ចិន គ្រោងចាក់បញ្ចូលដើមទុន៥៤ពាន់លានដុល្លារអាម៉េរិក ដើម្បីស្តារវិស័យហិរញ្ញវត្ថុ
ចិន កំពុងចាត់វិធានការពង្រឹងប្រព័ន្ធហិរញ្ញវត្ថុរបស់ខ្លួន ដោយគ្រោងចាក់បញ្ចូលដើមទុនរហូតដល់ ៥៤ពាន់លានដុល្លារអាម៉េរិក ទៅក្នុងធនាគារ និងក្រុម…
តម្លៃស្រូវនៅតំបន់ដីសណ្ដទន្លេមេគង្គក្នុងប្រទេសវៀតណាម បានធ្លាក់ចុះរហូតដល់១៧% ត្រឹមរយៈពេលតែមួយសប្តាហ៍ប៉ុណ្ណោះ ដែលស្ថានភាពនេះកំពុងរុញច្រានកសិករនៅតំបន់នោះឱ្យប្រឈមនឹងការខាតបង់។ លោក ង្វៀង ថាញ់ឡុក (Nguyen Thanh Loc) កសិករមួយរូបនៅក្នុងខេត្តអានយ៉ាងបានឱ្យដឹងថា ស្រូវដែលលោកទើបតែប្រមូលផលថ្មីៗលើផ្ទៃដីដាំដុះ៣ហិកតា ត្រូវបានឈ្មួញទិញក្នុងតម្លៃត្រឹមតែជាង៩០០រៀល ឬ២៤សេនដុល្លារប៉ុណ្ណោះក្នុងមួយគីឡូក្រាម។ លោកបានត្អូញត្អែរថា ដោយសារតែតម្លៃជីកសិកម្មកើនឡើងថ្លៃជាងមុន រួមផ្សំជាមួយនឹងតម្លៃស្រូវធ្លាក់ចុះទាបបែបនេះបានធ្វើឱ្យរូបលោកប្រឈមនឹងការខាតបង់ប្រាក់ប្រមាណ៣៨០ដុល្លារអាម៉េរិក។
ជុំវិញបញ្ហាធ្លាក់ចុះតម្លៃស្រូវនេះលោក ង្វៀង វិញជុង (Nguyen Vinh Trong) នាយកក្រុមហ៊ុនកែច្នៃអង្ករ Viet Hung បានពន្យល់ថា ការប្រែប្រួលអវិជ្ជមាននៃតម្លៃស្រូវនេះ គឺបណ្តាលមកពីតម្រូវការបញ្ជាទិញមានភាពទន់ខ្សោយនៅលើទីផ្សារនាំចេញសំខាន់ៗដូចជាហ្វីលីពីន ចិន និងបណ្តាប្រទេសមួយចំនួននៅទ្វីបអាហ្វ្រិក។
យោងតាមទិន្នន័យពីក្រសួងកសិកម្ម និងអភិវឌ្ឍន៍ជនបទវៀតណាម នៅក្នុងរយៈពេល៨ខែឆ្នាំ២០២៦នេះ ការនាំចេញអង្កររបស់វៀតណាមសម្រេចបានជាង៦លានតោន ដែលតួលេខនេះមានការថយចុះ៥% ខណៈដែលទំហំទឹកប្រាក់ទទួលបានមានត្រឹមតែជាង២,៩ពាន់លានដុល្លារអាម៉េរិកប៉ុណ្ណោះ គឺធ្លាក់ចុះ ១០% បើធៀបនឹងរយៈពេលដូចគ្នាកាលពីឆ្នាំមុន៕
ដោយៈ សរ សុជាតិ
