រដ្ឋមន្ត្រីក្រសួងថាមពល ក៏រំពឹងថា អង្គការប្រទេសនាំចេញប្រេង OPEC និងបណ្តាប្រទេសផលិតប្រេងធំៗ នឹងធ្វើការកាត់បន្ថយ ផលិតកម្មប្រេង ដោយការស្ម័គ្រចិត្តដូចគ្នាដែរ ដើម្បីរក្សាស្ថិរភាពថ្លៃប្រេង នៅលើទីផ្សារសកលលោក។
រដ្ឋាភិបាលប្រទេសអារ៉ាប៊ីសាអ៊ូឌីត បានបញ្ជាក់ថា គោលបំណងផ្តួចផ្តើមកាត់បន្ថយផលិតកម្មប្រេងនេះ គឺដើម្បីជំរុញឲ្យ បណ្តាប្រទេសដទៃចូលរួមនៅក្នុង កិច្ចព្រមព្រៀងរបស់អង្គការ OPEC ដែលបានយល់ព្រមគ្នា កាត់បន្ថយផលិតកម្មប្រេង ដើម្បីធ្វើឲ្យមានតុល្យភាពថ្លៃប្រេង នៅលើទីផ្សារ។
យ៉ាងណាក៏ដោយចុះ ការសម្រេចរបស់ អារ៉ាប៊ីសាអ៊ូឌីត បានធ្វើឲ្យតម្លៃប្រេងកើនឡើងមកវិញបន្តិច ដោយគិតត្រឹមថ្ងៃទី ១៣ ខែឧសភា ឆ្នាំ២០២០ ទីផ្សារប្រេងឆៅ Brent របស់អង់គ្លេស កើនឡើងប្រមាណ ១% មកនៅជិត ៣០ដុល្លារ ក្នុងមួយបារ៉ែល ខណៈទីផ្សារអាមេរិក West Texas Intermediate កើនប្រមាណ ៦% មកនៅជាង ២៥ដុល្លារក្នុងមួយបារ៉ែល។
អត្ថបទគួរអាន
កាលពីខែមេសាកន្លងទៅ សមាជិកអង្គការ OPEC បានយល់ស្របគ្នា កាត់បន្ថយផលិតកម្មប្រេងឆៅ សរុបទាំងអស់ ៩,៧លានបារ៉ែល ក្នុងមួយថ្ងៃ ចាប់ផ្តើមពីខែឧសភានេះ ក៏ប៉ុន្តែចំនួននេះ គឺនៅមានកម្រិតទាបនៅឡើយ សម្រាប់ទីផ្សារប្រេង ដែលជន់ជោរទៅដោយការផលិតលើសពីតម្រូវការ និងតម្រូវការធ្លាក់ចុះខ្លាំងដោយសារតែវិបត្តិកូវីដ-១៩។
គួរជម្រាបដែរថា អង្គការ OPEC ក៏បានទម្លាក់ការព្យាករជាថ្មីម្តងទៀត អំពីតម្រូវការប្រើប្រាស់ប្រេងទូទាំងសកលលោកថា នឹងធ្លាក់ចុះជាង ៩លានបារ៉ែលក្នុងមួយថ្ងៃ សម្រាប់ឆ្នាំ ២០២០នេះ។ អង្គការនេះគូសបញ្ជាក់បន្ថែមថា ការកាត់បន្ថយការផ្គត់ផ្គង់ប្រេង នឹងជួយបង្កើតឲ្យមាន តុល្យភាពតម្លៃប្រេងនៅលើទីផ្សារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
