ប្រទេសរុស្ស៊ីបានដកកងកម្លាំងឈ្លានពានរបស់ខ្លួនចេញពីតំបន់ក្បែរទីក្រុងកៀវ នៅដើមខែមេសា បន្ទាប់ពីបរាជ័យក្នុងការដណ្តើមយកទីក្រុងនេះ ដែលចាប់តាំងពីពេលនោះមក អ៊ុយក្រែនបានរៀបចំដំណើរទស្សនកិច្ចសម្រាប់មន្ត្រីកំពូលៗមកពីសហរដ្ឋអាមេរិក និងសម្ព័ន្ធមិត្តអឺរ៉ុបជាច្រើននាក់។
ប៉ុន្តែកាលពីថ្ងៃព្រហស្បតិ៍ ការផ្ទុះឡើងនៃសម្លេងគ្រាប់បែកកើតឡើងភ្លាមៗ បន្ទាប់ពីលោក Guterres បានបញ្ចប់កិច្ចពិភាក្សាជាមួយប្រធានាធិបតីអ៊ុយក្រែនលោក Volodymyr Zelenskyy នៅក្នុងកិច្ចពិភាក្សាដែលបានគូសបញ្ជាក់អំពីការព្រួយបារម្ភថា ទីក្រុងកៀវ នឹងក្លាយជាកន្លែងងាយរងគ្រោះដោយសារអាវុធធុនធ្ងន់ៗរបស់រុស្ស៊ី។
មន្ត្រីអ៊ុយក្រែនបានអះអាងថា គ្រាប់រ៉ុក្កែតបានធ្លាក់ចូលទៅក្នុងតំបន់ ស៊ីវឈីកូ (Shevchenko) នៃរដ្ឋធានីកៀវ ហើយបានបំផ្លាញអគារលំនៅដ្ឋានកម្ពស់ ២៥ ជាន់ បណ្តាលឲ្យមនុស្សយ៉ាងហោចណាស់ ១០ នាក់រងរបួស។
លោក Guterres បានប្រាប់ទូរទស្សន៍ព័រទុយហ្គាល់ RTP អំពីការផ្លោងមីស៊ីលចូលទៅក្នុងទីក្រុងកៀវនេះថា ការវាយប្រហារលើទីក្រុងនេះ ធ្វើឱ្យលោកភ្ញាក់ផ្អើលខ្លាំងណាស់ ហើយមិនមែនដោយសារតែលោកព្រួយបារម្ភពីសុវត្តិភាពរបស់លោកនោះទេ ប៉ុន្តែដោយសារតែទីក្រុង កៀវ គឺជាទីក្រុងដ៏ពិសិដ្ឋសម្រាប់ជនជាតិអ៊ុយក្រែនផ្ទាល់ ដែលត្រូវបានខ្ទិចខ្ទីជាដំណំ ដោយសារការវាយប្រហាររបស់រុស្ស៊ី។
អត្ថបទគួរអាន
ស្របពេលជាមួយគ្នានោះដែរ លោក Zelenskyy បាននិយាយថា ការបំផ្ទុះនេះបង្ហាញថា អ៊ុយក្រែនមិនត្រូវទម្លាក់ការប្រុងប្រយ័ត្ននោះទេ គឺត្រូវតែការពារយ៉ាងយកចិត្តទុកដាក់ ព្រោះសង្រ្គាមមិនទាន់បានបញ្ចប់ឡើង។
គួរកត់សម្គាល់ថា ការពិភាក្សារបស់លោក Guterres ជាមួយលោក Zelenskyy ក៏បានផ្តោតសំខាន់មួយផ្នែកទៅលើការជម្លៀសយុទ្ធជនអ៊ុយក្រែន និងជនស៊ីវិលដែលជាប់គាំងនៅក្នុងរោងចក្រដែកមួយក្នុងទីក្រុង Mariupol ដែលត្រូវបានឡោមព័ទ្ធដោយទាហានរុស្ស៊ីផងដែរ។ ក្នុងនោះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានយល់ព្រមចំពោះការចូលរួមនៃគោលការណ៍របស់អង្គការសហប្រជាជាតិ និងកាកបាទក្រហម ក្នុងការជម្លៀសប្រជាជនចេញពីរោងចក្រនេះ ក្នុងអំឡុងពេលកិច្ចពិភាក្សាដាច់ដោយឡែកនៅទីក្រុងមូស្គូជាមួយលោក Guterres កាលពីថ្ងៃទី ២៦មេសា។
គួរជម្រាបថា ប្រធានាធិបតីអាមេរិកលោក Joe Biden បានស្នើសុំសភាជាតិអាមេរិកចំនួនទឹកប្រាក់ ៣៣ពាន់លានដុល្លារបន្ថែម ដើម្បីគាំទ្រដល់ការធ្វើសង្គ្រាមសម្រាប់ប្រទេសអ៊ុយក្រែន។ សំណើផ្តល់មូលនិធិរួមមានជាង ២០ ពាន់លានដុល្លារ សម្រាប់អាវុធ គ្រាប់រំសេវ និងជំនួយយោធាផ្សេងទៀត ព្រមទាំងជំនួយសេដ្ឋកិច្ចផ្ទាល់ចំនួន ៨,៥ ពាន់លានដុល្លារដល់រដ្ឋាភិបាលអ៊ុយក្រែន និងជំនួយមនុស្សធម៌ចំនួន ៣ ពាន់លានដុល្លារផងដែរ។ ប្រធានាធិបតីអ៊ុយក្រែនវិញ រំពឹងថា ទឹកប្រាក់នេះ នឹងត្រូវបានសភាអាមេរិក អនុម័តឆាប់ៗនេះ ដើម្បីអាចឲ្យអ៊ុយក្រែនយកមកប្រើប្រាស់បានទាន់ពេលវេលា៕
អត្ថបទ៖ វ៉ាន់ ស្រីរ័ត្ន
None
