មហាសេដ្ឋីប្រាក់ពាន់លានដុល្លាររូបនេះ បានយកកោះ ឈ្មោះ Necker ដែលជាទ្រព្យសម្បត្តិផ្ទាល់ខ្លួនរបស់លោក ដើម្បីធ្វើជាទ្រព្យដាក់បញ្ចាំដើម្បីទទួលបានប្រាក់ទៅជួយសង្គ្រោះក្រុមហ៊ុនអាកាសចរណ៍របស់លោក គឺក្រុមហ៊ុន Virgin Atlantic ពីវិបត្តិក្ស័យធន។
នៅក្នុងលិខិតចំហមួយ ជូនទៅកាន់ក្រុមបុគ្គលិករបស់ក្រុមហ៊ុន Virgin Group កាលពីដើមសប្ដាហ៍នេះ លោក Branson បានសរសេរថា ក្រុមហ៊ុន Virgin Group មានប្រតិបត្តិការនៅក្នុងឧស្សាហកម្មជាច្រើន ដែលរងផលប៉ះពាល់ខ្លាំងព្រោះតែមេរោគកូរ៉ូណា ឬ កូវីដ-១៩ រួមមាន ក្រុមហ៊ុនអាកាសចរណ៍, កន្លែងកម្សាន្ដ, សណ្ឋាគារ និងនាវាទេសចរណ៍ជាដើម ដែលមានបុគ្គលិកសរុបទាំងអស់ជាង ៧ម៉ឺននាក់ នៅក្នុងប្រទេសចំនួន៣៥ ប្រទេស។
លោក Branson សរសេរក្នុងលិខិតយ៉ាងដូច្នេះថា «ដូចជាទ្រព្យសម្បត្តិផ្សេងទៀតរបស់ក្រុមហ៊ុន Virgin ក្រុមការងាររបស់យើង នឹងបង្កើនសាច់ប្រាក់ថែមទៀត តាមរយៈដីកោះ តាមលទ្ធភាពធ្វើទៅបាន ដើម្បីសង្គ្រោះ រក្សាការងារឲ្យបានច្រើននៅក្នុងក្រុមហ៊ុនតាមដែលអាចធ្វើទៅបាន »។
អត្ថបទទាក់ទង!
ក្រុមហ៊ុនVirgin Group មានប្រាក់ចំណូលប្រចាំឆ្នាំទូទាំងសកលលោក ជាង ២១ ពាន់លានដុល្លារ។ ក្នុងនាមជាប្រធានក្រុមប្រឹក្សាភិបាលដែលមានលុយរាប់ពាន់លានដុល្លារ លោក Branson បានគ្រប់គ្រងលើក្រុមហ៊ុនប្រមាណ ៥០០ ក្រុមហ៊ុន ហើយលោកក៏ត្រូវបានគេស្គាល់ ដោយសារតែចរិតលក្ខណៈ និងអាកប្បកិរិយាប្លែកៗរបស់គាត់។ លោកត្រូវបានគេដឹងថា បានបង្កើតទ្រព្យសម្បត្តិជាង ៤,៤ ពាន់លានដុល្លារអាមេរិក ដែលភាគច្រើនគឺមានផ្សាភ្ជាប់ជាមួយនឹងក្រុមហ៊ុន The Virgin Group។
លោក Richard Branson បានចាប់ផ្ដើមអាជីវកម្មដំបូងរបស់គាត់នៅអាយុត្រឹម ១៥ឆ្នាំប៉ុណ្ណោះ នៅក្នុងឆ្នាំ១៩៧២។ លោកគឺជាស្ថាបនិកក្រុមហ៊ុន Virgin Records ហើយបានបង្កើតសម្ព័ន្ធក្រុមហ៊ុន Virgin Group។ តាមរយៈក្រុមហ៊ុននេះ លោកបានបង្កើតទ្រព្យសម្បត្តិរបស់លោកប្រមាណជាង ៤,៤ ពាន់លានដុល្លារអាមេរិក។
ក្រុមហ៊ុន Virgin Media, Virgin Australia, និង Virgin Atlantic គឺជាផ្នែកមួយនៃក្រុមហ៊ុនធំបំផុតស្ថិតក្រោម Virgin Group៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
