សេដ្ឋកិច្ចអាស៊ាននៅឆ្នាំ២០២២ ត្រូវបានគេព្យាករណ៍ថា នឹងមានកំណើនក្នុងរង្វង់៥,៣% និងកំណើន ៤,៩%នៅឆ្នាំ២០២៣ បើទោះបី សេដ្ឋកិច្ចសកលស្ថិតក្នុងស្ថានភាពផុយស្រួយនៃការទទួលរងនូវវិបត្តិក៏ដោយ។
នាពិធីបើកកិច្ចប្រជុំកំពូលធុរកិច្ច និងវិនិយោគអាស៊ានឆ្នាំ២០២២ ក្រោមមូលបទ«អាស៊ានរួមគ្នាធ្វើ ដោះស្រាយបញ្ហាប្រឈមទាំងអស់គ្នា» សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានប្ដូរវេនអាស៊ាននៅឆ្នាំនេះ បានដាក់ចេញនូវយុទ្ធសាស្ត្របន្ថែមចំនួន៤ចំណុចនៅក្រោមសសរស្តម្ភសហគមន៍សេដ្ឋកិច្ចអាស៊ាន សំដៅរួមចំណែកជួយអភិវឌ្ឍន៍សេដ្ឋកិច្ចតំបន់អាស៊ានឲ្យកាន់តែប្រសើរ។ យុទ្ធសាស្ត្រទាំងនោះរួមមានការពង្រឹងការតភ្ជាប់ឌីជីថល, វិទ្យាសាស្ត្រ និងបច្ចេកវិទ្យា, ការកាត់បន្ថយគម្លាតអភិវឌ្ឍន៍ ដើម្បីភាពប្រកួតប្រជែងរបស់អាស៊ាន, ការជំរុញសមាហរណកម្ម, បរិយាប័ន្ន, ភាពធន់ និងភាពប្រកួតប្រជែងអាស៊ានឲ្យខ្លាំងជាងមុន និងអាស៊ានជាសកលសម្រាប់ភាពរីកចម្រើន និងការអភិវឌ្ឍសំដៅជំរុញកំណើនសេដ្ឋកិច្ចឡើងវិញប្រកបដោយចីរភាព, បរិយាប័ន្ន និងភាពធន់។
អត្ថបទគួរអាន
បើតាមការគូសបញ្ជាក់របស់សម្តេចតេជោ ហ៊ុន សែន ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក៣បានវាយតម្លៃ និងព្យាករណ៍ថា សេដ្ឋកិច្ចអាស៊ាននឹងសម្រេចបានកំណើនផលិតផលក្នុងស្រុកសរុបក្នុងអត្រា៥,៣% នៅឆ្នាំ២០២២ និងអត្រា៤,៩% នៅឆ្នាំ២០២៣ បន្ទាប់ពីសម្រេចបានកំណើនក្នុងអត្រា៣,១% នៅឆ្នាំ២០២១។ សម្តេចតេសង្កត់ធ្ងន់ថា ទោះបីជាវិបត្តិនៃជំងឺកូវីដ-១៩ ជាសកលកំពុងស្រាកស្រាន្ដគួរឱ្យកត់សម្គាល់ក៏ដោយ តែស្ថានភាព និងទស្សនវិស័យសេដ្ឋកិច្ចសកលនៅតែមានភាពផុយស្រួយ និងងាយរងនូវវិបត្តិថ្មី ដោយសារពិភពលោកនៅតែបន្តប្រឈមជាមួយបញ្ហាថ្មីៗ និងកាន់តែស្មុគស្មាញ ដែលកំពុងកើតមានជាបន្តបន្ទាប់។ សម្រាប់សម្តេចតេជោ ហ៊ុន សែន ប្រទេសជាសមាជិកអាស៊ាន និងដៃគូនានាត្រូវតែបន្តសហការគ្នា ដើម្បីធានាថា អាស៊ានជាតំបន់ ដែលមានភាពទាក់ទាញ និងរស់រវើកសម្រាប់ការធ្វើពាណិជ្ជកម្ម និងការវិនិយោគ។
ប្រមុខរាជរដ្ឋាភិបាលកម្ពុជាបានចាត់ទុកវិស័យឯកជន គឺជាដៃមិនអាចខ្វះបានក្នុងការរួមចំណែកជួយអភិវឌ្ឍន៍សង្គម និងសេដ្ឋកិច្ចកម្ពុជា ក៏ដូចអាស៊ានទាំងមូល។ កម្ពុជា ក៏ដូចជាអាស៊ាននឹងមិនអាចស្តារកំណើនសេដ្ឋកិច្ច ក៏ដូចជាបើកសកម្មភាពសង្គម និងសេដ្ឋកិច្ចឡើងវិញបានឡើយ ប្រសិនបើគ្មានការចូលរួមពីវិស័យឯកជនក្នុងការទប់ស្កាត់ការឆ្លងរាលដាលនៃជំងឺកូវីដ-១៩។ ជាមួយគ្នានេះ សម្តេចតេជោ ហ៊ុន សែន បានកោតសរសើរដល់ក្រុមប្រឹក្សាពិគ្រោះយោបល់ធុរកិច្ចអាស៊ាន ក្នុងការដាក់ចេញនូវសមិទ្ធផលការងារប្រចាំឆ្នាំ ព្រមទាំងលើកឡើងនូវអនុសាសន៍ល្អៗមួយចំនួនសម្រាប់អាស៊ានពិចារណា ដែលគាំទ្របន្ថែមទៀតដល់ដំណើរការកសាងសហគមន៍សេដ្ឋកិច្ចអាស៊ាន តាមរយៈការជួយធ្វើឱ្យកាន់តែស៊ីជម្រៅនូវសមាហរណកម្មសេដ្ឋកិច្ចតំបន់៕
