មន្ត្រីជាន់ខ្ពស់ផ្នែកសុខាភិបាលនៃទីក្រុងវ៉ាស៊ិនតោនបានអះអាងនៅក្នុងសេចក្ដីថ្លែងការណ៍ថា ការចាក់វ៉ាក់សាំងដូសទី ៣ នូវប្រភេទវ៉ាក់សាំង Pfizer ឬ Moderna នឹងផ្ដល់ឲ្យពលរដ្ឋនូវការការពារបន្ថែម និងអាចជួយបង្កាការឆ្លងកូវីដ-១៩បំប្លែងថ្មី ឌែលតាផងដែរ។ មន្ត្រីសុខាភិបាលអាមេរិកដដែលនេះ បានគូសបញ្ជាក់ទៀតថា ផ្នែកវិទ្យាសាស្ត្របន្ដបង្ហាញឲ្យឃើញថា វ៉ាក់សាំងគឺនៅតែជាឧបករណ៍ដ៏ល្អបំផុត ដើម្បីការពារសហគមន៍ និងកុំឲ្យមានការឆ្លងកូវីដ-១៩រីករាលដាលលឿន។
រដ្ឋបាលឱសថ និងស្បៀងអាហារអាមេរិក បានប្រកាសអនុវត្តការចាក់ដូសទី៣នេះ សម្រាប់ពលរដ្ឋប្រមាណ៣% នៃពលរដ្ឋពេញវ័យសរុប ពិសេសសម្រាប់អ្នកដែលងាយរងគ្រោះក្នុងការឆ្លងកូវីដ-១៩ ខណៈដែលការចាក់ដូសទី៣នេះ ក៏កំពុងធ្វើឡើងនៅប្រទេសជាច្រើនផ្សេងទៀតដែរ ដូចជានៅបារាំង និងអ៊ីស្រាអែលជាដើម។
មន្ត្រីសុខាភិបាលអាមេរិកបន្ថែមថា ការចាក់ដូសទី៣នេះ មិនត្រឹមតែចាត់ទុកជាដូសជំរុញប៉ុណ្ណោះទេ ប៉ុន្ដែ វាក៏ជាដូសបន្ថែម សម្រាប់អ្នកដែលមិនមានប្រព័ន្ធភាពស៊ាំងកើតឡើងក្រោយការចាក់២ដូសរួចផងដែរ។
អត្ថបទគួរអាន
អ្នកដែលអាចចាក់ដូសទី៣បាន ចាំបាច់ត្រូវតែជាអ្នកដែលបានចាក់ដូសទី២ បានយ៉ាងហោចណាស់ ២៨ថ្ងៃ។ ដោយឡែក សម្រាប់អ្នកដែលចាក់វ៉ាក់សាំងត្រឹមតែ១ដូស Johnson & Johnsonវិញ មិនទាន់មានការបញ្ជាក់យ៉ាងណាចំពោះការចាក់ដូសទី៣នេះ នៅឡើយទេ។
វ៉ាក់សាំង Pfizer និង Moderna ត្រូវបានគេមើលឃើញថា គឺមានប្រសិទ្ធភាពការពារខ្ពស់សម្រាប់មនុស្សដែលមានសុខភាពល្អបរិបូរណ៍ ប៉ុន្ដែ សម្រាប់មនុស្សដែលមានប្រព័ន្ធភាពស៊ាំខ្សោយ ឬមានជំងឺប្រចាំកាយ វិញ ប្រសិទ្ធភាពវ៉ាក់សាំងនេះ នឹងមានកាន់តែតិចទៅ។ បើតាមការសិក្សាមួយរបស់នាយកដ្ឋានគ្រប់គ្រង និងការពារជំងឺឆ្លងរបស់អាមេរិក (CDC) បានឲ្យដឹងថា មានប្រហែល ៤០ ទៅ៤៤ ភាគរយ នៃអ្នកដែលឆ្លងកូវីដ-១៩ ទោះបីបានចាក់វ៉ាក់សាំងគ្រប់ចំនួនដូស គឺជាអ្នកដែលមានប្រព័ន្ធភាពស៊ាំខ្សោយ៕
