ចំណែកបុគ្គលិករាប់រយនាក់មកពីធនាគាររបស់រដ្ឋស្រីលង្កាដែលភាគច្រើនពាក់ពណ៌ខ្មៅ និងកាន់ទង់ជាតិខ្មៅនោះក៏បានចូលរួមជាមួយសហជីពធនាគារផ្សេងទៀតក្នុងការដង្ហែក្បួនតវ៉ាទៅកាន់ការិយាល័យប្រធានាធិបតីផងដែរ ខណៈដែលមនុស្សរាប់ពាន់នាក់បានដើរតវ៉ាតាមផ្លូវនៅជុំវិញប្រទេសនេះ។
វិបត្តិជំងឺកូវីដ១៩ ការកើនឡើងតម្លៃប្រេងឥន្ធនៈ ការកាត់បន្ថយពន្ធ និងការថយចុះយ៉ាងឆាប់រហ័សនៃទុនបំរុងអន្តរជាតិ គឺជាកត្តាធ្វើឱ្យប្រទេសស្រីលង្កាគ្មានប្រាក់គ្រប់គ្រាន់ក្នុងការចំណាយលើការនាំចូលប្រេងឥន្ធនៈ អាហារ និងថ្នាំពេទ្យសំខាន់ៗ ហើយជួនកាល បាតុកម្មតាមដងផ្លូវដ៏ហិង្សាក៏បានផ្ទុះឡើងផងដែរ នៅក្នុងខែនេះដោយសារការខ្វះខាត និងការដាច់អគ្គិសនីបានក្លាយជាបញ្ហាដ៏ស្រួចស្រាល់ខ្លាំងបំផុត។
លោកសាមាធី អ៊ីកាណាយ៉ាគេ (Samanthi Ekanayake) អាយុ៣៤ឆ្នាំជាធនាគារិករបស់រដ្ឋបាននិយាយថា រដ្ឋាភិបាលនេះបានបំផ្លាញប្រទេសស្រីលង្កា។ ថ្លៃចំណាយរបស់ពលរដ្ឋ បានកើនឡើងរៀងរាល់ថ្ងៃ អាជីវកម្មបិទទ្វារ ហើយប្រជាជនគ្មានផ្លូវអាចរស់នៅបានឡើយ។ គ្មានប្រេងសាំង ហើយពេលពួកគេទៅផ្ទះ គឺគ្មានភ្លើងអគ្គិសនី និងគ្មានហ្គាសសម្រាប់ចម្អិនអាហារ។
មេដឹកនាំសហជីពរបស់ប្រទេសនេះ បានគំរាមធ្វើកូដកម្មនៅពេលខាងមុខទៀតនេះ គឺចាប់ពីថ្ងៃទី០៦ ខែឧសភា ប្រសិនបើប្រធានាធិបតី និងរដ្ឋាភិបាលមិនចុះចេញពីតំណែងទេនោះ។
អត្ថបទគួរអាន
លោក Rajapaksa នៅសប្តាហ៍នេះ បានបញ្ជាក់សារជាថ្មីពីឆន្ទៈរបស់លោកក្នុងការបង្កើតរដ្ឋាភិបាលបណ្តោះអាសន្នជាមួយនាយករដ្ឋមន្ត្រី និងគណៈរដ្ឋមន្ត្រីថ្មី។ ទោះជាយ៉ាងណា នាយករដ្ឋមន្ត្រីលោក Mahinda Rajapaksa បងប្រុសរបស់ប្រធានាធិបតីបានបដិសេធមិនចុះចេញពីតំណែង ហើយលោកបាននិយាយដោយទទូចថា លោកនៅតែបន្តមានសំឡេងភាគច្រើននៅក្នុងសភា ដែលមានសមាជិកចំនួន ២២៥ រូប។
យ៉ាងណាក៏ដោយចុះ គណបក្សប្រឆាំងធំៗចំនួនពីរនៅស្រីលង្កា បានចាប់ផ្តើមដំណើរការនាំយកញត្តិសម្ដែងការមិនទុកចិត្តចំពោះប្រធានាធិបតី និងនាយករដ្ឋមន្ត្រីដាក់ជូនសមាជិកសភាធ្វើការពិចារណាផងដែរ។
លោកណាឡាកា ហ្គតដាហេវ៉ា (Nalaka Godahewa) អ្នកនាំពាក្យខុទ្ទកាល័យគណៈរដ្ឋមន្ត្រីបាននិយាយថា អស្ថិរភាពនយោបាយនឹងធ្វើឱ្យមានការលំបាកបន្ថែមទៀតក្នុងការផ្តល់ដំណោះស្រាយចំពោះវិបត្តិហិរញ្ញវត្ថុ។ ដូច្នេះវាជាការចាំបាច់ដែលត្រូវតែបង្កើតឱ្យមានរដ្ឋាភិបាលរឹងមាំ និងមានសំឡេងភាគច្រើននៅក្នុងសភា ខណៈដែលរដ្ឋាភិបាលកំពុងតែធ្វើការឆ្ពោះទៅរកគោលដៅបែបនេះឯង៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
