តូចតែខ្លឹម! សិង្ហបុរី មានសេដ្ឋី ដែលមានទ្រព្យសម្បត្តិចាប់ពី៣០លានដុល្លារច្រើនជាងគេនៅតំបន់អាស៊ាន

​​សិង្ហបុរី បានក្លាយជាប្រទេស ដែលមានសេដ្ឋីមានទ្រព្យសម្បត្តិចាប់ពី៣០លានដុល្លារឡើងទៅច្រើនជាងគេនៅតំបន់អាស៊ានរហូតដល់៧,១១៧នាក់នៅឆ្នាំ២០២៦ ហើយតាមការប៉ាន់ស្មានត្រឹមឆ្នាំ២០៣១ ចំនួនសេដ្ឋី ដែលមានទ្រព្យសម្បត្តិក្នុងកម្រិតនេះនៅសិង្ហបុរីនឹងកើនឡើង១,៥០០នាក់បន្ថែមទៀត។ បើទោះបីជាឈរនៅកំពូលតារាងក្នុងតំបន់អាស៊ាន ក៏ពិតមែន ប៉ុន្តែបើធៀបនឹងកម្រិតពិភពលោក សិង្ហបុរី ស្ថិតនៅលំដាប់ថ្នាក់ទី២០។

បន្ទាប់ពីសិង្ហបុរី ប្រទេសឥណ្ឌូនេស៊ី ដែលជាមហាអំណាចសេដ្ឋកិច្ច និងមានប្រជាជនច្រើនជាងគេក្នុងតំបន់បានជាប់ចំណាត់ថ្នាក់លេខ២ ដោយមានសេដ្ឋីប្រមាណ៣,៨៣៣នាក់។ ដោយឡែកប្រទេសថៃ ជាប់ចំណាត់ថ្នាក់ទី៣ មានសេដ្ឋីជាង២,៨០០នាក់តាមពីក្រោយដោយហ្វីលីពីន មានចំនួន១,៩00នាក់ ម៉ាឡេស៊ី១,៥៦៦នាក់ និងវៀតណាម មានចំនួន១,២៣៣នាក់​។

ងាកទៅមើលកម្រិតពិភពលោកឯណោះវិញ សហរដ្ឋអាម៉េរិក នៅតែបន្តគ្រងតំណែងជើងឯក ដែលមានសេដ្ឋីច្រើនជាងគេបំផុត ពោលគឺមានរហូតដល់ជាង២៥ម៉ឺននាក់ ខណៈចិន ឈរលំដាប់ទី២ មានសេដ្ឋីជាង ១២ម៉ឺននាក់។

លោក ហ្គាលវេន តាន (Galven Tan) នាយកប្រតិបត្តិក្រុមហ៊ុន Knight Frank Singapore ដែលជាម្ចាស់របាយការណ៍ខាងលើបានពន្យល់ថា មូលហេតុដែលសិង្ហបុរីទាក់ទាញសេដ្ឋីបានច្រើនបែបនេះ គឺដោយសារស្ថិរភាពនយោបាយ និងហានិភ័យផ្នែកច្បាប់កម្រិតទាបបំផុត។ លោកបានបន្ថែមថា សិង្ហបុរី គឺជាមូលដ្ឋានដ៏គួរឱ្យទុកចិត្តសម្រាប់វិនិយោគិនក្នុងការទាញយកផលប្រយោជន៍ពីទីផ្សារ ដែលកំពុងរីកចម្រើនដូចជា ឥណ្ឌូនេស៊ី វៀតណាម និងឥណ្ឌាជាដើម៕

ដោយៈ សរ សុជាតិ