋភូមាម្នាក់បានប្រាប់អ្នកយកព័ត៌មាននៃទីភ្នាក់ងារសារព័ត៌មានបារាំង AFP ថា ស្របពេលដែលនាងកំពុងឈររង់ចាំអុកស៊ីហ្សែនេះ ប្អូនស្រីរបស់នាងដែលកំពុងឈឺនៅផ្ទះនោះ បានផុតដង្ហើមបាត់ទៅហើយ។
គួរជម្រាបថា ចំនួនអ្នកឆ្លងកូវីដ-១៩នៅភូមាកាលពីថ្ងៃពុធសប្តាហ៍នេះ មានដល់ទៅ ៧ពាន់ករណី ដែលតួលេខប្រចាំថ្ងៃនេះ មានការកើនឡើងខ្លាំងបំផុត បើធៀបនឹងតួលេខប្រចាំថ្ងៃកាលពីខែឧសភា ដែលមានត្រឹមរង្វង់៥០ករណីប៉ុណ្ណោះ។
ពលរដ្ឋរាប់លាននាក់ នៅតាមទីក្រុង និង តំបន់សំខាន់ៗផ្សេងទៀត ដូចជា រ៉ង់ហ្គោន និងម៉ាន់ដាឡេ ជាដើម ត្រូវបានអាជ្ញាធរបញ្ជាឲ្យនៅក្នុងផ្ទះចាប់តាំងពីដើមខែកក្កដាមកម្ល៉េះ ក្រោមហេតុផលរិតបន្តឹងវិធានការសុខាភិបាល ទប់ទល់នឹងកូវីដ១៩។
អត្ថបទគួរអាន
យ៉ាងណាមិញ មេដឹកនាំរដ្ឋាភិបាលយោធាភូមា លោក មីន អ៊ុងឡាំង បាននិយាយប្រាប់កាសែតក្នុងស្រុកថា រដ្ឋាភិបាលរបស់លោកមានអុកស៊ីហ្សែនគ្រប់គ្រាន់ ហើយក៏មានលទ្ធភាពគ្រប់គ្រាន់សម្រាប់ទប់ទល់នឹងរលកឆ្លងកូវីដ-១៩លើកនេះផងដែរ។ លោកបានបន្តប្រាប់ទៅពលរដ្ឋថា កុំឲ្យមានការព្រួយបារម្ភ ហើយបានហាមឃាត់ពលរដ្ឋកុំឲ្យ ចែកចាយបន្ដនូវពាក្យចចាមអារាម អំពីបញ្ហាខ្វះខាតអុកស៊ីហ្សែននេះទៀត។
សូមបញ្ជាក់ផងដែរថា ចំនួនអ្នកឆ្លងកូវីដ១៩នៅភូមាសរុបគិតមកត្រឹមថ្ងៃពុធទី១៥កក្កដាមានចំនួនជាង ២០ម៉ឺននាក់ និងស្លាប់បាត់បង់ជីវិតជាង ៤ពាន់នាក់។ ស្របពេលដែលយុទ្ធនាការចាក់វ៉ាក់សាំងក្នុងប្រទេសនេះ មានល្បឿនយឺតខ្លាំងមែនទែន ដោយគិតមកដល់ពាក់កណ្តាលខែកក្កដានេះ មានពលរដ្ឋប្រមាណតែ ១លាន៧សែននាក់ប៉ុណ្ណោះដែលទទួលបានវ៉ាក់សាំងទាំងពីរដូស ខណៈដែលប្រជាជនសរុបមានដល់ ៥៤លាននាក់៕
None
