បើតាមអ្នករៀបចំព្រឹត្តិការណ៍នេះបានឱ្យដឹងថា តំណាងក្រុមហ៊ុន និងរដ្ឋាភិបាលសរុបជិត១៨ម៉ឺននាក់មកពីតំបន់ និងប្រទេសសរុបចំនួន១៣៦ បានចូលរួមក្នុងវេទិកាសេដ្ឋកិច្ចអន្តរជាតិក្រុងសេនភីធឺស្ប៊ើក (St. Petersburg) ចាប់ពីថ្ងៃពុធ ដល់ថ្ងៃសៅរ៍ សប្ដាហ៍មុន។ ប្រធានបទនៃវេទិកាសេដ្ឋកិច្ចសម្រាប់ឆ្នាំនេះ គឺស្ដីពី«មូលដ្ឋានគ្រឹះនៃពិភពលោកពហុប៉ូល»។ លោក ពូទីន បាននិយាយនៅក្នុងសុន្ទរកថាមួយកាលពីថ្ងៃសុក្រសប្ដាហ៍មុនថា រុស្ស៊ីនៅតែជាតួអង្គដ៏សំខាន់មួយនៅក្នុងពាណិជ្ជកម្មពិភពលោក ទោះបីជាមានការដាក់ទណ្ឌកម្មពីសហរដ្ឋអាមេរិក និងអឺរ៉ុបក៏ដោយ។
លោក ពូទីន បាននិយាយថា បណ្តាប្រទេសជាមិត្តរបស់រុស្ស៊ីមានចំនួនជាងបីភាគបួននៃទំហំពាណិជ្ជកម្មរបស់រុស្ស៊ី ហើយលោកក៏បានអំពាវនាវឱ្យមានការអភិវឌ្ឍនៅក្នុងទីផ្សារមូលធនរបស់រុស្ស៊ីរួមទាំងការលើកទឹកចិត្តឱ្យក្រុមហ៊ុននានាធ្វើពាណិជ្ជកម្មភាគហ៊ុនជាសាធារណៈជាមួយនឹងរុស្ស៊ីផងដែរ។
វេទិកាសេដ្ឋកិច្ចក្រុងសេនភីធឺស្ប៊ើកនេះបានផ្តល់វេទិកាសម្រាប់ការពិភាក្សាអំពីការវិនិយោគក្នុងប្រទេសរុស្ស៊ី។ ហើយចំពេលមានសម្ពាធពីបស្ចិមលោកកាន់តែខ្លាំងឡើងនោះ រុស្ស៊ីសង្ឃឹមថា នឹងប្រើវេទិកានេះដើម្បីពង្រឹងទំនាក់ទំនងជាមួយនឹងចិន និងឥណ្ឌា ព្រមទាំងដៃគូពាណិជ្ជកម្ម និងសន្តិសុខដទៃទៀតនៅតំបន់ពិភពលោកខាងត្បូងផងដែរ។
លោក ពូទីន បានចាត់ទុកឯករាជ្យភាពផ្នែកបច្ចេកវិទ្យា គឺជាកត្តាសំខាន់ក្នុងការជំរុញសេដ្ឋកិច្ចរុស្ស៊ី។ ដូច្នេះរុស្ស៊ីនឹងបញ្ចុះបញ្ចូលឱ្យមានការវិនិយោគកាន់តែច្រើនពីប្រទេសចិន ឥណ្ឌា និងកន្លែងផ្សេងទៀត ដើម្បីបង្កើនផលិតកម្មបច្ចេកវិទ្យាទំនើបនៅក្នុងស្រុក៕
អត្ថបទ៖ សុខ មង្គល
