អ្នកនាំពាក្យសា្ថនទូតអាល្លឺម៉ង់ បាននិយាយក្នុងសេចក្តីថ្លែងការណ៍ នៅថ្ងៃទី៣១ ខែមីនា ឆ្នាំ២០២០ ដូច្នេះថា “ប្រទេសអាល្លឺម៉ង់បានដំណើរការជើងហោះហើរធ្វើមាតុភូមិនិវត្តន៍ចំនួន ២ជើង កាលពីថ្ងៃអាទិត្យមុននេះ។ អ្នកដំណើរ ៤៤៦នាក់ ជាពលរដ្ឋអាឡឺម៉ង់ សហភាពអឺរ៉ុប និងស្វ៊ីស ក៏ដូចជា អ្នករស់នៅអាល្លឺម៉ង់ផ្សេងទៀត បានទៅដល់ផ្ទះពួកគាត់ដោយសុវត្ថិភាព។”
អ្នកនាំពាក្យសា្ថនទូត បានបន្តថា “សូមអរគុណប្រទេសកម្ពុជាចំពោះរាល់ការគាំទ្ររបស់អ្នក ដើម្បីធ្វើឱ្យរឿងនេះកើតឡើង។"
ការធ្វើមាតុភូមិនិវត្តន៍នេះបានកើតឡើង បន្ទាប់ពីប្រទេសបារាំងនិងប្រទេសម៉ាឡេស៊ី បានបញ្ជូនយន្តហោះពិសេសមកដឹកជញ្ជូនជនជាតិខ្លួនរាប់រយនាក់ចេញពីប្រទេសកម្ពុជាផងដែរ កាលពីសប្តាហ៍មុន។
អត្ថបទទាក់ទង
ខណៈដែលបារាំងនិងអាល្លឺម៉ង់បានធ្វើមាតុភូមិនិវត្តន៍ជនជាតិខ្លួននោះ មានអ្នកដំណើរជនជាតិអង់គ្លេសរាប់រយនាក់ នៅជាប់គាំងនៅប្រទេសកម្ពុជានៅឡើយ។
នៅតាមបណ្តាញសង្គមហ្វេសប៊ុក អ្នកដំណើរទាំងនោះបានបង្កើតជាក្រុម ឈ្មោះថា “Stranded in Cambodia UK” ដើម្បីរៀបចំការហោះហើរពិសេស ហើយបានស្នើដល់រដ្ឋាភិបាលអង់គ្លេស ជួយបញ្ជូនយន្តហោះមកដឹកពួកគាត់ចេញពីកម្ពុជាផងដែរ។
អ្នកនាំពាក្យនៃក្រសួងការបរទេសអង់គ្លេស បាននិយាយថា អាជ្ញាធរអង់គ្លេសនឹងស្វែងរកជម្រើសសម្រាប់ការហោះហើរដែលមានលក្ខណៈពាណិជ្ជកម្ម ឬរបស់រដ្ឋាភិបាល ដែលអាចឲ្យជនជាតិអង់គ្លេសទាំងនោះត្រឡប់ទៅចក្រភពអង់គ្លេសវិញបាន។
ក៏ប៉ុន្តែ អ្នកនាំពាក្យនោះបាននិយាយថា មិនទាន់អាចដឹងថា នឹងមានការហោះហើរពិសេសទៅយកជនជាតិអង់គ្លេស ពីប្រទេសណាមួយ នៅឡើយទេ៕
None
