ទិន្នផលស្រូវនៅតំបន់អាស៊ី អាចប្រឈមហានិភ័យដោយសារបញ្ហាអាកាសធាតុនៅឆ្នាំក្រោយ

ក្រុមឈ្មួញ និងអ្នកវិភាគបាននិយាយថា ប្រទេសឥណ្ឌាដែលជាអ្នកនាំចេញអង្ករដ៏ធំបំផុតក្នុងពិភពលោក និងប្រទេសថៃ ដែលជាអ្នកផ្គត់ផ្គង់អង្ករទី២ក្នុងពិភពលោកត្រូវបានគេរំពឹងថា នឹងធ្លាក់ចុះទិន្នផលស្រូវក្រៅរដូវកាលរបស់ពួកគេនៅក្នុងត្រីមាសទី១ ឆ្នាំ២០២៤ ខណៈដែលប្រទេសឥណ្ឌូនេស៊ី ដែលជាអ្នកនាំចូលឈានមុខគេក្នុងពិភពលោកនៅតែជួបគ្រោះរាំងស្ងួតនៅឡើយ។

លោក ភីធឺ ក្លាប់ (Peter Clubb) អ្នកវិភាគនៅក្រុមប្រឹក្សាធញ្ញជាតិ អន្តរជាតិ​ នៅទីក្រុងឡុងដ៍ចក្រភពអង់គ្លេស បាននិយាយថា តម្លៃអង្ករកើនខ្ពស់គួរតែជំរុញឱ្យមានការដាំដុះស្រូវកាន់តែច្រើន ប៉ុន្តែដោយសារតែព្រួយបារម្ភពីលទ្ធភាពទទួលបានទឹកពីអាងស្តុកទឹក ដែលកាន់តែរួមតូចនោះ ទើបបានជាមានការបាត់បង់ទិន្នផលស្រូវនៅក្រៅរដូវកាលបែបនេះ។

លោក ក្លាប់ បាននិយាយថា ឥណ្ឌា និងថៃ ទំនងជារឹតបន្តឹងលើផ្នែកនាំចេញស្រូវអង្ករ ហើយនៅក្នុងប្រទេសឥណ្ឌូនេស៊ី អាងស្តុកទឹក ដែលនឹងផ្គត់ផ្គង់ទឹកសម្រាប់ដំណាំរដូវប្រាំងឆ្នាំ២០២៤ បានធ្លាក់ចុះក្នុងរយៈពេលប៉ុន្មានខែថ្មីៗនេះនៅក្នុងរដូវប្រាំងនេះ។

ការផ្គត់ផ្គង់អង្ករពិភពលោកបានរឹតបន្តឹងនៅឆ្នាំនេះបន្ទាប់ពីអាកាសធាតុក្តៅ និងស្ងួតហែងបណ្តាលមកពីបាតុភូតអាកាសធាតុអែលនីណូបានកាត់បន្ថយការផលិតស្រូវនៅតាមប្រទេសនាំចេញ និងនាំចូលសំខាន់ៗមួយចំនួន។

ការនាំចេញអង្កររបស់ពិភពលោកភាគច្រើនមកពីតំបន់អាស៊ីជំរុញឱ្យតម្លៃអង្ករនៅតាមមជ្ឈមណ្ឌលនាំចេញសំខាន់ៗបានកើនឡើងប្រហែល៣០-៤០%នៅក្នុងឆ្នាំ២០២៣ ដោយកាលពីដើមឆ្នាំនេះបានកើនឡើងខ្ពស់បំផុតក្នុងពេល១៥ឆ្នាំមកនេះ បន្ទាប់ពីឥណ្ឌាបានរឹតបន្តឹងការនាំចេញរបស់ខ្លួន។

អ្នកព្យាករអាកាសធាតុរបស់រដ្ឋាភិបាលអាមេរិកបាននិយាយកាលពីខែវិច្ឆិកា ថា បញ្ហាអាកាសធាតុអែលនីណូនឹងបន្តគ្របដណ្ដប់អឌ្ឍគោលខាងជើងរហូតដល់ចន្លោះពីខែមេសា ដល់ខែមិថុនា ឆ្នាំ២០២៤ ខណៈដែលការិយាល័យអាកាសធាតុរបស់ប្រទេសជប៉ុន បាននិយាយថា មានឱកាស៨០% ដែលថា បាតុភូតនេះនឹងបន្តឆ្លងកាត់និទាឃរដូវនៅភាគខាងជើងនេះ។

ពាណិជ្ជករ និងអ្នកវិភាគបាននិយាយថា ជាមួយនឹងការធ្លាក់ចុះផលិតកម្មស្រូវគួបផ្សំនឹងហានិភ័យអតិផរណាម្ហូបអាហារ ឥណ្ឌាទំនងជាបន្តរឹតបន្តឹងការនាំចេញយ៉ាងហោចណាស់រហូតដល់ឆមាសទី១ឆ្នាំក្រោយ ខណៈដែលថៃ ត្រូវបានគេព្យាករថា នឹងមានអតិរេកទាបសម្រាប់ការនាំចេញ។ ទីភ្នាក់ងារវាយតម្លៃស្រូវអង្ករ BMI បានកត់សម្គាល់ថា ក្នុងករណីគ្មានការនាំចេញអង្កររបស់ឥណ្ឌា គេរំពឹងថា ប្រទេសថៃ និងវៀតណាមនឹងមានចំណែកដ៏ធំនៃការចែកចាយអង្ករនៅក្នុងពិភពលោក ដែលនឹងធ្វើឱ្យតម្លៃពាណិជ្ជកម្មស្រូវអង្ករឆ្លើយតបនឹងលក្ខខណ្ឌអាកាសធាតុនៅក្នុងទីផ្សារណាមួយ៕

អត្ថបទ៖ សុខ ជា