ទីបំផុត ផ្លែមៀនស្រស់របស់កម្ពុជាត្រូវបានសម្ពោធនាំចេញជាផ្លូវការទៅកាន់ទីផ្សារចិនហើយ
បន្ទាប់ពីចរចាអស់រយៈពេលជាង៣ឆ្នាំ និងបានអនុវត្តការផលិតវេខ្ចប់ស្របតាមស្ដង់ដារតម្រូវរបស់រដ្ឋបាលគយចិនរួចមក នៅទីបំផុត ផ្លែមៀនស្រស់របស់កម្ពុជា…
កម្មវិធីប្រកួតជំនាញថ្នាក់ជាតិលើកទី៨នេះបានចាប់ផ្ដើមកាលពីថ្ងៃទី ២៤ ហើយនឹងបន្តរហូតដល់ថ្ងៃទី ២៨ តុលា ដែលមានរយៈពេលប្រាំថ្ងៃជាប់គ្នា ។
កម្មវិធីប្រកួតជំនាញថ្នាក់ជាតិ ត្រូវបានរៀបចំរៀងរាល់ពីរឆ្នាំម្ដង ហើយការប្រកួតក្នុងឆ្នាំនេះ មានការចូលរួមពីបេក្ខជនចំនួន ៦១ រូប ដើម្បីប្រជែងយកតំណែងជើងឯក។
បេក្ខជនទាំងអស់នោះ មកពីគ្រឹះស្ថានបណ្ដុះបណ្ដាលចំនួន ១៣ ដែលផ្ដល់ការបណ្ដុះបណ្ដាលបច្ចេកទេស និងវិជ្ជាជីវៈដល់យុវជនកម្ពុជា ដែលក្នុងនោះរួមមាន វិទ្យាស្ថានអភិវឌ្ឍន៍មុខជំនាញកម្ពុជា-ថៃ អង្គការ PSE សាលាដុនបូស្កូ និងគ្រឹះស្ថានផ្សេងទៀត ។
កម្មវិធីប្រកួតនេះ ផ្ដោតលើមុខជំនាញជាច្រើនរួមមាន ជំនាញតបណ្ដាញអគ្គិសនី ជំនាញសរសេរកម្មវិធីកុំព្យូទ័រធុរកិច្ច ជំនាញរៀបឥដ្ឋ និងជំនាញរៀបការ៉ូជាដើម។
ក្នុងឱកាសអញ្ជើញជាអធិបតីក្នុងពិធីបើកនោះ ឯកឧត្តម បណ្ឌិតពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា៖ “គោលបំណងនៃការរៀបចំឲ្យមានការប្រកួតប្រជែងជំនាញ នេះ គឺដើម្បីផ្ដល់នូវវេទិកាមួយ សម្រាប់យុវជន សិស្ស-និស្សិត គ្រូបង្រៀន ទីផ្សារការងារ ឧស្សាហកម្ម ឯកជន និងភាគីពាក់ព័ន្ធទាំងអស់ ដើម្បីបង្កើនទំនាក់ទំនង មិត្តភាព សហប្រតិបត្តិការ ការផ្លាស់ប្ដូរជំនាញ និងលើកកម្ពស់ការអប់រំ បណ្ដុះបណ្ដាល បច្ចេកទេស និងវិជ្ជាជីវៈរបស់កម្ពុជា”។
ក្រុមហ៊ុន អេសស៊ីជី បានឲ្យដឹងថា ការឧបត្ថម្ភដល់កម្មវិធីប្រកួតប្រជែងបែបនេះ គឺមានគោលបំណងចូលរួមជាមួយរដ្ឋាភិបាលក្នុងការអភិវឌ្ឍជំនាញរបស់ កម្លាំងពលកម្មរបស់ប្រទេស កម្ពុជាឲ្យកាន់តែមានជំនាញ និងផលិតភាពខ្លាំងជាងមុន ហើយទៅថ្ងៃអនាគត ពួកគេនឹងអាចជួយជំរុញផលិតភាពរបស់ក្រុមហ៊ុនបាន នៅពេលដែលកម្លាំងពលកម្មជំនាញទាំងនោះចូលរួមធ្វើការបម្រើឲ្យសកម្មភាពអាជីវកម្មរបស់ក្រុមហ៊ុន។
ក្នុងកម្មវិធីប្រកួតជំនាញថ្នាក់ជាតិនេះ បេក្ខជនដែលឈ្នះបានមេដាយមាសនឹងទទួលបានរង្វាន់លើកទឹកចិត្ជាទឹកប្រាក់ ៣ លានរៀន មេដាយប្រាក់ទទួលបាន ២ លានរៀន និងមេដាយសំរិទ្ធទទួលបាន ១ លានរៀល ។ បេក្ខជនជ័យលាភី ក៏មានឱកាសទៅចូលរួមប្រកួតប្រជែងជំនាញនៅថ្នាក់តំបន់ និងសកលលោកផងដែរ ។
ឯកឧត្តម បណ្ឌិតពេជ សោភ័ន មានប្រសាសន៍ថា កន្លងមកកម្ពុជាធ្លាប់បានចូលរួមនៅក្នុងការប្រកួតជំនាញនៅថ្នាក់អាស៊ានជាច្រើនលើកមកហើយ ហើយក៏បានឈ្នះមេដាយសម្រាប់ប្រទេសជាតិផងដែរ។ ឯកឧត្តម បណ្ឌិត បានបន្តថា ក្នុងឆ្នាំ ២០១៥ កម្ពុជាក៏បានចូលរួមក្នុងការប្រកួតជំនាញនៅក្នុងប្រទេសចិនដោយបានឈ្នះមេដាយមាសសម្រាប់វិញ្ញាសារម៉ាស៊ីនស្វ័យប្រវត្តិកម្មថែមទៀតផង។
