ព្រឹតិបត្តិស្តីពីវិនិយោគិន និងការវិនិយោគរបស់គណៈកម្មការមូលបត្រកម្ពុជាដែលបានចេញផ្សាយថ្មីៗនេះ បានគូសបញ្ជាក់ថា គ្រាន់តែក្នុងត្រីមាសទី៣ ឆ្នាំ២០២០ នេះវិនិយោគិនដែលទទួលបានអត្តសញ្ញាណវិនិយោគមានចំនួនជាង ១ពាន់វិនិយោគិនដែលមានការកើនឡើងជាង ៣៣ភាគរយ ធៀបនឹងត្រីមាសទី២ ឆ្នាំ២០២០។
ទោះយ៉ាងណា បើតាមអ្នកជំនាញនៅក្នុងទីផ្សារមូលបត្រអះអាងថា បើទោះបីជានៅឆ្នាំ២០២០ នេះមានក្រុមហ៊ុនជាច្រើនមកប្រកាសចុះបញ្ជីនៅក្នុងផ្សារមូលបត្រកម្ពុជាក៏ដោយ តែការជួញដូរភាគហ៊ុនមានការធ្លាក់ពីទំហំជួញដូរជាមធ្យមខ្ទង់១៥ម៉ឺនដុល្លារ មកនៅត្រឹម១៣ ម៉ឺនដុល្លារ ក្នុងមួយថ្ងៃ។
អត្ថបទទាក់ទង!
បើតាមព្រឹតិបត្តិស្តីពី វិនិយោគិន និងការវិនិយោគរបស់គណៈកម្មការមូលបត្រកម្ពុជាបង្ហាញថា នៅត្រីមាសទី៣ ឆ្នាំ២០២០នេះ មានវិនិយោគិនមកបើកគណនីយជួញដូរនៅតាមបណ្តាក្រុមហ៊ុនមូលបត្រទាំងអស់សរុបមានជាង ១ពាន់គណនីជួញដូរ ធៀបនឹងត្រីមាសទី២ មានការថយចុះជាង១០០ គណនី និងប្រតិបត្តិទូទាត់ថយចុះ៣៧ភាគរយ។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជា ធ្លាប់បានលើកឡើងថា ស្របពេលដែលវិស័យផ្សេងៗទៀតនៅតែដំណើរទៅមុខដោយរលូន ឯកឧត្តម នៅតែរំពឹងខ្ពស់ថា ទីផ្សារមូលបត្រកម្ពុជានៅតែបន្តការរីកចម្រើនទៅមុខ ដែលជាក់ស្តែងផ្សារភាគហ៊ុនកម្ពុជានៅតែមានក្រុមហ៊ុនថ្មីៗចាប់អារម្មណ៍មកចុះបញ្ជី និងកំពុងធ្វើការងារជាមួយគ្នាជាបន្តបន្ទាប់ ដោយគិតថា នៅដើមឆ្នាំ២០២១ នឹងមានក្រុមហ៊ុនថ្មីចំនួន២ បន្ថែមទៀតចូលផ្សារភាគហ៊ុនកម្ពុជា៕
None
