បើតាមសមាគមសហគ្រាសធុនតូច
និងមធ្យមរបស់ម៉ាឡេស៊ីដដែលបានឲ្យដឹងថា
ចាប់តាំងពីផ្ទុះឡើងនូវជំងឺកូវីដ១៩កាលពីឆ្នាំមុនមក
យ៉ាងហោចណាស់មានសហគ្រាសធុនតូច និងមធ្យមប្រមាណ
១៥ម៉ឺនកន្លែងនៅម៉ាឡេស៊ីត្រូវបិទទ្វារ
ដែលបានបណ្តាលឲ្យកម្មករនិយោជិតជាង ១លាន២សែនបានបាត់បង់ការងារ។
បញ្ហានេះត្រូវបានសមាគមបង្ហាញការព្រួយបារម្ភជាខ្លាំង ដោយសារតែជាង ៩០%នៃក្រុមហ៊ុនទាំងអស់នៅម៉ាឡេស៊ី ជាក្រុមហ៊ុនក្នុងវិស័យសហគ្រាសធុនតូច និង មធ្យម។ តួលេខកាលពីឆ្នាំ២០១៩ គ្រាដែលមិនទាន់មានការឆ្លងរាលដាលកូវីដ១៩ បានបង្ហាញថា សហគ្រាសធុនតូចមធ្យមចំនួន៩០ម៉ឺនកន្លែង បានផ្តល់ការងារឲ្យពលរដ្ឋម៉ាឡេស៊ី ជាង ៧លាននាក់ និង បានចាក់បញ្ចូលថវិកាប្រមាណ១៣០ពាន់លានដុល្លារអាមេរិកទៅក្នុងចរន្តសេដ្ឋកិច្ចម៉ាឡេស៊ីក្នុងឆ្នាំ២០១៩។
គួររំឭកថា ម៉ាឡេស៊ីស្ថិតក្នុងការបិទខ្ទប់ប្រទេសចាប់តាំងពីថ្ងៃទី០១មិថុនាមកម្ល៉េះ បើគេគិតមកដល់ពេលនេះ មានរយៈពេលជិត១ខែទៅហើយ។ អំឡុងពេលបិទខ្ទប់ សកម្មភាពសង្គម និងសេដ្ឋកិច្ចទាំងអស់ត្រូវបានផ្អាក លើកលែងតែសកម្មភាពសេដ្ឋកិច្ចចាំបាច់មួយចំនួនប៉ុណ្ណោះ។
បើតាមការប៉ាន់ស្មានរបស់សមាគមសហគ្រាសធុនតូច និងមធ្យមរបស់ម៉ាឡេស៊ី កម្មករនិយោជិតជាង៨លាននាក់អាចនឹងបាត់បង់ការងារធ្វើ ប្រសិនបើការបិទខ្ទប់ត្រូវអូសបន្លាយរហូតដល់ផុតខែកញ្ញាឆ្នាំនេះ។
អត្ថបទគួរអាន
រដ្ឋាភិបាលរដ្ឋសហព័ន្ធម៉ាឡេស៊ីធ្លាប់បានសន្យានឹងដកចេញវិញនូវវិធានការបិទខ្ទប់នេះ នៅពេលដែលករណីឆ្លងកូវីដ១៩ប្រចាំថ្ងៃធ្លាក់មកនៅក្រោម ៤.០០០ករណី។ ប៉ុន្តែផ្ទុយស្រឡះពីការសន្យា ករណីឆ្លងប្រចាំថ្ងៃនៅម៉ាឡេស៊ី មិនបានថមថយចុះនោះទេ ដោយគិតជាមធ្យមម៉ាឡេស៊ីមានអ្នកឆ្លងកូវីដ១៩ ជាង១ម៉ឺន៣ពាន់នាក់ជារៀងរាល់ថ្ងៃ។ ប្រការនេះកំពុងរុញច្រានឲ្យរដ្ឋាភិបាលម៉ាឡេស៊ីកាន់តែឈឺក្បាល រឹតតែជួបការលំបាកក្នុងការទប់ស្កាត់កូវីដ១៩ព្រមទាំងមិនអាចបញ្ចប់ក្តីសង្ឃឹមក្នុងការបើកប្រទេស និង ស្តារសេដ្ឋកិច្ចជាតិឡើងវិញក្នុងខែកក្កដានេះ។
សូមជម្រាបថា ម៉ាឡេស៊ីជាប្រទេសមានអ្នកឆ្លងកូវីដ១៩ច្រើនជាងគេលំដាប់ទី៣ នៅតំបន់អាស៊ានបន្ទាប់ពីឥណ្ឌូនេស៊ី និង ហ្វីលីពីន ដោយគិតត្រឹមថ្ងៃទី២៦កក្កដា ម៉ាឡេស៊ីមានអ្នកឆ្លងសរុបជាង១លាននាក់ហើយ ខណៈអ្នកស្លាប់វិញមានជិត៨ពាន់នាក់៕
None
