ជាមួយគ្នានោះ ក៏មានឯកអគ្គរដ្ឋទូតខ្លះបានសម្រេចប្រឆាំងនឹងរបបសឹកភូមា ដោយមិនបានដើរចេញពីតំណែងតាមការបញ្ជានោះទេ ខណៈប្រទេសជាច្រើនក៏មិនព្រមទទួលសារតែងតាំងពីមន្ត្រីទូតថ្មីដែលលើកបន្តុបដោយរបបសឹកនោះដែរ។
យ៉ាងណាមិញកន្លងមក អាសនៈនៅអង្គការសហប្រជាជាតិ គឺជារបស់រដ្ឋាភិបាលដែលក្រុមយោធាបានធ្វើរដ្ឋប្រហារ ហើយផ្ដួលរំលំអំណាចដែលកើតចេញពីឆន្ទៈរបស់ប្រជាជន ជាមួយនឹងការចាប់ឃុំខ្លួនមេដឹកនាំរដ្ឋាភិបាល គឺលោកស្រី អ៊ុង សាន ស៊ូជី ។
បច្ចុប្បន្ន អ្នកអង្គុយលើអាសនៈ និង ជាតំណាងស្របច្បាប់របស់ភូមានៅអង្គការសហប្រជាជាតិ គឺឯកអគ្គរដ្ឋទូត លោក ក្វាវ ម៉ូទុន (Kyaw Moe Tun) ដែលជាមន្ត្រីរបស់លោកស្រី អ៊ុងសាន ស៊ូជី។ ពួកយោធាបានដាក់លិខិតសុំយកអាសនៈនេះម្ដងរួចមកហើយ តែត្រូវបរាជ័យ។
ទន្ទឹមនឹងនេះ ប្រជាជន និងក៏ដូចជាប្រទេសភូមាទាំងមូល កំពុងរង់ចាំការសម្រេចចិត្តរបស់មហាសន្និបាតអង្គការសហប្រជាជាតិ ដែលអាចជាអ្នកដើរតួនាទីក្នុងការសម្រេចថា អ្នកណាដែលជាតំណាងស្របច្បាប់របស់ភូមា ហើយអាចដឹកនាំប្រទេសក្នុងតំបន់អាស៊ានមួយនេះបន្តទៀត។
នៅក្នុងកិច្ចប្រជុំមហាសន្និបាតលើកទី៧៦ នៅសប្តាហ៍ក្រោយនេះ បញ្ហានៅភូមានឹងក្លាយជាប្រធានបទក្តៅគគុកមួយ ដោយគណៈកម្មការពិនិត្យនិងវាយតម្លៃរបស់អង្គការសហប្រជាជាតិដែលមានសមាជិកចំនួន៩ប្រទេស នឹងត្រូវពិនិត្យរួចផ្តល់អនុសាសន៍ដល់ UN ដើម្បីសម្រេចថាភាគីណាមួយជាអ្នកអង្គុយក្នុងអាសនៈរបស់អង្គការសហប្រជាជាតិតទៅទៀត។
អត្ថបទគួរអាន
ដូចដែលបានដឹងស្រាប់ហើយថា ជម្រើសមានតែពីរប៉ុណ្ណោះ រវាង តំណាងមកពីភាគីរដ្ឋាភិបាលបង្រួបបង្រួមជាតិភូមា ដែលបង្កើតឡើងដោយអ្នកនយោបាយ និង រដ្ឋមន្ត្រីមកពីអតីតរដ្ឋាភិបាលរបស់លោកស្រី អ៊ុង សានស៊ូជី និង ម្ខាងទៀតជាតំណាងក្រុមយោធា ដែលដឹកនាំដោយឧត្តមសេនីយ៍ មីន អ៊ុនឡាំង។
សូមជម្រាបថា មហាសន្និបាតអង្គការសហប្រជាជាតិលើកទី៧៦ក្នុងឆ្នាំនេះ នឹងចាប់ផ្តើមធ្វើឡើងពីថ្ងៃទី ១៤ខែកញ្ញាដល់ថ្ងៃទី ៣០ខែកញ្ញាឆ្នាំ ២០២១។ ដូចច្នេះយើងនឹងអាចដឹងបានថានរណានឹងក្លាយជាអ្នកអង្គុយកៅអីរបស់ភូមា នៅអង្គការសហប្រជាជាតិបន្តទៅទៀត ក្នុងពេលឆាប់ៗនេះ។
ស្របពេលដែល កំពុងស្ថិតក្នុងភាពស្រពិចស្រពិលទាក់ទងនឹងអាសនៈនៅអង្គការសហប្រជាតិនេះ រដ្ឋាភិបាលរួបរួមជាតិភូមា ឬហៅថារដ្ឋាភិបាលស្រមោល ដែលបង្កើតឡើងដោយក្រុមអ្នកប្រឆាំងនឹងរបបយោធាភូមា បានបង្ហាញយុទ្ធសាស្ត្រថ្មីមួយកាលពីថ្ងៃអង្គារ ក្នុងគោលបំណងដាក់សម្ពាធលើក្រុមយោធា តាមរយៈសកម្មភាពរបស់កងជីវពលឯករាជ្យ និងកងកម្លាំងជនជាតិភាគតិចនៅតាមព្រំដែន ព្រមទាំងជំរុញឱ្យមន្ត្រីរដ្ឋការស៊ីវិលឈប់បម្រើការងារផងដែរ។ នេះបើតាមការចុះផ្សាយដោយសារព័ត៌មានជប៉ុន Nikkei។
អត្ថបទគួរចាប់អារម្មណ៏
យ៉ាងណាមិញ ការដាក់ចេញយុទ្ធសាស្ត្រថ្មីដូចនេះ គឺផ្ទុយស្រឡះពីការអំពាវនាវរបស់លោក អីវ៉ាន់ យ៉ូស ប្រេសិតពិសេសរបស់អាស៊ាន ដែលបានអំពាវនាវឲ្យមានបទឈប់បាញ់មួយ និងបញ្ឈប់អំពើហឹង្សា រយៈពេល៤ខែសិន។
គួរជម្រាបថា បើតាមអង្គការជួយអ្នកទោសនយោបាយ AAPP ចាប់តាំងពីមានអំពើអំពើហឹង្សាក្រោយរដ្ឋប្រហារមក មនុស្សប្រមាណ១ពាន់នាក់ហើយបានស្លាប់ដោយសារការបង្ក្រាបរបស់យោធា ខណៈ លោកស្រី អ៊ុង សានស៊ូជី កំពុងស្ថិតនៅក្នុងការឃុំខ្លួន និងបានជាប់ចោទក្នុងសំណុំរឿងចំនួន១០ ដែលនាំឱ្យលោកស្រីប្រឈមនឹងការជាប់ទោសរហូតដល់ទៅ ៧៥ឆ្នាំ៕
None
