កសិករចិញ្ចឹមជ្រូកមួយចំនួនក្ស័យធន ខណៈអ្នកចិញ្ចឹមគោមួយចំនួនចាប់ផ្តើមបោះបង់ចោល

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា បានគូសបញ្ជាក់ថា ការចរាចរសាច់បង្កកគ្មានស្តង់​ដា និងប្រភពពីខាងក្រៅចូលមកកម្ពុជា មិនត្រឹមតែប៉ះពាល់ដល់ប្រជាកសិករដែលចិញ្ចឹមជ្រូកនោះទេ វាក៏បានធ្វើឱ្យប៉ះពាល់ដល់របរចិញ្ចឹមគោនៅក្នុងស្រុកផងដែរ ដោយមានកសិករចិញ្ចឹមគោមួយចំនួនបានបោះបង់ការចិញ្ចឹមគោរបស់ខ្លួន។ តាមការអះអាងរបស់ប្រធានសមាគមរូបនេះ មូលហេតុចម្បងដែលធ្វើឱ្យកសិករចិញ្ចឹមគោបោះបង់ការចិញ្ចឹម ក៏ដោយសារនៅលើទីផ្សារមានការចរាចរសាច់បង្កកគ្មានប្រភពច្បាស់លាស់ គ្មានស្តង់ដា និងមានតម្លៃទាបជាងសាច់គោចិញ្ចឹមក្នុងស្រុក ដែលវាបានប៉ះពាល់ដល់ទីផ្សារសាច់គោក្នុងស្រុក និងបានទាញទម្លាក់តម្លៃសាច់គោក្នុងស្រុកឱ្យធ្លាក់ចុះ ដែលធ្វើឱ្យកសិករខាត់បង់ក្នុងការចិញ្ចឹម។ ថ្លៃដើមផលិតខ្ពស់ ហើយការលក់បានតម្លៃទាប ក៏ជាមូលហេតុមួយធ្វើឱ្យកសិករបោះបង់ការចិញ្ចឹមរបស់ខ្លួនផងដែរ។ ជាក់ស្តែងបើតាម លោក ស៊្រុន ពៅ សាច់គោបង្កកគ្មានស្តង់ដានាំចូលមកកម្ពុជាមានតម្លៃទាបជាងសាច់គោក្នុងស្រុកពាក់កណ្តាលឯណោះ ដោយគោបង្កកនាំចូលមានតម្លៃ២ម៉ឺនរៀលក្នុងមួយគីឡូក្រាម ខណៈគោក្នុងស្រុកមានតម្លៃ៤ម៉ឺនរៀល ក្នុងមួយគីឡូក្រាម។

យ៉ាងណាក៏ដោយ លោក ស៊្រុន ពៅ អះអាងថា មកទល់ពេលនេះកសិករចិញ្ចឹមគោដែលបានរងផលប៉ះពាល់ និងបោះបង់ការចិញ្ចឹមគោនោះ គឺមានកម្រិតតិចតួចប៉ុណ្ណោះ បើធៀបនឹងចំនួនកសិករចិញ្ចឹមជ្រូក ដែលបានបោះបង់ការចិញ្ចឹមនាពេលកន្លងមក។ បើតាមថ្នាក់ដឹកនាំសមាគមរូបនេះ បច្ចុប្បន្នក៏នៅតែមានកសិករបោះបង់ការចញ្ចឹមជ្រូកជាបន្តបន្ទាប់ផងដែរ។ ហើយលោកជឿជាក់ថា បើកសិករនៅតែបន្តខាតបង់បែបនេះ នោះកសិករនឹងក្ស័យធនក្នុងការចិញ្ចឹមជាក់ជាពុំខាន។

យ៉ាងណាមិញលោក ស៊្រុន ពៅ ស្នើឱ្យក្រសួងស្ថាប័នពាក់ព័ន្ធ បង្កើនការយកចិត្តទុកដាក់ក្នុងការដោះស្រាយ និងទប់ស្កាត់ការហូរចូលនូវសាច់បង្កកមិនត្រឹមត្រូវតាមស្តង់ដា និងគ្មានប្រភពច្បាស់លាស់នេះ ដើម្បីធ្វើយ៉ាងណាជួយទ្រទ្រង់ដល់កសិករចិញ្ចឹមសត្វនៅក្នុងស្រុកឱ្យមានស្ថានភាពល្អប្រសើឡើងវិញ៕